Read BIBILLYA Mareiyo Meele a Iruva YEREMIA 42 Bible Online

YEREMIA 42 - BIBILLYA Mareiyo Meele a Iruva bible

YEREMIA 42

¹Llyo vasongoru woose va vasikari na Yohana mwana wa Karea na Asaria mwana wa Hoshaya na vandu woose uka n-du fika nniini,

²vesha kufii vakavia Yeremia nkisuku, “Lwakutereva, luterevvye kwa Nndumi Iruva, Iruva vafo kya sasari yeti toose (mashika lusaari vaangu deny ando a nkuka va vandu shaasa miso afo alulollye),

³Naambo Nndumi Iruva, Iruva wafo naloore shia lukwaani yeenda na kyindo kyikwaani lutani.”

⁴Yeremia nkisuku kavavia, “Yeny shammwiita, loleny, shindeterevaa Nndumi Iruva, Iruva waany shaasa mwatereva, na mbony shoose Nndumi Iruva ashirouwaa shishemuvia; yeny nshimusurumaa kyindo-fo.”

⁵Llyoony vakavia Yeremia, “Nndumi Iruva nawe nkureekyi wa dede na mwaarya kyeru kwakooya lulatanaa kyikwaani na marero moose Nndumi Iruva akurumaa kweru.

⁶Kyaaluke kyisha au kyikasha, yese llulatyaa unyanga lwa Nndumi Iruva, Iruva weeru yeto lukeekuruma kwakwe, naambo kyaaluke kyisha kyeru kwakooya lushiindyaa unyanga lwa Nndumi Iruva, Iruva weeru.”

⁷Masiyyony a mikonu ikumi irero lya Nndumi Iruva lyikasheya Yeremia.

⁸Llyoony kavaanga Yohana mwana wa Karea na vasongoru woose va vasikari yewo vekee nawe, na vandu woose uka n-du fika nniini kavavia,

⁹“Nndumi Iruva, Iruva wa Israeli yeto muleshiruma kwakwe shindemooshora kyany aamba:

¹⁰Kwakooya musaa urukeny yelu, lyo shishemuvangisaa nta nshimufofisaa-fo; Yeny nshimuvaaya nta nshimukurrwaa-fo; mashika shankurya kya makasha shilemutannya.

¹¹Mulaerieye mangyi ya Babilony yeto mukemweereya-fo; mulamwerieye-fo, ni Nndumi Iruva aamba, mashika shikee neeni shimukyire na imuuta wokony lwakwe.

¹²Yeny nshimulyillyaa naambo namulyillye namusaarise urukeny lwany muveni.

¹³Indi kwakooya mwaamba, ‘Llusaa urukeny yelu-fo,’ mukalema yiindya unyanga lwa Nndumi Iruva, Iruva vaany mukaamba,

¹⁴‘Woode, llusheenda urukeny lwa Misri, kundo lulalollyaa fir anta iita unyanga lwa maranda nta iita shaa ya nkate, na yese llukaa-fo,’

¹⁵llyoony arannyiny irero lya Nndumi Iruva, yeni sasari ta Yuda. Nndumi Iruva wa matorito, Iruva wa Israeli aamba ule: Kwakooya mwasumanisa fisangu fyany mwaange Misri mundekaa-fo,

¹⁶llyoony usu yelo mukeeluereya lushemuwoyaa yefo urukeny lwa Misri; na shaa yeyo mukeyeereya nnyimulatyaa kyuumu yefo Misri mushefiyya-fo.

¹⁷Vandu woose yewo vasumanisaa fisangu fyawo yeenda Misri vandekaa-fo mmbashewaawa ni usu, shaa na ndwari sheeresi; mbawonaa sasari nta mwiiturunya kya makasha shiveengye-fo.

¹⁸“Mashika Nndumi Iruva wa matorito, Iruva wa Israeli aamba: Shaasa ngoo na nyashi yakwa yepusuywa vekaa va Yerusalemu, ni indo nyashi yakwa mulettywaa elyi musheenda Misri. Mmushaalukaa iting'a, weeresi, kyidengo na kyiila.

¹⁹Mmulollya lyingi ando yaa-fo. Nndumi Iruva ammuvia yeni sasari ta Yuda, ‘Muleende Misri-fo.’

²⁰Manyiny na nshushwa sheelyi shammwiikyimba nkonu wa inu sheelyi mmuleteerya muu wany muveni. Mashika mmuleshiruma kwa Nndumi Iruva, Iruva waany mukaamba, ‘Luterevie kwa Nndumi Iruva, Iruva weeru, na mbony shoose Nndumi Iruva, Iruva weeru ashaamba luvie, neese llutanaa.’

²¹Na nkonu va inu shammuvia, indi mmweendya unyanga lwa Nndumi Iruva, Iruva waany kwa mbony nta imwi aleshiruma shimuvie-fo.

²²Ulaalu manyiny na nshushwa sheelyi mushewaawa ni usu, shaa na ndwari sheeresi yefo mulanngye indekaa.”