Read BIBILLYA Mareiyo Meele a Iruva ESEKIELI 13 Bible Online

ESEKIELI 13 - BIBILLYA Mareiyo Meele a Iruva bible

ESEKIELI 13

¹Irero lya Nndumi Iruva lyikashisheya lyishaamba:

²“Yewe mwana wa nndu kyeemya vakisuku va Israeli yeva vashaamba mbony ta mirwe yaawo. Vavie vaarannye filya yeny Nndumi Iruva shikeyaamba.

³Yeny Nndumi, Iruva shaamba: Oshiny llwany vakisuku varung'ani yeni mukelatya makusaro any muveni na yefyo mulollye muveni!

⁴Vakisuku vany, yeni Vaisraeli ni kimwi sha maparwe akeraaraa yefo maremeny.

⁵Mmbaleenda iringa masimamba alewunduka nta mmbaletana masimamba maiyya naambo Vaisraeli vaidimi ikkya fira yeyo isheshaa nkonu yeto yeny Nndumi Iruva shamma ideesya-fo.

⁶Ilollya lyawo ni lya wongo weni, na ukisuku lwawo ni lwa ulembi weni. Mmbo vakeelemba sheelyi ni yeny Nndumi Iruva shavaruma, indi yeny nshalevaruma-fo; kya mmwasi mmbo vakevereya shiinutye yefyo vakeyaamba.

⁷Ulaalu shamuvesa: A ndesa, mbony yeto mukeyaamba na ukisuku lwany nshi-ulembi weni? Yeni mukeeyaamba, ni kwa irina lyakwa mukeyaamba mbony yeti, neeny shilanderera neeni tusu?”

⁸Naasa yeny Nndumi Iruva shaamba indi: “Kimmba marero any ni a ulembi na fisuku fyany ni fya wongo, yeny ni kilasha kyany. Ni yeny Nndumi Iruva shaamba.

⁹Mmbo nshoorrwa woko lwakwa uwe yaany yeni vakisuku mukeyaamba wongo na yaawuya fisuku fya ilemba vandu. Kyeeri vandu vakwa vakwaanannya irummbwa shila, yeni mmukooywau-fo. Nta mmuvikwaa yefo urambeny lwa vandu va mmba ya Israeli-fo, nta mmushaanga yefo urukeny lwa Israeli-fo; llyo mumanyaa sha elyi yeny mmbwe Nndumi Iruva.

¹⁰Vakisuku yewo vakeereta vandu vakwa veshaamba, ‘Ni urilalyi,’ nta kuleefo urilalyi. Vandu vakwa vakatana isimamba lyilavaa, nawo vakalwaamba yeela!

¹¹Ulaalu vieny vakisuku yewo vakeeyaamba yeela isimamba yelyo sheelyi mmbo ishaa mmbwa niini ya mawe na uraato lwa iruruma na isimamba yelyo lyiwunduke.

¹²A elyi isimamba lyiwundukyaa, vandu mmbavesaa: ‘A yeela ilya valeamba-fo nkwi lyikai?’”

¹³Kweekyo yeny Nndumi Iruva shaamba: “Kweenyafukwa lyakwa mmbo nshantaa uraato lwa iruruma na mmbwa niini ya mawe, nafyo fyiwunndwe isimamba yelyo.

¹⁴Mmbo shilyiwunduya kwaasha isimamba yelyo mulelyaamba yeela na nsuka wa vayo usee-u mbereto. Isimamba elyo lyikawunduka mmbo lyimusaasa sumbai yavayo. Llyo meendi mumanyaa sheelyi yeny mmbwe Nndumi Iruva.

¹⁵Nyashi yakwa shoose mmbo nsheyavyaa uwe ya isimamba yelyo na uwe ya yewo valeamba yeela. Neeni llyo muvywaa: Isimamba lliyo lyingyi-fo nta neewo valelwaamba yeela mmbaiyo-fo.

¹⁶Mafurumyony a vakisuku va Israeli yewo valeamba mesha kya Yerusalemu na ilollya urilalyi nta kuleefo urilalyi. Ni yeny Nndumi Iruva shaamba.”

¹⁷Ulaalu, yewe mwana wa nndu, indukkya vaka va isanga lyafo, yewo vakeeyaawuya ukisuku lwa yefyo vakusarye veni. Rera kya ukisuku lwawo,

¹⁸naasa kuvavie sheelyi Nndumi Iruva aamba indi; Oshiny lwany yeni vaka mukeefuma pangilyi ta irisi ta irawa yefo maako a wo nndu, na isongosya shela titiri irisi ta wo ngata ya uravi tirawaa mmbandu. A yelyi mukeeruuya muu wa vandu vakwa, mmbo mukusarye iturunya muu wa vengyi na mbusha?

¹⁹Mwanshiila mbee ya vandu vakwa, naambo mukooye iningwa woyi lwa nswa wa nganu na shoonga shidu. Mmbo mukeewaa vandu valakwaani ifwa, mukara-fo valya vakwaani iwaawa, kimaruma kya wongo lwany mukeyoongoya vandu vakwa, nawo vakamwiirikya.

²⁰Ulaalu, yeny Nndumi Iruva shaamba: “Mmbo shimusokaa marisi yoo any mufingye nayo vandu, shiafishefishe ooke yefo maakony any vandu vakwa vave valeke veende sha ndeye.

²¹Mmbo shiranndwa shela tany shimusoke vandu vakwa maakony any; mulakyikaa muvalollye lyingyi maakony any. Llyo mumanyaa sheelyi yeny mmbwe Nndumi Iruva.

²²Kimmba mwammbafisha nrima vandu vasaari kweyaamba wongo, nta kulaore yeny shilemmbafisha nrima, mukarumisha veetana makasha naambo valare itana makasha vakire muu wawo,

²³naasa, yeni mmukaa mulollye lyingyi ukisuku lwa ulembi-fo. Mmbo shirurushwaa vandu vakwa maakony any. Llyo mumanyaa sheelyi yeny mmbwe Nndumi Iruva.”