Read BIBILLYA Mareiyo Meele a Iruva ESEKIELI 20 Bible Online

ESEKIELI 20 - BIBILLYA Mareiyo Meele a Iruva bible

ESEKIELI 20

¹Kwikee mwaaka wa mfungare, mwiiri wa karaanu nkonu ikumi, mmbo vesha kwakwa vamiku vasongoru va Israeli ishevesa mbony ta Nndumi Iruva.

²Nalyo irero lya Nndumi Iruva lyikashisheya lyishambaa:

³“Yewe mwana wa nndu, rera na vasongoru va Israeli; kuvavie, Nndumi Iruva aamba indi; A! Mmbo mwasha ishevesa mbony? Ni kya dede yeni mmukaa mushivese mbony-fo, ni yeny Nndumi Iruva shaamba.

⁴“A mmbo kushevaletaa, yewe vandu ewa? Kyasya waleteeny vavie vamanyi ulyamari lwa vande vawo.

⁵Nndumi Iruva aamba indi: Nkonu ulya shesauwa Israeli mmbo shevikyana kyaasa nawe, mmbo shekoora kwawo kulya Misri shavalyiya mboo shavavia: Yeny mmbwe Nndumi Iruva, Iruva waany.

⁶Nkyo kyeeri kilya shevavikya kyaasa indewoota kulya Misri shindevatetera fika urukeny lulya shemmbasauya, uruka lusha, uviiri lukailannya ngyuruka tingyi toose, lusheekaa ukyi na malela, uruka lwa itumbe lyoose.

⁷Nalyo shavavia lakaneny na yefyo fishemweengye nsindara mwishefiindya, wo umwi waany alakani nafyo, mulashekutefusa na maruva a wongo a Misri. Ni yeny Nndumi Iruva, Iruva waany.

⁸“Indi vakashitatala na ishiila valakunde ishiarannya; valakunde iserya-fo filya filasennyi mbee ya miso akwa, nta ilakana na mafwanu a maruva a wongo a yefo Misri. “Naasa shakunda ivaletya ngapo nnang'ani yaawo yefyo urukeny lwa Misri kyimaruma kya mitannyi yaawo yeyo mikasha usanguny lwakwa.

⁹Indi mmbo shiletana indo kya yiindya irina lyakwa lyilatefuswa yefo nnang'ani a masanga kundo vakai; kundo veshilollya kyeeri kilya shendewoota kulya urukeny lwa Misri.

¹⁰Kweekyo shawoota kulya urukeny lwa Misri shaveende kasa koomu.

¹¹Naasa shavaniinga mikaaye na mirumbuye yakwa yeyo vashekooya ilatya kyeeri yekyo vekee yefo.

¹²Na mmwasi shavaniinga na mikonu yakwa ya myiindye nnang'ani yaawo naambo wamannyisywa yeny mmbwe Nndumi Iruva shivasawuye.

¹³“Lyo mmba ya Israeli ikashimina kulya kasa koomu; valakunde ilatya mikaaye na mirumbuye yakwa yeyo vakwaani valatye naambo vakkye, vakalema na ifusa miindye yakwa; llyo shekusara, ‘Ivolotya ngapo yakwa nnang'ani yaawo kulya kasa koomu naambo shivamamite.

¹⁴Indi mmbo shiletana indo kya yiinndya irina lyakwa lyilatefuswa yefo nnang'ani a masanga vakai, kundo veshilollya kyeeri kilya shewoondwa.

¹⁵Naakwa nnyendo, mmbo shevalyisya mboo kulya kasa kweni, sheelyi nshikyiveende-se kulya urukeny llwa shemmbaniinga-fo, uruka lwiishwe wukyi na malla uruka usha lukailannya ngyuruka toose.’

¹⁶Ni kyiila kyawo kyevengye shavatannya indo, vakyilema yiinndya mavavaso akwa, vakatefusa myiindye yakwa na mirima yaawo kyimaruma kya ilatya maruva a wongo.

