Read BIBILLYA Mareiyo Meele a Iruva YEREMIA 7 Bible Online

YEREMIA 7 - BIBILLYA Mareiyo Meele a Iruva bible

YEREMIA 7

¹Irero lyilesheya Yeremia lyuuka kwa Nndumi Iruva:

²salala ipoony mmba ya Nndumi Iruva, kwavambisya-u irero kwamba; Aranyiny irero lya Nndumi Iruva, yeni vandu woose va Yuda mwaanga ipoony elyi indeindya Nndumi Iruva.

³Nndumi Iruva wa matorito, Iruva wa Israeli, kurieny kya shia na mitannyi yaany shimuniinga ikaa yaa.

⁴Mulavike nsia marero yaa a ukunang'ari-fo; Yei ni mmba ya Nndumi, ni mmba ya Nndumi ni mmba ya Nndumi.

⁵“Kwakooya mwakurya kya dede na nshusshwa; kwakooya murumbuyaa kya usumanu muveni na muveni,

⁶kwakooya mulalyilyisaa veny, vana va ngwera, vaka va ding'u ao ipusswa samu ya nndu nsumanu yaa na mulalatya maruva engyi efo mmbeny tany.”

⁷Llyoony shimuraa mukee yaa, urukeny sheniinga vasauwe vany uka kasha.

⁸Loleny, mmbo mukusirye marero a ukunang'ari alashiidimaa imuwonisya kyindo.

⁹A mmbo mushiivaa, mmuvaa, mmutuusa na ituuswa, mmulyaa mboo ya ukunangari, mmukorya Baali ubani na ilatya maruva engyi kulaore mweeshi,

¹⁰na mushesalala mbee yakwa mmbeny yei ikeevaangwa na irina lyakwa, na yaamba, “llukeevakyire llukeevakyire! Yeengyera itana utefusu yelu”?

¹¹A mmba yei, ikeevaangwa kwa irina lyakwa, nyammaluka nndeshe wa vaala-shia misony any? Loleny yeny shimuni shallollya, ni Nndumi Iruva aamba, mmbo mukusarye mmba yakwa ni kwa vasoki kwa yoovya? Mmbo shilollye efyo mukeetana fyoose.

¹²Enda ulaalu ando akwa alya kweekee kulya shilo, ando mapookyony shivika irina lyakwa kwandella yekyo shilentannya kyeendwa ni uravi lwa vandu vakwa Israeli.

¹³Ulaalu, mwantana findo yefi fyoose, Nndumi Iruva aamba, neelyi sherera neeni lyingyi na lyingyi kulaore mweshaarannya, neelyi shemuvaanga kulaore mweerika,

¹⁴Kweekyo nshitannya mmba yei ivaangwa na irina lyakwa yeyo muvikkye nsia na ando shemuniinga yeni na vandu vany shaasa shiletannyaa Shilo.

¹⁵Neeny shimweere kwaasha shilamulollye, shaasa sheera vana va maaye vany, ngyeeri ya Efreemu.

¹⁶Lyo kyafo yewe, Nndumi Iruva kaamba, “Yeremia, kulasheterevya vandu yeva-fo, ao ivalookya, ao ivaterevya nta ishitereva shivalyillye, mashika nshikwarannya-fo.

¹⁷A nkulollye-se yekyo vakeetana efo muri va Yuda na Yerusaalemu?

¹⁸Vana vadu mmbasanaa ngwi, vande mmbaataa muro vaka vakaookya mikate nka-mangyi va nginii-u na iletya maruva engyi firaso fyeena, kya ishirosya ngoo.

¹⁹A ni yeny vakeshiuta usiro? Ni Nndumi Iruva avesa. A shivakuuta usiro na ikweengye sony wo veni?

²⁰Kweekyo Nndumi Iruva: Lola, ngoo na nyashi yakwa nnyipusuywa yaandi, nndu na ifisi, miri ya marema na ndunda ta uteri, nnyikoraa nta nnyirumywaa-fo.”

²¹Nndumi Iruva wa matorito, Iruva wa Israeli: “Engyerieny firaso fyany fya muro, lyeny miteera.

²²Mashika nkonu ulya shewoota urukeny lwa Misri nsherera na vandu vany ao ivavavasa kya firaso fya muro na firaso fya muu.

²³Indi lyo ivavaso elyi shevaniinga, ‘Inndyeny unyanga lwakwa na Yeny shivaa Iruva waany neeni muve vandu vakwa, latyeny shia toose shimoora kyive nndumwa kyany.’

²⁴Lyo mmbeindya nta iloota karwi, indi vakaruya makusaro awo na umbafu lwa mirima, vakawuya numa ando a yeenda mbee.

²⁵Uka nkonu ulya vande vany wooka urukeny lwa Misri fika inu, nshivarumyaa varundi vakwa kuleefo umando, nkonu kwi nkonu,

²⁶indi mmbaleshaaranya-fo ao iloota maarwi, lyo vakanangisa nriya, vakailannya vande vawo ilyamara.

²⁷“Indony, nkushevaviaa marero yaa moose, lyo mmbashekwarannyaa-fo, nkushevavaangaa lyo mmbashiirikaa-fo.

²⁸Na nkushevavyaa, ‘Yelyi llyo isanga lyilya kulare lyileindya unyanga lwa Nndumi Iruva, Iruva waawo, nta iitikya wiikyimbi, udede llulensama kaniny kyawo.’”

²⁹Uteny fii tany mukateera kwaasha; saamiseny kyiiyo uweny ya mafumbu, mashika yeny Nndumi Iruva shammulema Yeni muleteveta sharooywa ngoo.

³⁰“Kya elyi vasero va Yuda valeshitana fivishwa, ni Nndumi Iruva aamba; mmbaletana utefusu lwawommbeny ivaangwa na irina lwakwa iitefusa.

³¹Na valetana ando a uwe kulya Tofeti yefo ulaleny lwa mwana wa Inomu irasya vana vawo va vomi na vakyika; kulaore shilemmbavavasya nta ikusara.

³²Kweekyo, loleny, mikonu ikeesha ni Nndumi Iruva aamba, ulakivaangwa Tofeti nta ulale lwa Inomu lyo kuvaangwa ulale lwa ishishya: mashika mmbasherikaa yefo Tofeti, elyi kuleefo ando engyi a irika.

³³Na minying'a ya vandu yeva ishevaa shoonga ta ndeye ta nginii-u na mafisi a ngoroshony; nta kulakaa-fo mwiiyanta.

³⁴Llyo nshemandisa seko yefo miriny ya Yuda, shieny ta Yerusalemu, unyanga lwa ifura, unyanga lwa nsero aalyika na lwa mwana mfu aalyikwa; mashika uruka llushaaluka sama.”