Read BIBILLYA Mareiyo Meele a Iruva ESEKIELI 10 Bible Online

ESEKIELI 10 - BIBILLYA Mareiyo Meele a Iruva bible

ESEKIELI 10

¹Naasa shalollya sheelyi kulya nginii-u uwe ya mirwe ya fyuumbe filya fitiri maru kweifo kindo kivakye mawe amikaa a fwana ya Samawati na yuumba lya vayo lyikavaka kitima kya umangyi.

²Naasa kavia nndu ulya aree soori shimamiri. Enda nnang'ani ya fireto filya fikee sumbai ya fyuumbe filya fitiri maru, kwandeishura mayi afo makaa a muro yeto ukee nnang'ani yaawo kundeanyanyata yefo muriny.

³Shallolya ashendaa, fyuumbe filya fitiri maru mmbo fyeeselelyi taari ya kwasinde ya mmba, nndu ulya ekyaanga ifishi lyikaishura ndala shapu.

⁴Itumbe lya Nndumi Iruva lyikasaama uwe lyuuka kulya fyuumbeny filya fitiri maru lyikandefika alya kyeekony kya mmba yeyo, na ifishi llya lyikaishura mmba na kulya ndaleny mmbaramwo wa itumbe lya Nndumi Iruva ukaishwa-fo shapu.

⁵Unyanga lwa maru a fyuumbe filya fitiri maru lukaitiwa koose poo ya ndaleny, lukavaka unyanga lwa Nndumi Iruva wa matorito kyeeri areraa.

⁶Kyeeri Nndumi Iruva elevia nndu ulya eree soori shimamiri, eepoo muro yefo nnang'ani ya fireto filya fyekee kwasi ya fyuumbe filya fitiri maru nndu ulya mmbo eenda kandesalala mbai ya kireto kimwi ya filya fiina.

⁷Kyuumbe kyimwi kyikoorwa woko kyikeepoo muro ulya wekee nnang'ani ya fyuumbe filya fitiri maru, keepo kyenga kya wayo kauvika maakony a nndu ulya aree soori shimamiri, nawe ekyiwarya kasomuka.

⁸Kukalollywa kindo sha woko lwa nndu kwasi ya maru a fyuumbe filya.

⁹Mmbo shelola shalollya kweiyo fireto fiina, wo kireto kimwi mbai ya kyuumbe kitiri maru. Fireto yefyo mmbo fyekeemika-mika sha iwe lya Sabarakyadi.

¹⁰Fireto yefyo fyoose fiina mmbo fyekee fya ngata imwi, wo kireto kyikalollywa sheelyi mmbo kyikee nnang'ani ya kireto kyingyi.

¹¹Mmbo fyekeenda marama taari toose yiinya kuleefo yiinduka.

¹²Yuumba lya wo kyuumbe, mmbo lyeishwe miso taari toose; yefo mungo, yefo maako, maru awo na fireto fyoose.

¹³Mmbo shevywa sheelyi fireto filya mmbo fivaangwa, “Fireto firungukaa.”

¹⁴Wo kyuumbe mmbo kyetiri fisangu fiina: kisangu kimwi kyekee kya Kyerupi, kisangu kya kavii kyekee kya nndu, kya kararu kyekee kisangu kya miiso na kisangu kya kaana kyekee kya ngoru.

¹⁵Fyuumbe filya fitiri maru fikakwiipo na uwe. Yefi ni fyo fyuumbe filya fitiri muu shefilollya mbai ya mura wa Kepari.

¹⁶Kyeeri fyuumbe filya fyekeyeenda, fireto nafyo mmbo fyekeyeenda nafyo mapaleny, fyuumbe filya kyeeri vekeyoorwa maru awo naambo firwe na uwe fyuuka-si, fireto nfyerunguka-fo lyo fikakwiipo indo mapaleny.

¹⁷Kyeeri fyesalala, fireto nafyo fikasalala, kyeeri filerumbuka uwe fireto nafyo fikasaama amwi nafyo. Muu wa fyuumbe yefyo fiifo na muu mbwekee kulya firetony yefyo.

¹⁸Nalyo itumbe lya Nndumi Iruva lyikooka alya kyeekony kya mmba, ukandesalala uwe ya fyuumbe.

¹⁹Naasa fyuumbe filya vakaorwa maru fikarumbuka na uwe uka urukeny neeny shiilollye, na fireto filya firyani nawo mapaleny. Fikandesalala mwaangony wa taari ya ngama wa mmba ya Nndumi Iruva na itumbe lya Iruva lyikee uwe yaawo.

²⁰Yefyi mfyo fyuumbe fyilya fitiri muu shefilollya kwasi ya Iruva wa Israeli kufii na mureny ulya wa Kepari, llyo shemanya sheelyi ni fyuumbe fitiri maru.

²¹Wo kyimwi mmbo kyetiri fisangu fiina, maru aana na kwasi ya wo yaaru mmbo kweiyo kindo kivakye maako a nndu.

²²Mafurummyony shashemanya sheelyi fisangu yefyi ni filya shefilollya kulya mureny wa Kepari. Wo kyuumbe kyimwi mmbo kyekeyeenda na mbee kyiorokye shumu.