¹⁷Indil yo shavalola na miso elilya nta shilavakape na ivamamitya yefo kasa koomu.

¹⁸“Naasa sheekimba vana vawo kulya kasa koomu shavavia: ‘Vakwiise-nnu, valasheetira ngaa na mikaaye mikasha ya vande vawo ya utefusu na yiindya maruva a wongo.

¹⁹yeny mmbwe Nndumi Iruva, Iruva waany: Latyeeny uramba lwakwa, mukwiise na ilatya mavavaso akwa.

²⁰Iireny na yiinndya myiindye yakwa myeele kyive ni kiring'isyo nnang'ani yakwa na yeni, naambo mwiidimi imanya sheelyi yeny Nndumi Iruva mmbwe Iruva waany.’

²¹“Indi vana yewo vakalyang'aa, vakalema ilatya uramba na mavavaso akwa, nta valakunde imanya na ikulosha mikaaye yakwa, yeyo nndu ailatyaa mmbo akyiraa muu; vakatefusa mikonu yakwa ya mwiindye. Naasa shakusara ivapusuya ngapo nniini yefo kasa kimaruma kya irooywa ni ngoo.

²²Indi shatiiyya, kya yiindya irina lyakwa lyilashetatalwa ni vandu valya veshilollya shiwoota nnang'ani yaawo.

²³Naakwa nnyendo, mmbo shevalyiisya mboo kulya kasa koomu kweni, sheelyi mmbo nshevanyanyatya yefo masangeny na nnang'ani a ngyuruka shive na shive.

²⁴Kimaruma kya ilema yiinndya uramba na mavavaso akwa vakeela miinndye yakwa, vakeendya mafwanu a vamiku vawo.

²⁵“Kya mmwasi shavaniinga uramba valatyaa luryani na ngapo valatyaa valashiidima ikkya.

²⁶Shavareeya vakutefuse na mbora yaawo veni kya irasya mafwanu a maruva a wongo vana va mbee. Shavatannya indo ngapo ivavaa naambo vamanyi sheelyi yeny, mmbwe Nndumi Iruva.

²⁷Kweekyo yewe mwana wa nndu, rera na va mmba ya Israeli kuvavie, Nndumi Iruva aamba: Yekyi mwatana nkyo vande vany veshitannya, itana fya utefusu.

²⁸Mashika llya shemevata kulya urukeny llwa shemmbadeerya kyaasa kyevaniinga wo ando velollya kyidooro kyaasha, ao nri utiri maramba meengyi mfo kundo vendeutya firaso na fyaanu, yoo nng'u varosya nrungo na ileta firaso fyaawo fyeena.

²⁹(Shavavesa, ando yoo mweendaa kyidoorony mmbo kwavaangwa inda? Mmbo kuvaangwaa Bama fika nkonu wa inu)

³⁰Naasa via mmba ya Israeli, Nndumi Iruva mmbo amuvesa indi: A mmbo mukwaaruvaa yefo utefusuny yelo lwa vande vaany na yaanga utuusiny mwiilatyaa kiila kyawo?

³¹Kyeeri mwiifo mwiyuutyaa firaso fya pya, na irasya vana vaany murony mmbo mwiifo mwikwaaruvaa na marumu any moose fika inu. Yeni mushivesaa kyindo, yeni va mmba ya Isaeli? Shakuvia yeny shiifo na muu, Nndumi Iruva, shiveswaa irero ni yeni-fo.

³²Yefyo mukusarye nfikaa fyuutike-fo ikusaro lya yaaluka sha masanga sha fyasaka fya ngyuruka, na yiinndya miri na mawe.”

³³“Shakulyiisya mboo, yeny Nndumi Iruva, mmbo shishoorwaa woko lwakwa lutiri finya uwe yaany shimoolotye ngapo ing'ani neeny shisheva mangyi yaany;

³⁴yeny mmbwe shishemuuta yefo nnang'ani a masanga, na imusangirya uka yefo ngyurukeny yeto kundo munyanyakye, kwa ngapo ya woko lwakwa loorwe lutiri finya.

