Read BIBILLYA Mareiyo Meele a Iruva FIIYO 3 Bible Online

FIIYO 3 - BIBILLYA Mareiyo Meele a Iruva bible

FIIYO 3

¹Yeny mmbwe shiishi kimaruma nkyikyi elyi shikeewonisa ngapo yeti tuuka kwa Iruva;

²Kashoolota si, si nnu deny shooloka ireeminy yuu

³Kashikapa keengyi na keengyi kuleefo isarya.

⁴Mmbo aleshishisha kashira-u indo na mafua akwa kafisha-fisha

⁵Kashivika kifingyony kya ukiva na mavina.

⁶Kashivika ireeminy lya ufu lyilasembeyaa nta.

⁷Kashifinga na mise ya minya shava mfungwa nalavikye nsia wa yaawuka.

⁸Shaffwa na unyanga waasha, lyo Iruva kalema fushu yaaranya.

⁹Kashinga shia yakwa na mawe, kashivikyaa isimamba taari toose shilaire.

¹⁰Kashivereya sha ngare, kashifisha-fisha sha miiso,

¹¹Kashirishia efo shia, kashirandwa-randwa, kashira-u.

¹²Keepoo ura lwakwe kashaasa na mife yakwe.

¹³Mife yakwe ikaanga deny mwiiliny wakwa.

¹⁴Vandu vakashiseka nkonu piti, kwawo shava kindo kyeeseta.

¹⁵Ngatara shiroo tikava nnyo shoonga na kyeena ashiniinga.

¹⁶Kisangu kyakwa kasinga nakyo efo si na mayoo akwa kafisha-fisha

¹⁷Mmbo shilenrekyo ifura na ufoo nkyokyi, na finya ya mwiili.

¹⁸Nta nshikiiyo kavii-fo, nshikivikye Nndumi Iruva nsia-fo.

¹⁹Mavavyo akwa, itura kirembo, efi ni nri uvavaa, uwaa.

²⁰Mmbo nkeekusara nnu deny na nrima wakwa ukafwa

²¹Lyo ivika nsia lyakwa lyikawuya kyeeri shakumbwa ekyi:

²²Ikunda lya Nndumi Iruva lyilasiaa na ilyillya lyakwe lyiifo-da.

²³Mmbo lyikee yiiya sha ngama, lyikavaka nkyeere lyilakyeywaa nta.

²⁴Nndumi Iruva wakwa mmbwe fyoose shitiri, nkyo mmbo shinkusirye we.

²⁵Nndumi Iruva mmbo akee nsaari kwa woose vankusirye.

²⁶Kisha mmwasi kweru ni immbera na usisiryo naambo nalukire.

²⁷Lukuloshe usisiryo elyi lukee vakoo.

²⁸Lwiivavyoo lumalallye sau lwimberaa.

²⁹Lukunyiise neevika nsia, mashika mwaanya wekia wiifo.

³⁰Na kyikava lulekapwa lukavira, nkuti luwarye fyoose indo

³¹Nndumi Iruva mmwiilyillya, nnyashelulemaa llung'anu-fo.

³²Ashidimaa ilweengye makiva, lyo ukundi lwakwe llwa dede luvangye deny.

³³Nta nyafuraa neelyi lwawona ngatara na mavavyo-fo.

³⁴Nndumi Iruva eeshi shaasa lwafwa nrima meendi lukee kifingyony.

³⁵Kavemanya na kyeeri lwasokwa usumanu llwa aleluniinga

³⁶Kyeeri usumanu lwarevetwa efo makwaanuny, eeshi-da.

³⁷Kilya Nndumi Iruva akundye nkyo kitanyikaa.

³⁸Fisha na fikasha mmbwe afiniinga mumu.

³⁹A niindaany lukunung'unaa kyeeri lwakapwa kya ulyamari lweru?

⁴⁰Lusununnde meengye yeeru lwalashike luwuiye Nndumi Iruva.

⁴¹Luruye mirima yeeru Iruva lutereve indi.

⁴²Mmbo lulekura lukakulyamarya, neewe Nndumi Iruva kulelusarya-fo.

⁴³Kwalusya kwalumamita, ilyillya lyafo lyikasikyo ni unyafi lwafo.

⁴⁴Fiterewo fyeru mfileidima iira unyaasi lwafo-fo mbee.

⁴⁵Mmbo kulelwaallwa lukava sha kirashi yaa ulaniny.

⁴⁶Vakiduva veru vakaluseka neelumina.

⁴⁷Lukeewa urumatony na rengeny, lukakaa usauny na weereyiny.

⁴⁸Miso akwa akapusuka mira ya misoru, elyi vandu wakwa vakeemamika

⁴⁹“Misoru yakwa mmbo isheeka usoka lulamandaa

⁵⁰Kutani elyo Nndumi Iruva ashelwaamaiyaa ooka iruveeu nalulole.

⁵¹Ngoo yakwa yarovyo nnu kyeeri shalola filya filekooya vaka va muri weru.

⁵²Mmbo shiletirwa ni nsoori wa vakiduva, valatiri kimaruma kyeelusua

⁵³Mmbo valesheerya irininy vakashilyikya-fo veevikaa iwe yoo uwe.

⁵⁴Mura ukashiraya-fo, shalollya dede ufu lukee neeny.

⁵⁵“Shikee kulya irininy si, woi Nndumi Iruva shilekufuuya,

⁵⁶Na llya shilekutereva kushaaranyi, kweeta,

⁵⁷Kwashirouwa kwashivia shilairyae-fo

⁵⁸Kwashisheya Nndumi Iruva kwashikira.

⁵⁹Shyaanduya kya ishilyillya, elyi kwiishi uravi elo shiletanywa.

⁶⁰Kwiishi shaasa vakiduva vakwa vashisuuye, na shaasa valeshiringitya.

⁶¹“Kuleeta shaasa valeshaarara, woi Nndumi Iruva kwamanya na mitambo yaawo.

⁶²Wo nkonu mmbo vashisenda veesongosya misoori yaawo.

⁶³Pookya ngama fika nkwaany mmbo vashiteenda.

⁶⁴Woi Nndumi Iruva vakapeeny dwa kimaruma kya efyo valetana.

⁶⁵Vadenge Nndumi Iruva naambo vafwe nrima deny.

⁶⁶Valeveye kuvamaa vauke yaa ulaniny deny!”