Read BIBILLYA Mareiyo Meele a Iruva YEREMIA 40 Bible Online

YEREMIA 40 - BIBILLYA Mareiyo Meele a Iruva bible

YEREMIA 40

¹Irero lyesheya Yeremia lyuuka kwa Nndumi Iruva numa ya Nebuzaradany nniini wa vasikari imwiipoo uka Rama, llya emwiipoo emfingye na mise ya minya amwi na mifungwa ya Yerusalemu na Yuda yewo vekamarwa mifungwa fika Babilony.

²Nniini va vasikari keepoo Yeremia kammbia, “Nndumi Iruva, Iruva vafo nnyalesenda makasha kya ando yaandi;

³Nndumi Iruva nnyaletana shaasa eyamba atana. Kyimaruma mmulelyang'aa Nndumi Iruva nta kulare mulearannya unyanga lwakwe, nkyo kyeende mbony yei.

⁴Ulaalu lola, mmbo shaporommwa inu mise ya minya maakony afo. Kwakooya kukundaa yeenda neeny Babilony, osho, na yeny shishekufurukannyaa nisha; lyo kwakooya kulollya ni kyikasha lweende kyimwi Babilony, kulashe-fo. Lola, uruka loose ni mbee yafo lukai; enda ando koose kulollyaa ni kusha na ni kyisha yeenda.

⁵Kwakooya kusaa yaa, wuyaany kwa Gedalia mwana wa Ahikamu mwana wa Shafany, yeto mangyi ya Babilony alenniinga iva nshilyi wa miri ya Yuda, kwakaa nawe nnang'ani ya vandu; ao kweenda ando kulollye ni songosiny yeenda.” Kweekyo nniini ya vasikari kanninga shoonga ya kyisha-u na kyindo kya pya kanra neende.

⁶Indoony Yeremia keenda kwa Gedalia mwana wa Ahikamu yefo Mispa, kakaa nawe nnang'ani ya vandu yewo verewa efo urukeny.

⁷Elyi vaniini woose va vasikari va uruka lurambalalyi na vandu vawo veeta sheelyi mangyi ya Babilony aleniinga Gedalia mwana wa Ahikamu ushilyi lwa uruka na inrambikkya womi, vaka na vana yewo vakee ngwera vakailannya urukeny, yewo kulare valeipowa mifungwa ikamarwa Babilony,

⁸Vakeengya Gedalia kulya Mispa Ishmaeli mwana wa Netania, Yohanany mwana wa Karea, Seraya mwana wa Tanhumeti, vana va Efai Nnetofa, Yesania mwana wa Mmaaka, wo na vandu vawo.

⁹Gedalia mwana wa Ahikamu mwana wa Shafany kawalyiyya mboo wo na vandu vawo kaamba, “Mulaereye irundya Vakaldayo-fo. Keeny ni urukeny mukarundya mangyi ya Babilony, kyive kyippwa kyaany.

¹⁰Yeny mmbo shikaa yaa Mispa shimwiise na Vakaldayo yewo valusheyaa; lyo yeni sangyirieny mfinyu na ndunda ta kyeeri kya mwi na mafura, musurumyi nunguny tany, mukakaa yefo miriny yaany yeyo mwantira.”

¹¹Indo-da, elyi Vayuda woose yewo vekee Moabu na nnang'ani ya vana va Amon na yefo Edomu na yefo ngyurukeny tingyi valeita sheelyi Nebukadnesa mangyi ya Babilony alera sasari yefo urukeny lwa Yuda na aleniinga Gedalia mwana wa Ahikamu mwana wa Shafany nave nshilyi waawo.

¹²llyoony Vayuda woose vakawuya wooka wo ando werishisywa vakawuya urukeny lwa Yuda, kwa Gedalia alya Mispa; vakasangyirya mfinyu na ndunda ta kyeeri kya mwi shiingyi nnu.

¹³Ulaalu Yohanani mwana wa Karea na vaniini woose va vasikari va uruka urambalalyi vakasheya Gedalia alya Mispa

¹⁴Vakammbia, “A ndesa kwiishi sheelyi Baalisi mangyi ya Vaamony nnyaleruma Ishmaeli mwana wa Netania nashekuwaa?” Indi lyo Gedalia mwana wa Ahikamu nnyevatirya kyikusiryo-fo.

¹⁵Llyo Yohanani mwana wa Karea karera na Gedalia kyisurukumu yefo Mispa kammbia, “Shira shindewaa Ishmaeli mwana wa Netania nta nkwiifo nndu amanyaa-fo. A nkyikyi nakuwee, naambo Vayuda woose yewo vakusangyirie yaa kwafo vanyanyatwa na seseri ta Yuda varumake?”

¹⁶Indi Gedalia mwana wa Ahikamu vkavia Yohana mwana wa Karea, “Kulatane kyindo yekyo-fo, mashika yewe nkukeerera wongo kya Ishmaeli.”