³⁵Shishemufita kulya kasa koomu ka masanga moose, mfo kundo ndeletaa mwaandu shisumany neeny kisangu kwa kisangu.

³⁶Ngata ilya sheni shewootya uvingo vande vany kulya kasa koomu ka uruka lwa Misri, mfo nshekooya irera na yeni, niindo Nndumi Iruva aamba.

³⁷Mmbo shishemuvikya ntaato mwiire mwisheekyenwaa.

³⁸Mmbo mushetauwa nnang'ani yaany veesi na valya veshilyamarya shiwoote urukeny yelo vammbarya, lyo valashaangaa urukeny lwa Israeli tusu. Indi llyo mumanyaa sheelyi yeny ni Nndumi Iruva.”

³⁹Kya mbony tany Nndumi Iruva mmbo aamba: “Yeni, va mmba ya Israeli; endeny mukanderunndya mafwanu any, wo umwi waany, ulaalu na fyeeri fishaa numa, kwakooya mulakunndye ishaarannya; lyo irina lyakwa yeele mmukaa mulyitefuse lyingyi-fo na firaso na mafwanu any-fo.

⁴⁰Mashika yefo ifumbuny lyakwa yeele, ifumbu yaasha nnu lya Israeli, mfo kundo musheshirunndyaa yeni moose va mmba ya Israeli; ni Nndumi Iruva aamba na woose va urukeny llwa, llyo shishemusaryaa neeni musheniingya firaso na fimu fyany, musheniingya fyaanu fya findo fyany fya mmba fya mbee, amwi na findo fyany fyeele fyoose.

⁴¹Shishemuwarya sha nrungo nsha usennyi, kyeeri shishemuuta nnang'ani a masanga, kulya mwenyanyakye shisheora itumbe lyakwa mbee ya usangu lwa masanga moose.

⁴²Llyo mumanyaa sheelyi yeny mmbwe Nndumi Iruva; kyeeri shishemufitaa urukeny lwa Israeli, uruka shellya mboo nniinga vande vany.

⁴³Yefo llyo mushekummbwa shia tany na mitannyi ya utefusu lwany. Mushekurya deny na yaalashika mbee ya usangu lwany muveni, kimaruma kya makasha any moose mutannyi.

⁴⁴Yeni llyo mushemanyaa sheelyi yeny ni Nndumi Iruva yelyi shisherundaa amwi na yeni, nshi kyimaruma kya irina lyakwa nshi kyikwaani na shia tany shikasha, nta mitannyi yaany miravi-fo, yeni va mmba ya Israeli, ni Nndumi Iruva aamba.”

⁴⁵Irero lya Nndumi Iruva lyikashisheya lyishaamba:

⁴⁶“Yewe, mwana wa nndu induta kisangu kwalla taari ya sinde, kuniinge wiikyimbi marero a ukisuku, kwaambe kya nturu wa vaandeny lwa Negebu.

⁴⁷Kundeuvia, nturu wa Negebu, arannyiny irero lya Nndumi Iruva; Nndumi Iruva aamba indi: Lla shishaata muro nnang'ani yafo, nato ushekomba wo nri mmbisi nnang'ani yafo, na wo nri muumu; fipalapala fya muro yeto mfurumywaa-fo, na fisangu fyoose ukya taari ya sinde kufike taari ya ndoo, mmbo fimamitwaa ni muro yeto.

⁴⁸Na vatiri mwiili woose mmbo valollya sheelyi ni yeny Nndumi Iruva, shawaata; mmburumywaa-fo.”

⁴⁹Llyo shaamba, Yee Nndumi, Nndumi Iruva, wo mmbo vakeeyaamba kyakwa, “Alee! Yeu nshi mwikapa fyaaso?”