Read BIBILLYA Mareiyo Meele a Iruva YEREMIA 37 Bible Online

YEREMIA 37 - BIBILLYA Mareiyo Meele a Iruva bible

YEREMIA 37

¹Mangyi Nebukadnesa wa Babilony mmbo avika Sedekia mwana wa Yosia nave mangyi ya Yuda ando a Yehoiakin mwana wa Yehoyakimu.

²Lyo Sedekia na vasongoru vakwe nta vandu vakwe mmbaleirikya nrumi ilya ya Nndumi Iruva aleruma Yeremia-fo.

³Mangyi Sedekia mmbo aleruma Yehukai mwana wa Shelemia na nkohani Sefania we mwana wa Maaseia vashivie shitereve Nndumi Iruva weeru ando a vandu va uruka woose.

⁴Kyeeri ekyi nshemfingwa-fo, nkyo sheetiri mwaanya deny wa iru-rua efo vanduny.

⁵Vasikari va Babilony lyo mmbo vekeringitya Yerusalemu, lyo kyeeri veeta sheelyi Vamisri nawo vankilya vakaruuka nnyanu, wo Vababeli wakawuya numa.

⁶Naasa Nndumi Iruva wa Israeli kashivia shivie Sedekia,

⁷“Vasikari va Misri vakeesha ishekweekya, vakammaa vawuye.

⁸Llyo Vababeli vawuyaa lyingyi ishekapa muri yeu, vautire neukora.

⁹Nkyo yeny Nndumi Iruva mmbo shamwiikimba mulashekulemba muveni mwaambe Vababeli mmbakewuya, mashika nkuti vawuye.

¹⁰Naakwa mweeshidimaa ivinga vasikari yewo va Babilony kutani vasaa-u vasikari vabobore deny vakalala meemeny awo, lyo mmbo vashekwiipoo vakore muri yeu usye.”

¹¹Vasikari va Babilony mmbo vewuya numa kimmba vasikari va Misri vekeesha.

¹²Nkyo yeny shooka kulyaa muriny sheenda kulya kwa Benyaminy shindevarya ding'u yakwa efo ufyariny.

¹³Lyo kyeeri shefika alya Ngiriny ya Benyaminy, nsongoru wa vasikari yewo vetiri ikamba lyeeringa, avaangwa Iriya mwana wa Shelemia avekee nshuku wa Hanania, kashisaleesa kaamba, “Yewe mmbo kukee umwi wa Vababeli.”

¹⁴Yeremia kammbia, Ekyo nshi dede-fo. Yeny nshikee umwi nawo-fo. Lyo Iriya nnyaleshaaranya-fo, nkyo kashitira kandeshirwaaya vasongoru vakwe.

¹⁵Vakashinyaasya neevavasya shirawa shindefingyo kulya mmba kwa Yonatan ulya ekee mwireiya wa barasa. Nayo mmba yakwe mmbo yemmaluwa kifingyo.

¹⁶Kyeeri Yeremia eekeemfinge efo kiryeny kya si ya mmba kundo alekaa kyeeri kyaasha.

¹⁷Elyi numa mangyi Sedekia karuma shindeendwa, na kulya mmba kwakwe kashivesa kirika kaamba, “Kwiifo nrumi shoose yooka kwa Nndumi Iruva?” Shammbia, “Ee, iifo.” Shammbia, “Mmbo kukeetirwa kundevikwa maakony a mangyi ya Babilony.”

¹⁸Naasa Yeremia kevesa Sedekia, “A nkyokyi shilekulyamarya yewe ao vasongoru vafo ao vandu va uruka kutani sheerwa kifingyony?

¹⁹A nkyokyi nta kilekooya kisuku vafo valya valekuvia sheelyi vababa mmbakusheyaa nekaya uruka lwafo?

²⁰Na ulaalu, woi mangyi mmbo shakutereva kushaarannyi eki. Shikunndye ikutereva. Mmbo shakutereva kuulashiviire kifingyony kulya mmba kwa Yonatan — fo. Shilasheendefiyya-fo.”

²¹Llyo mangyi Sedekia alevavasya shindefingyo kulya kari ka mmba ya mangyi. Kulya mmbo shilekaafo shava shiningwaa nkate wuuka kulya rukony kukafika nkonu ulya mikate ilesya kulya muriny.