Read BIBILLYA Mareiyo Meele a Iruva YEREMIA 8 Bible Online

YEREMIA 8 - BIBILLYA Mareiyo Meele a Iruva bible

YEREMIA 8

¹Nndumi Iruva mmbo aamba, “Kyeeri ekyo vashelukkwa maffwa a vamangyi va Yuda, vasongoru vakwe, maffwa a vaawuya fisuku na maffwa a vandu woose va Yerusalemu, ooka efo fifuny fyawo;

²nang'u asheaalalwa paa usanguny lwa mwi, mwiiri na itorito lya iruvee-u lyoose ndesa venyikunndye na iwafurukannya yefo kundo vesheenda na ivesa-fo mbony tawo, alasangirywa nta irikwa lyingyi, mmbo ashevaa sha kirashi uwe ya usangu lwa uruka.

³Vandu mmbo vashelanga ifwa ngota ikaa na muu, neewo vashesaa efo ngyeeri yei sheesi, na kulya koose shilewaumbuta, ni Nndumi Iruva wa matorito aamba indo.”

⁴Mmbo kushevavia, Ndumi Iruva aamba indi; “A ndesa vandu vakammbwa mmbo valakisalala lyingyi? Ao nndu kammiinduka keenda kyakwe akyiwuya-se lyingyi?

⁵Mmbo kyavaany inda vandu yeva vankape mungo valakyiindya lyingyi? Vakakunanavya na ulembi, vakalema yiinduka?

⁶Nshilearannya na isoongya, indi-lyo nkwiifo akeerera kya usumanu-fo, nta nkwiifo nndu akeekurya eshaamba, ‘Nkyokyi shiletana?’ Wo nndu kawiiya mitannyi yakwe, sha frasi ikeerishya fireny.

⁷Naakwa ni ndeye ta ngini-u ta wo ngata, mmbo tiishi freeri fyavayo; efyo fikee fideesye fya yeenda na iwuya. Indi vandu vakwa mmbeeshi mavavaso a Nndumi Iruva-fo.”

⁸“Mmbo kushiindima yaamba inda; ‘Llutiri urango na mavavaso a Nndumi Iruva? Indi lola, ni yewo veni kalamu, valeamba vakareiya wongo.

⁹Vandu varango mmbo vashesutwa, vashesokwa wiidimi na itirwa, nnyelyi valelema irero lya Nndumi Iruva; urango vatiri nnang'ani yaawo llo-kyi?

¹⁰Kweekyo mmbo nsheniingya vaka vawo vandu vengyi, na marema awo mmbo nsheniingyaa yewo vashevashilyaa, wo umwi mmbo akeekapa mbusha ya ulembi kupookya n-ndu kundefika ulya nniini, kupookya nkisuku kundefikya nkohani wo umwi mitannyi yaawo nnya ulembi.

¹¹Mmbo vakeevavara fyaasha fya vandu vakwa uwe-uwe, veshaamba unapwe, unapwe, nta kuleefo unapwe.

¹²A ndesa nta valesuka llya valetana ulyamari? Oonde, mmbalesuka nta mmbalelollya sony-fo. Kweekyo mmbo vashewaa nnang'ani ya yewo vawooye, kyeeri shivarikya ngapo mmbo vashetuulwa, ni Nndumi Iruva aamba

¹³Nndumi Iruva mmbo shaamba: elyi shishevasangirya, nkushivaa-fo ndunda efo nsabibuny-fo, nta tini efo miriny ya-vayo-fo; naakwa ni maramba a vayo mmbo ashuuma, na wo kindo shivaniingye mmbo fishemamikaa.’

¹⁴“Nkyikyi elyi lwaising'ang'a? Kummbyeny ando amwi, nndeny lwaange yefo miriny ya turuve, lundemamikya-fo, mashika Nndumi Iruva, Iruva weeru alurikkya ngapo, kaluniinga mura utiri usavi luuni, mashika elyi lulelyamarya Nndumi Iruva.

¹⁵Lukaruuya unapwe, indi lulawone mesha, lukaruuya kyeeri kya ishiiswa, indi weeresi lukaengereka.

¹⁶Ntiri wa frasi tawo ukaitiwa kuuka Dani; unyanga lwa vayo lukareremisa ulana loose; Tikasha ilyamara uruka na findo fiifo fyoose; muri na ewo woose veefo.

¹⁷Loleny, nnang'ani yaany shikemurikya shoka, shoka shinyaasi mulashiidima itisiika, nato tishemumaara.” Ni Nndumi Iruva aamba

¹⁸Nrima wakwa mmbo ukeevavywa shalemwa ikuviirya muu.

¹⁹Arannya, kyiiyo kya mfu wa vandu vakwa kikeyuuka taari ya uruka lwa kwaasha, “A ndesa Nndumi Iruva nnyakee efo Sioni? Mangyi wakwe nnyakee nnang'ani yakwe?” “Nkyikyiiny elyi vashirosya ngoo a mafwanu awo na maruva alaishiwa?

²⁰Mailullyony a fimu ammisya, kyeeri kya nsaka nrike kyammanda, Nta llulewonisa ukiro-fo.”

²¹Kimaruma kya fyaasha fya vandu vakwa, nrima wakwa mmbo ukeenrovye ni mavavywo, mmbo shikenrovye shalemwa deny.

²²A ndesa kwiifo-se nri wa ishiisa efo Giliadi? A efo mmbo kulaifo mmbavari? Mmbo kyavaany inda vandu vakwa valakeeshiiswa?