Read BIBILLYA Mareiyo Meele a Iruva YEREMIA 32 Bible Online

YEREMIA 32 - BIBILLYA Mareiyo Meele a Iruva bible

YEREMIA 32

¹Wikee mwaaka wa ikumi wa ushilyi lwa mangyi Sedekia wa Yuda, na nto mwaaka wa ikumi na nyanya wa mangyi Nebukadnesa wa Babilony. Nndumi Iruva mmbo alerera-se neeny.

²Kyeri eki vasikari va Nebukadnesa mmbo vempooka ishekapa Yerusalemu, neeny sharayo efo mmba ya ki-mangyi.

³Mangyi Sedekia mmbo enshifinga kimaruma shileamba Nndumi Iruva aamba, “Mmbo shiraa mangyi ya Babilony natire muri yeu,

⁴na mangyi Sedekia nnyashekuturushwaa-fo, Nawe-da mmbo asherambikyoo mangyi ya Babilony, vakwanannye nawe, narere nawe.

⁵Sedekia narawa Babilony, nakaefo nawonise ekyo shikunndye. Naakwa aamba niikabana na Vababeli yewo nnyasheveedimaa-fo. Ni yeny Nndumi Iruva shaamba.”

⁶Naasa Nndumi Iruva kashivia,

⁷sheelyi Hanameli we mwana wa ndoo munywa Shalumu, mmbo ashekusheyaa nakuvye kuure irema lyakwe lyikee kulya Anatoti urukeny lwa Benyaminy mashika yeve mmbo kukee samu yakwa,

⁸kimmba yeny shikee mfyari wakwe wa kufii mmwasi Hanamel kasheshisora kulya kari kamangyi sheekai kashivia shuure irema elyo. Nkyo shamanya dede Nndumi Iruva mmbo arera neeny.

⁹Neeny mmbo shoora irema yellyo lya mwanama wakwa Hanameli, shamweekenya fesa shoora irema elyo. Na wuuru lwavavyo lukava fesa ikumi na mfungare.

¹⁰Naasa shavika saii barrwa yeyo ya wuuru.

¹¹Nalyo shepoo barrwa ivii ta wuuru elo shatifinga neesongosya fyoose shaasa sharia yavavyo ikai.

¹²Shaninngya Baruku mwana wa Neria na nshuku wa Maasei. Sharammbikya na Hanamel elollye ando amwi na valya valeva vakureeki va ikumbyana, ando amwi na valya vekee alya kari.

¹³Llyo shilevia Baruku nawo veitye,

¹⁴“Nndumi Iruva wa Israeli mmbo akuvavasya kukamare barrwa eti ivii. Imwi nya kiringisyo na ingi nya ukureekyi, kundetivika nunguny ya uteeri, tikae-fo myaaka miingyi.

¹⁵Nawe Nndumi Iruva wa Israeli mmbo aniingya mumu marema ao mmba ao misabibu fyuurwa kunu urukeny elu.”

¹⁶Shikimaa irammbikya Baruku barrwa ilya ya wuuru, shatereva shaamba,

¹⁷“Woi Ndumi Iruva mwiishillya, mmbo kuleumba iruveeu na ulana kwifinya yafo na widimi lwafo, kulaifo nta kindo kyakulema.

¹⁸Mmbo koora ikunda lyafo lyilavaa yeesa kwa vandu vafo fiku na fiku, kwavetaiya vandu kya ulyamari lwa vande vawo. Mmbo kukee Iruva atiri finya na widimi. Kwaveva Ndumi Iruva muni finya.

¹⁹Mmbo kwadeesya findo finiini na widimi lwafo. Kwaveesarya na findo fyoose vandu varie nrony itana, kwavevataa kiinani na mitannyi yaawo.

²⁰Kasha kalya mmbo kuletana ngyende shiingyi kulya Misri, kwaveengera itana indo kufike inu, kunu Israeli na efo masangeny koose, nnduma wafo ukakwaana masangeny koose.

²¹Kyeendwa ni ngyende na widimi lwafo fikeerese masanga mmbo kuletannya Israeli kulya Misri koora wiidimi na finya yafo, mmbo kulevasimba uruka elu uteri lukee usha, shaasa llya kukevikya vakuu vawo kyaasa.

