Read BIBILLYA Mareiyo Meele a Iruva YEREMIA 43 Bible Online

YEREMIA 43 - BIBILLYA Mareiyo Meele a Iruva bible

YEREMIA 43

¹Elyi Yeremia emaa irera na vandu woose marero moose a Nndumi Iruva, Iruva waao, yoo Nndumi Iruva, Iruva waao enruma kwawo,

²Asaria mwana wa Hoshaya na Yohana mwana wa Karea na vandu vambafu vakavia Yeremia, “Nkukeeyaamba wongo. Nndumi Iruva, Iruva weeru nnyalekuruma kushaamba sheelyi, ‘Muleende Misri mundekaafo-fo;’

³indi ni Baruku mwana wa Neria akwaaya kyilasha kyeru naambo lutirwa ni Vakaldayo naambo valuwae ao valukamare mifungwa fika Babilony.”

⁴Kweekyo Yohanani mwana wa Karea na vasongoru woose va vasikari na vandu woose vakalema yiindya unyanga lwa Nndumi Iruva, vasee urukeny lwa Yuda.

⁵Indi Yohanani na vasongoru woose va vasikari vakeepoo sasari toose ta Yuda yewo vemmbuya ishekaa urukeny lwa Yuda uka masangeny moose venrishisywa

⁶Womi, vaka, vana na vefu va mangyi na wo nndu yeto Nebusaradany nnini wa vasikari erambikkya Gedalia mwana wa Ahikamu, mwana wa Shafany; amwi na Yeremia nkisuku na Baruku mwana wa Neria.

⁷Vakasha fika uruka lwa Misri, kya elyi kulaore valeindya unyanga lwa Nndumi Iruva. Vakafika Tapanesi.

⁸Llyo irero lya Nndumi Iruva lyikasheya Yeremia kulya Tapanesi lyikaamba:

⁹Ipoo mawe maniini maakony afo, kwaasuruma uteriny-lwa-ikapa-matofali, asurumi yoo mwaangony wa mmba ya usuri ya Farao yefo Tapanesi

¹⁰vandu va Yuda veelollye, kwavavia, “Nndumi Iruva wa matorito, Iruva wa Israeli aamba ule: Loleny, nshikeevaanga na iipoo Nebukadnesa mangyi ya Babilony nrundi vakwa, nnyashaa navike kyitima kykwe uwe yam awe yaa shaasuruma, na asheala yeema lyakwe uwe ya vayo.

¹¹Nyashaa nalyamare uruka lwa Misri, na niinge ndwari sheeresi yewo vakwaani iwaawa ni ndwari sheeresi, neepoo mifungwa yewo vakwaani iipowa mifungwa, nawee na usu yewo vakwaani ifwa na usu.

¹²Nnyashaataa muro mmba ta maruva a Misri; nnyatikoraa na muro na iyeepoo mifungwa; nnyashiilyisaa uruka lwa Misri, sha mwiisi va findo fya ivikkya avivaa makuru.

¹³Nnyashefishaa ngo ta Heliopolisi tikee urukeny lwa Misri; na mmba ta maruva a Misri nataate muro.”