Read BIBILLYA Mareiyo Meele a Iruva YEREMIA 38 Bible Online

YEREMIA 38 - BIBILLYA Mareiyo Meele a Iruva bible

YEREMIA 38

¹Shafatia mwana wa Matani, Gedalia mwana wa Pashuri. Yehukal mwana wa Shelemia na Pashuri mwana wa Malkia, yeva mmbo veeta marero moose Yeremia evia vandu sheelyi,

²Nndumi Iruva mmbo aleamba, “Nndu moose yeto ashekaa kunu muriny mmbo awawaa mfira ao shaa ao ndwari. Kyeendi kwakooya nndu ooka-fo kandekurambikya makony a Vababeli nnyashewawaa-fo, nkuti nakire muu wakwe.”

³Shaveva shivaviaa sheelyi Nndumi Iruva mmbo aleamba, “Mmbo nsheningyaa vasikari va Vababeli muri yeu vautire.”

⁴Nalyo vasongoru vakeenda kwa mangyi vakammbia, “Nndu yeu nkuti nawaawa. Elyi akerera indi mmbo ashengyee vasikari kunu muriny asye finya deny, nawe ni ndo akeevia wo nndu kunu muriny. Nnyakeekya vandu-fo, mmbo akevaawuta tupu.”

⁵Nalyo mangyi Sedekia kavavia, “Kyasyiany taniny nawe shaasa mukunndye, yeny nshimwimaa-fo.”

⁶Vekiita indo vakaipoo Yeremia vakandemoolota na fyoove kulya kiroriny kya mwana wa mangyi Malkia kyekee kulya kari ka mangyi. Nafo nkweefo mura-fo, ni ibwashi yeni, shasokya-fo.

⁷Lyo Ebedmeleki nndu umwi Mwisopia, nawe mmbo eerundaa efo kwa mangyi keeta sheelyi mmbo woolota Yeremia kulya kiroriny. Kyeeri ekyi we mangyi mmbo eevikye shila alya Ngiriny ya Benyaminy.

⁸Naasa Ebedmeleki keenda nang'u kandevia mangyi.

⁹“Mangyi mmbee, kindo ekyi vandu yeva vatana nkikasha. Mmbo valeolota nkyisuku ullya Yeremia kulya kiroriny kundo kulakee shoonga nkuti nafwe nshaa. Kimmba kunu muriny kulakiifo shoonga.”

¹⁰Llyo mangyi alevavasya Ebidmeleki na vandu vengyi vararu vasheshuuta kulya kiroriny kulore shamfwa.

¹¹Naasa Ebidmeleki na vandu yewo vakeenda kulya itengony vakanderuuya-fo maratwe a soori kashoolotya na fyoove.

¹²Kashivia shitivike efo makyekyele nambo fyoove filashibushwe. Neeny shatana indo.

¹³Vakashisaamisa shooka kulya kiroriny. Naasa shanderawa kulya kari kwa mangyi.

¹⁴Naasa nkonu ungyi mangyi Sedekia kavaanga Yeremia na alya ngiriny ya kararu ya mmba ya Iruva, kammbia Yeremia, “Kwiifo kindo shikunndye ikuvesa, lyo kushive kya dede deny.”

¹⁵Yeremia karouwa Sedekia, “kwakooya shakuvia kya dede yewe kushiwaa-se? Naakwa shakuvia kyeetana nta nkusharanyaa-fo.”

¹⁶Llyo mangyi Sedekia alevia Yeremia kirika, kashivikya kyaasa, kaamba, “Mmbo shalya mboo na Iruva akee na muu, Iruva yeu alutirye-u na muu, sheelyi nshishekuwaa-fo, nta ikurambikya kwa yewo vakundye ikuwaa-fo”

¹⁷Naasa llyo shilevia mangyi Sedekia sheelyi, Nndumi Iruva muni finya shoose Iruva wa Israeli mmbo aambaye indi, “Kwakooya mwakurammbikya maakony a Vababeli mukiaa, nato muri yeu nta mmbukorwaa — fo. Yewe na vandu vafo mmbo mukyaa.

¹⁸Lyo mwanra mulakurammbikya kwa Vababeli muri yeu mmbo urammbikywa Vababeli nawo vaukore, neewe nta nkusheashukaa-fo.”

¹⁹Lyo we mangyi kaamba, “Mmbo sheereiye kya vandu veru yewo valenkulunga na Vababeli. Sharawa-fo mmbo vandeshilyisaa ukiva.”

²⁰Shambia, “Nkushevikwaa maakony awo-fo. Mmbo shakutereva kwiirikye irero elyi lya Nndumi Iruva tupu, nalyo fyoose five fisha taari yafo, lyo neewe kukyaa muu.

²¹Nawe Nndumi Iruva mmbo aleshoora deny shaasa kivaa kyafo kwakooya kwalema ikurambikya kwawo.

²²Nruminy yeyo mmbo shileorwa shaasa vaka va Yuda va kimangyi shaasa vasherambikyoo vasikari vasongoru va Babilony. Arannya shaasa vaamba elyi veefo veshendaa: ‘Ngyama ta mangyi atikundye tilellemba, vakamweeveta. Ulaalu marende akwe antambya ibwashiny. Na vambuya vakwe vakanra.’”

²³Sheengera immbya, “Vaka vafo woose na vana mmbo vasherammbikyoo Vababeli na nta yewe nkushekuturushwaa-u-fo. Mangyi ya Babilony mmbo ashekukamaraa mfungwa, na muri yeu ukorwa uve ifu!”

²⁴Sedekia karouwa kaamba, “Kulasheevia nndu kya usaare elu lweru-fo. Muu wafo mmbukee nrengeny-fo.

²⁵Kwakooya vasongoru vamanya shanrera neewe, mmbo vashekwitikyaa kuvavie ekyo lwarera. Nawo vakuvikye kyaasa mmbakuwaa-fo kwammbavia fyoose.

²⁶Vakankuvesa vavie mmbo kwefo kweshitereva nambo shilakweere kifingyony kundefiiya-fo.”

²⁷Naasa vasongoru yewo vakasheya Yeremia wakambesa kavavia shaasa mangyi aleshivia shivavie. Nawo vakamalallya, kimmba kulore kweefo nndu alwaaranya kilya lweefo lureraa.

²⁸Nalyo sheengera ifingyo kulya kari kalya kutani nkonu Yerusalemu uletirwa.