²²Lyo vekifika kunu na ikaa-fo, mmbalekikwiindya nta ikaa shaasa kulevalosha-fo.

²³Nta kimwi valetana kya filya kulevavia-fo. Nkyo kileenngye kwavakapa na urumato elu.

²⁴“Vababeli mmbo vansongosya mireiyo vakaringitya muri yeu vautire vaukape. Fira, shaa na ndwari mmbo fituulaa muri yeu maakony awo. Filya kuleluvia ekakafi fyansha.

²⁵Kyeendi lyo Nndumi Iruva mwiishillya ni yewe kuleshivavasya shuure irema mbee ya vakureeki, kufii indo na elyi muri mmbo vammeetirwa mmbandu va Vababeli.”

²⁶Nndumi Iruva kashivia,

²⁷“Ni yeny Nndumi Iruva, Iruva wa masanga moose. Nkwiifo kindo kishilemaa-fo.

²⁸Mmbo nsheniingyaa muri yeu kwa Nebukadnesa wa Babilony na vasikari vakwe, vautire,

²⁹vaukore. Vaumamite ando amwi na mmba tilya kundo vekekorya ubani kwa baali efo mmbeeu sanda yuutya-fo firaso fya mfinyo kwa maruva engyi.

³⁰Kupookya mbee deny vanddu va Israeli na Yuda mmbo valeshifuluta unyafi na findo vatana.

³¹Na vandu va muri yeu vakashifuluta unyafi uka nkonu muri yeu ulepooka itanwa. Llyo neeny sharumbwa iulyamara.

³²Nkimaruma kya uravi lwa vandu va Yuda na Yerusalemu, na vammangyi vawo na vasongoru, sanda na vakohani na vakisuku vawo.

³³Mmbo valeshikapa mungo. Na llya elyi shileengera ireraa nawo na ivalosha lya valashiita.

³⁴Vakatana vavika mafwanu efo mmba yakwa vakaitefusa.

³⁵Vakatannya Baali fitara fyeerasya kulya imungony lya Hinomu, kundo valeuta vana vawo firaso fyeekora na muro kwa iruva lya Moleki. Nta nshilevavasya vatani indo-fo, nta nkyekee nrony wakwa-fo. Vakatana indo vakeengye vandu va Yuda ulyamari.”

³⁶Naasa Ndumi Iruva wa Israeli kashivia, “Yeremia, vandu mmbo vakeamba fira na shaa na ndwari mmbo fituulaa muri yeu maakony a mangyi ya Babilony. Naasa arannya shikuvie kindo kingyi.

³⁷Mmbo nshesangiryaa vandu woose shiwoote efo shilevanyanyatya kya unyafi lwakwa. Neeny mmbo nshevaviraa kunu, vashekaa kunu na unapwe.

³⁸Nawo mmbo vashevaa vandu vakwa, neeny shive Iruva waawo.

³⁹Shishevaniinga ishora lyimwi nsi lya ishiinndya kyeeri kyoose, nambo kiwookye-fo kisha wo na vana vawo numa.

⁴⁰Neeny mmbo nshevikaa nawo kyaasa kya llung'anu. Nshishemandaa ivatannya fya usha-fo. Shivaallwe vashiiryaa na nrima moose, nambo valakishire-se.

⁴¹Neeny nshelollya nsia ivatannya fya usha. Shivavike vakae llung'anu urukeny elu.”

⁴²Na shaasa shileengye vandu yeva urumato, niindo-da nshevasimba mesha shaasa shilevavikya kyaasa.

⁴³Vandu mmbo vakeamba uruka elu mmbo lushevaa kasa koomu, kulavaa ikaa vandu ao mafisi, nalo lusherammbikywa Vababeli. Lyo marema mmbo asheurwaa lyingyi kunu urukeny elu.

⁴⁴Vandu vaure, vavike mareyyo atiri ukureeki. Kulya Benyaminy niindo kishevaa, na efyo myuungony iringitye Yerusalemu, neefo miriny ya Yuda, na efo miriny ikee efo urukeny, mamungony a kungyi-se, na taari ta sinde ta Yuda. Shiviire vandu urukeny lwawo. Ni yeny Nndumi Iruva shaamba.