Read BIBILLYA Mareiyo Meele a Iruva YEREMIA 36 Bible Online

YEREMIA 36 - BIBILLYA Mareiyo Meele a Iruva bible

YEREMIA 36

¹Mwaaka wa kaana llya Yehoyakimu mwana wa Yosia aleshillya Yuda irero lya Nndumi Iruva mmbo lyilesheya Yeremia,

²“Ipoo kyitabu kureiye-fo wo kindo shilekuvia kya Israeli na Yuda na masanga engyi. Reiya-fo findo fyoose shaasa shilekuvia kupookya llya shilepooka irera neewe kufike inu.

³Kulakooye kyeeri vandu va Israeli vashiita kya filya fyoose shikundye ivatannya kyevakapa, vashera shia tawo shiravi. Llyony shishearanya uravi lwawo na ulyamari lwawo.”

⁴Llyo shilevaanga Baruku mwana wa Neria, shanreeya nareiye findo fyoose shaasa Nndumi Iruva alerera neeny. Nawe Baruku kareiya fyoose kyitabuny.

⁵Naasa shavavasya Baruku indi, “Nshikitiri muumu yaanga kulya mmba ya Iruva-fo,

⁶Lyo mmbo shikunndye yewe kweende fo elyi vandu vashendaa-fo ikootoya. Kuvasomyi kyitabu ekyo nnu veete, Naambo findo fyoose shaasa Nndumi Iruva aleshivia, neeny shakuvia yewe. Soma nambo woose veete ando amwi na vandu woose va Yuda yewo valenkaa efo miriny yaawo.

⁷Kulakooye ndesa vatereva Nndumi Iruva vauke efo shieny tawo shiravi, mashika Nndumi Iruva mmbo akunndye ivarikya ngapo shiroo.”

⁸Naasa Baruku kasommya vandu yewo marero yoo a Nndumi Iruva moose shaasa llya shilemmbia natani.

⁹Wikee mwiiri wa keenda wa mwaaka wa karaanu wa ushilyi lwa mangyi Yehoyakimu mangyi ya Yuda, vandu vakakootoya nambo vafuuye Nndumi Iruva woose vakee Yerusalemu vakatana indo, amwi na woose vesheye-fo vauka miriiny ingyi ya Yuda.

¹⁰Naasa elyi vandu woose vashaarannyaa, Baruku kasoma findo filya fyoose shaasa Yeremia alembia. Katana indo kulya mmba ya Iruva. Kirya kyakwe mmbo kyekee uwe efo kari ka uwe kufii na mwaango wa yaanga yoo Ngiriny shiiya ya mmba ya Iruva.

¹¹Nalyo Makaia mwana wa Garia ekee nshuku wa Shafan, keeta Baruku esomaa kyitabu ekyo shaasa Nndumi Iruva alemmbia.

¹²Naasa keenda kulya mmba kwa mangyi, kulya mmba ya shila, kulya vasongoru woose vekai. Elishama ekee mwiivavara-fo, Delaia mwana wa Shemaia, Elinatan mwana wa Akibori, Gemaria mwana wa Shafan, Sedekia mwana wa Hanania, na vasonngoru vengyi woose, veiyo.

¹³Mikaia kavavia findo fyoose shaasa aleita Baruku esomyaa vandu.

¹⁴Nalyo vasongoru yewo vakaruma Yehudi, mwana wa Netania akee nshuku wa Shelemia na nshuku-se wa Esopia navie Baruku neende kyitabu ekyo alesomya vandu. Nalyo Baruku kaveenngye.

¹⁵Nawo vakammbia, “Nkyee kaa rembo-te kulusomye kyitabu ekyo neese.” Nawe Baruku kavetana indo.

¹⁶Ekimaa isoma, vakakwiinndukya veni na veni veefulukyo vakavia Baruku, “Nkuti luvie mangyi findo efi.”

¹⁷Vakooka-fo vakammbesa, “a nkye luvie-te, mmbo kuleidima inda ireiya findo efi fyoose? Yeremia mmbo alekuvia irero lyimwi lyimwi-ro neewe kwareiya?”

¹⁸Baruku kavavia, “Yeremia mmbo alerera, neeny shareiya marero moose na wiinu kunu kyitabuny yekyi.”

¹⁹Vakooka-fo vakammbia, “Yewe na Yeremia nkuti mundekusuruma. Nta mulakunde nndu namanyi ando mukai-fo.”

²⁰Nalyo vasongoru valya vakasuruma kyitabu kilya kulya kiryeny kya Elishama, ulya mwiikallya, vakeenda kulya mmba ya shila ya mangyi, vakanndevia mangyi findo filya fyoose.

²¹Mangyi nawe karuma Yehudi nandeende kyitabu ekyo. Kandekyeende kulya kiryeny kya Elishama kashekisomya mangyi ando amwi na vasongoru valya veiyo vendingitye.

²²Nakyo kyekee kyeeri kya mbeo, mangyi mmbo ekee efo mmba yakwe ya kyeeri kya mbeo, eshoraa muro.

²³Llya Yehudi alemaa isoma fyenga firaru ao fiina indi, mangyi karumbwa kyitabu kilya na kyaandu kakyeerya kulya murony. Na kyitabu kyoose kakimaya murony.

²⁴Lyo nta mangyi ao vandu valya vakwe vasongoru mmbaleiryaa ao ifulukywa-fo.

²⁵Na kyikava Elinatan Delaia na Gemaria mmbo valetereva mangyi nalakore kyitabu ekyo, lyo nalavaarannyi.

²⁶Nalyo mangyi kavavasya mwana wa mangyi Gerameeli, na Seraia mwana wa Asrieli na Shelemia mwana wa Abdeel vashiitire yeny na mwireiya wakwa we Baruku.

²⁷Naasa mangyi Yehoyakimu ekimaa ikora kyitabu kilya Yeremia alevavasya Baruku nareiye, irero lya Nndumi Iruva lyikasheya Yeremia;

²⁸ipoo kyitabu kingyi kureiye-fo findo filya fyekee kyitabuny kilya kya mbee.

²⁹Naasa Nndumi Iruva kashivia shivie mangyi indi, “Mmbo kulekora kyitabu kilya, kwavesa Yeremia nkiki elyi alereiya sheelyi mangyi ya Baabeli mmbo asheshaa namamite uruka elu nawaa na vandu na findo fyeevikya.

³⁰Nkyo ulaalu, yeny Nndumi Iruva mmbo shakuvia, yewe mangyi Yehoyakimu, nkushekikaafo mfyari wafo nasheshillyya ando a Davidi-fo. Nnying'a wafo mmbo nsheroo efo ukorwa mmwi nsanyiny na laura kyeeri kya kio.

³¹Mmbo nshekukapaa na vana vafo numa yafo, na vasongoru vafo kimaruma kya ngyulyamari muletana. Mashika yewe nta vandu va Yerusalemu na Yuda mmulearannya wiikimbi lwakwa-fo, nkyo mmbo nshemwengyee ngapo yeyo shoose shaasa shileamba.”

³²Naasa llyo shileepoo kyitabu kingyi shakiniingya mwiireiya wakwa we Baruku. Nawe kareiya wo kindo shaasa shilemmbia. Mmbo alereiya wo kindo kilya kyekee kulya kyitabuny kilya kya mmbee na nrumi yavayo shaasa shilemmbia.