Read BIBILLYA Mareiyo Meele a Iruva ESEKIELI 22 Bible Online

ESEKIELI 22 - BIBILLYA Mareiyo Meele a Iruva bible

ESEKIELI 22

¹Irero lya Nndumi Iruva lyikashisheya lyingyi lyikaamba,

²“Yewe mwana wa nndu, kusheutyaa uvingo, kusheutya uvingo muri wa Samu?

³Kweekyo uvye yekyo ulyamarye kyoose. Neewe mmbo kushaamba, Nndumi Iruva aamba indi: Muri ukupusuyyaa samu, naambo kyeeri kya vayo kyikooye isha; muri ukusongosya mafwanu; naambo ukooye ikutefusa!

⁴Mmbo kwammba nsindara kyimaruma kya samu kwampuswa, neewe kwava ntefusu kyimaruma kya mafwanu yoo kulesongosya; na suku yafo kwayeende kufii, kyeeri kyideerye kya myaaka yafo kyansha. Naasa, kweefyo fyoose mmbo shakwallwa kwava mwang'o nnang'ani a masanga na ngyuruka toose.

⁵Yewo vakee kufii na yeto tikee kwaasha, mmbo vakwiipala, yewe nravi na mafwalangya.

⁶“A nkyelola, vaniini va Israeli; wo umwi kwi finya atiri, mmballatya ipuswa samu.

⁷Nnang'ani yafo, nde na ma vakeepalwa, veira-shia vakatannywa kindo kyilavaa yaamba vekee kwafo. Nnang'ani yafo vana va ngwera na vaka va ding'u vakasiswa.

⁸Kweenyala fiiyya fyakwa fyeele. Mikonu yakwa myeele yaiimuya kwaatefusa.

⁹Nnang'ani yafo vakakaa-fo veeringyaa vengyi naambo wawaawa, nnang'ani yafo, vakakaa-fo velyiyya mafumbuuny na ituusa.

¹⁰Nnang'ani yafo kukakaa-fo vengyi valaaya fitara fya vande vawo; nnang'ani yafo vakakaa-fo vengyi vashaafinyaa vaka valandemaa suku tawo.

¹¹Nndu katannya nka wa amurasa wakwe kindo kyikasha kilavaa yaamba. Ungyi katuusa nka wa nsero wakwe muni, na ungyi nnang'ani yafo nnyaafinya mfwamaye, mfu va ndeye.

¹²Nnang'ani yaany mukawarya findo kyisurukumu naambo mukooye ipuswa samu ta vandu; mukakapya mbusha waamrasa na iwarya findo fya ntambo, neeni mwanshirekywa yeny, Nndumi Iruva aamba,

¹³“Lolaany, mmbo shishekusoka yefyo fyoose kulesangirya kwa shia ya ntambo na samu ikee nnang'ani yafo.

¹⁴A ndesa nrima wafo ushiidima isisirya, ao woko lwafo lutiri finya ya isiika ngapo yakwa elyi kyeeri kyifikaa? Ni yeny Nndumi Iruva shaamba, na nkuti shitani indo.

¹⁵Mmbo shishekukwaanisa nnang'ani a masanga shishekunyanyata yefo ngyurukeny shive na shive; shishekuturrwa kirinda kyafo naambo kusambike.

¹⁶Neeny mmbo shishesutwaa kyimaruma kyafo misony a vandu va masanga, llyo kushemanya sheelyi yeny mmbwe Nndumi Iruva.”

¹⁷Nalyo irero lya Nndumi Iruva lyikashisheya lyishaamba,

¹⁸“Yewe mwana wa nndu, vana va mmba ya Israeli vammba sha sorongyo ta fesa kwakwa, woose piny fesa, fesa na arera, na ibati na minya, na risasi kyeeri tikeesangywa yefo nunguny ya ikaara mmbaaluka sorongyo.

¹⁹Kweekyo mmbo Nndumi Iruva aamba indi: Kimmba moose mwammba Sorongyo, mmbo shimusangirya moose, nnang'ani ya Yerusalemu.

²⁰Kimwi sha nndu ashuumbya, fesa na arera, na minya na risasi na ibati yefo nunguny yeekaara naambo taatiryo muro tiidimi yeeka; niindo shishemusangiryaa kyeendwa ni unyafi na ngoo ishitiri kyimaruma kyany, mmbo shishemweera-fo mweeke.

²¹Yee, mmbo shishemusangirya shishemwaatya muro wa nyashi yakwa mweekkye-fo.

²²Sha fesa yeetwa yefo nunguny, ni indo musheetwaa nnyashi yakwaa, llyo mushemanya sheelyi yeny, mmbwe Nndumi Iruva shapuswa nyashi yakwa uwe yaany.”

²³Irero lya Nndumi Iruva, lyikashisheya, lyishaamba,

²⁴“Yewe mwana wa nndu” Via Israeli, yewe mmbo kukee uruka llyang'a, uruka utefusu lulasheywaa ni mmbwa kyeeri kya ngapo.

²⁵Vasongoru vakwe, yefo nnang'ani yakwe mmbo vavakkye miiso tidinaa kyeeri tikapannya kyelya, mmbo vanratwa myuu ya vandu; vakeepoo masaa na findo fya wuuru uniini, na yeekyena lya vaka va ding'u lyikeengereka kwakwe.

²⁶Vakohani vakwe vakatatala mavavaso akwa, vakatefusa findo fyakwa fyeele, vakalemwa yoora kilasha kya findo fyeele na findo fya mashora a mikonu myoose; nta valaidimi ilosha kilasha kya findo fikee fisangye na filakee fisangye, vakasingira miso awo valakunde yiindya mikonu yakwa ya iimuya, neeny vakashaamba utefusu nnang'ani yaawo.

²⁷Vasongoru nnang'ani akwe vakavaka mafite a ngoroshony aratwa fyelya; vapusswa samu imamita muu, naambo vakooye-fo mbusha ilakwaani nawo.

²⁸Nawo vakisuku vakwe vakavapollya yeela ilakee shisande nisha veetiri usukukyo lwa wongo, iyaawuya ukisuku lwa marero a wongo, veshaamba, Nndumi Iruva aamba indi ate ni wongo.

²⁹Vandu va uruka, vatannye makasha, vasokaa findo kwa finya; vakalammya vaturi na vatinnywa na iwonnya veny kuleefo usumanu.

³⁰Neeny sharuuya nndu nnang'ani natane ulale, neesalala mbee yakwa ando alya kuwundukye kyimaruma kya uruka naambo shilashelumamita, indi shilawoni nta umwi.

³¹Kweekyo shammbapusuya nyashi yakwa, shammbamamita na muro wa ngoo yakwa; neeny shavareeya shia yaawo veni mirweny yaawo, ni Nndumi Iruva aamba.