Read BIBILLYA Mareiyo Meele a Iruva ESEKIELI 1 Bible Online

ESEKIELI 1 - BIBILLYA Mareiyo Meele a Iruva bible

ESEKIELI 1

¹Nkonu karaanu, mwiiri wa kaana, mwaaka wa makumi araru, shaasa sheekee nnang'ani ya vasamiro yoo mbai ya mura wa Kebari ngyina ikarwiika shalollya mooryaa kwa Iruva.

²Mwiiri karaanu wekee mwaaka wa karaanu uka mangyi Yehoyakini akamarwa ushingeny.

³Irero lya Nndumi Iruva lyesheya Esekeli nkohani, mwana wa Busi efo urukeny lwa Vakalidayo shikee mbai ya mura wa Kebari, sheeta Nndumi Iruva arera na yeny na finya yakwe ikashipaana.

⁴Llya sheepoo miso shalollya uraato uniini luuka na taari ya ndoo.

⁵Nnang'ani ya ifishi yelyo shalollya-fo findo fiifo na muu fivakye vandu.

⁶Wo umwi etiri fisangu fiinya wo umwi etiri maru aana.

⁷Marende awo yorokye, atiri mbungashu sha ta ngashe. Nato timikaa sha arera ikee shisanngye.

⁸Veetiri maako avakye a vandu, kwasi ya maru alya aana na fyoose fiina fyeetiri fisangu na maruu a vayo indi;

⁹maru a vayo ekupaanye wo lyimwi na lyingyi; fikeenda mbe na woorotu kulaore fyaaluka fiisheenda.

¹⁰Vakatira fisangu fiina kilasha wo umwi. Taari ya mbee, ikatira kisangu kya nndu wo umwi, woko usha kisangu kya miiso wo umwi, woko umuso kisangu kya ngoleta wo umi, na taari ya numa kukava-fo kisangu kya ngoru wo umi.

¹¹Ni indo fisangu fyawo fyekai. Na maru a vayo elambarywa efo uwe. Maru avii a wo kimwi, akoorowa akakupaana, na alya avii engyi akasikkya yuumba.

¹²Wo umwi keenda mbee na woorotu, wo ando mumuyo wekunda yeenda; kuleefo yiinduka.

¹³Nnang'ani ya fyuumbe yefyo fitiri muu, kukalollyo-u kindo kivakye makaa akeyaaka muro, muro ulya ukamika yeenda uwe na yooloka-si nnang'ani ya fyuumbe filya fitiri muu; imika lya muro ulya lyekee iniini na murony ulya kukooka-fo fimwii.

¹⁴Fyuumbe filya fitiri muu fikarisha yeenda na iwuya, sheelyi kimwii kyamika.

¹⁵Naasa shiilolaa fyuumbe filya fitiri muu shalollya fireto fipaannye sumbai kufii na fyuumbe filya fitiri muu taari toose iinya, kyireto kyimwi wo taari.

¹⁶Ilollywa na misongosye ya fireto yefyo, mmbo ikuvakkye na fwana ya vayo ikavaka Sabarakyadi, na fyoose fiina misongosye ya waywo ikawa sheelyi ni kireto nnang'ani ya kireto kyingyi.

¹⁷Kyeeri kya ipirimika mmbo fyekepirimika taari toose yiinya kuleefo yiinduka.

¹⁸Fireto efyo fiina fyeetiri milyinga; milyinga ya fireto yefyo mmbo yeishwe miso koose na minya shisiise toorokye.

¹⁹Kyeeri fyuumbe filya fitiri muu fyekeyeenda, na fireto fikeenda nafyo mapaleny taari toose yiinya, na kyeeri fyuumbe filya fitiri muu fyerwa na uwe na fireto nafyo fikarwa na uwe.

²⁰Wo ando mumuyo wekeenda na fireto nafyo mmbo fyekeevalatya, mashika mimuyo ya fyuumbe filya fitiri muu mmbo yekee kulya firetony filya.

²¹Kyeeri fyuumbe filya fitiri muu, fyekeyeenda, na fireto nafyo fikeenda, fikisalala na fireto nafyo fikasalala kyeeri filekwipoo fyuuka sumbai; fireto nafyo fikakwiipo kimwi shafyo. Mashika mimuyo ya fyuumbe filya fitiri muu mmbo yekee kulya firetony filya.

²²Uwe ya mirwe ya fyuumbe filya fitiri muu mmbo kweiyo kindo kivakye ngyina kivaramaa sha kilola kikwaallye uwe ya mirwe yaawo.

²³Kwasi ya ngyina yeyo fikaorwa maru shumu alekulola, engyi avii fikasikya nang'u miili yaawo.

²⁴Kyeeri fyekeyeenda, sheeta unyanga lwa maru a vayo; unyanga sha lwa mura mwiingyi ukeyoona, ikavaka unyanga lwa iruruma lya Nndumi Iruva, unyanga lwawo lukavaka kyoorongye kya itorito iniini, na kyeeri lyesalala ando amwi fikalema maru a vayo.

²⁵Sheeta-se unyanga luuka uwe kulya ngyineny ilya ikee uwe ya mirwe yaawo amwi fikalema maru.

²⁶Uwe ya ngyina yeyo shalollya-u kindo sha kitima kya umangyi, kitiri fwana ya Yakuti, Samawi. Na uwe ya vayo kikakaywa ni kindo kitiri yuumba sha lya nndu.

²⁷Taari yalla uwe kisiny kya mwiili wa vayo ikamika sha arera, sha muro uringitye taari toose, na taari yei ingyi yalla si ya mwiilyi wa vayo ikavaka muro umikaa taari toose.

²⁸Sha ukova lwa ngyina kyeeri kya mmbwa mafishiny ni indo itumbe na usuri lwa Nndumi Iruva lyilelollyo. Shikilollya indo, shawa-si kifulufulu, nalyo sheeta unyanga lwa nndu akeerera.