Read BIBILLYA Mareiyo Meele a Iruva ESEKIELI 11 Bible Online

ESEKIELI 11 - BIBILLYA Mareiyo Meele a Iruva bible

ESEKIELI 11

¹Mumuyo wa Iruva ukashiipoo na uwe, ukandeshifita alya mwaangony wa taari ya ngama wa mmba ya Nndumi Iruva. Alya mwaangony shalollya-u womi makumi avii na varaanu, nnang'ani yaawo eiyo Yaasania mwana wa Asuri na Pelatia mwana wa Benaya, vasongoru va vandu va Israeli.

²Nndumi Iruva kashivia, “Yewe mwana wa nndu, yewo mmbo vandu vakasha vakee kunu muriny yeu vafulutaa na yaalasha makusaro a vandu.

³Mmbo vakeyaamba, ‘Kyeeri kya itana mmba nkyalefika-fo. Muri ni kimwi sha nungu na yese ni nteera.’

⁴Kweekyo, waawuye fikisuku, waawuye yewe mwana wa nndu!”

⁵Naasa mumuyo wa Nndumi Iruva ukashiwoya, kashivia, “Via vandu, Nndumi Iruva mmbo aamba indi; Shammanya, yekyi nkyo mukekusara yeni Israeli. Mmbo shiishi mbony mukeekusara yefo miriminy yaany.

⁶Yeni mmbo muwayye vandu veengyi kunu muuriny yeu, na shia teyiira mukaishura-fo minyinga ya vandu.

⁷Kweekyo, yeny Nndumi Iruva shaamba indi: minying'a muwayye na iitula nnang'ani ya vayo ni nteera, na muri yeu ni nungu; yeni ni kuti muutwa nnang'ani ya vayo.

⁸Yeni mmbo mwereiye usu, na yeny nshisheende usu lumuwoye!

⁹Mmbo shimuuta kunu muriny yeu, shindemurambikkya maakony a vandu va masanga; neeny shishemuutya uvingo efo nnyanuny wa Israeli.

¹⁰Mmbo muwaawa ni usu, neeny shishemuutya uvingo kulya minyanuny ya vandu va Israeli. Yoo llyo mumanyaa yeny mmbwe Nndumi Iruva.

¹¹Muri wa Yerusalemu mmbushekivaa-se nungu yaany-fo, nta mmushevaa nteera nnang'ani yawayo-fo. Yeny mmbo nshemutyaa uvingo minyanuny ya vandu va Israeli.

¹²Neeni llyo mumanyaa sheelyi yeny mmbwe Nndumi Iruva, yeto mulelema yiindya mavavaso akwe nta ilatya uramba lwakwe, indi mukakunda ilatya na itana filya mwekeeivavasywa ni masanga engyi yoo mufiitani nawo.”

¹³Kyeeri shekyaawuya ukisuku, Pelatia mwana wa Benaya kafwa. Neeny shawa-si kifulufulu, shaffwa na unyanga uniini, shaamba, “Ale Nndumi Iruva, mmbo kumaa deny Vaisraeli yeva valesaa-fo?”

¹⁴Irero lya Iruva lyikashisheya lyishaamba;

¹⁵“Yewe mwana wa nndu, vana va mau, yee vana va mau, vana va ivee lyimwi, mmba shoose ya Israeli; woose deny, yewo mmbo vandu va Yerusalemu vakerera vakaamba, ‘Mmbo waleenda kwaasha nnu na Nndumi Iruva, mashika Nndumi Iruva mmbo llukeewaniinge uruka yelu kulu.’

¹⁶Kweekyo amba, Nndumi Iruva aamba indi:

¹⁷‘Shimusangyiryaa uka nnang'ani a vandu na imusaleesa uka ngyurukeny yefo munanakkye shimuniinge uruka lwa Israeli.’

¹⁸“Kyeeri vashewuyaau, mmbo vashoota-fo findo fitefusu na makasha engyi moose.

¹⁹Shishevaniinga nrima umwi shishevika-fo mumuyo mwiiya nnang'ani yaawo. Shishewoota ngoo ya iwe shishevaniinga nrima wa nyama.

²⁰naambo weedimi ilatya uramba lwakwa na yiinndya mavavaso akwa; vashevaa vandu vakwa na yeny shive Iruva waawo.

²¹Kyaindi valya vakunanavye na findo fitefusu na makasha awo, mmbo vashekooya ngapo tikwaani na mashora awo. Ni yeny Nndumi Iruva shaamba.”

²²Naasa fyuumbe filya fikaorrwa maru fikapooka irumbuka, amwi na fireto filya fyekee yefo mbai ya wavyo; itumbe lya Iruva wa Israeli lyekee uwe ya vavyo.

²³Naasa itumbe lya Nndumi Iruva lyikasaama uwe lyuuka nnang'ani ya muri ulya lyikandesalala ifumbuu taari ya ngama ya muri.

²⁴Naasa mumuyo wa Iruva ukashikurika fika urukeny lwa Vakaldayo, kwa vandu vakee usamirony. Naasa mumuyo yeto ukatarakana.

²⁵Neeny shavia valya woose vekee usamirony mbony toose Nndumi Iruva aleshoora.