Read BIBILLYA Mareiyo Meele a Iruva ESEKIELI 28 Bible Online

ESEKIELI 28 - BIBILLYA Mareiyo Meele a Iruva bible

ESEKIELI 28

¹Irero lya Nndumi Iruva lyikashisheya lyishaamba:

²“Yewe mwana wa nndu, rera na mangyi ya Tiro kummbie; Nndumi Iruva aamba indi: Kimmba nrima wafo wammba mbafu, ‘kwaamba yewe mmbwe iruva! Neewe mmbwe kukaaye kiri kya maruva yefo si nnang'ani ya yeeve.’ Ate nta nkukee iruva-fo ni nndu tupu, naakwa nnyelyi kwakusara yefo nriminy wafo sheelyi mmbo kukee nrango sha iruva.

³Lyo kutiri urango kweelannya Danieli, nta nkwiifo kindo kya kirika vandu vashiidimaa ikusuruma-fo.

⁴Kyimaruma kya wiidimi lwa urango na makusaro afo mmbo kuleidima isangyirya masaa meengyi, ekee ni saabu na arera.

⁵Kyeendwa ni urango lwafo na makusaro afo ekapa mbusha, umasi lwafo nalo llwammeengyereka, kyindo yekyo, kyikeengye nrima wafo umbafu.

⁶“Naasany, Nndumi Iruva mmbo aamba indi: Kimmba kwankwallwa nnrango sha iruva,

⁷mmbo shisheende vandu veny kwafo, vandu va masanga, vaeresye, vashekapana na yewe neekurumata deny, urango na masaa afo kutiri vasheafwafwala.

⁸Vashekusummya irininy na ufu lwafo lushevaka valya valembwaiywa yefo mureny nnang'ani.

⁹A ndesa kushengyeraa yaamba mbee ya yeto akekuwaa, “Yeny mmbwe iruva! Indi yewe mmbo kukee nndu, nta nkukee Iruva usanguny lwa yeto akekuwaa-fo?

¹⁰Mmbo kushefwaa ufu lwa yewo vakee maseka, yefo maakony a vandu veny. Mashika ni yeny Nndumi Iruva, shaamba irero yelyi.”

¹¹Nndumi Iruva karera lyingyi na yeny kaamba:

¹²“Yewe mwana wa nndu, kwiipo kwakapa kyiiyo kya mangyi ya Tiro. Nndumi Iruva mmbo aamba indi; Mapookyony mmbo kwekee nndu nsha, na nsaari, urango lwafo lukasennya wo andu.

¹³Kwakaa Edeny, kulya nndeny wa Iruva, kundo kwetiri mawe a wo ngata shisha kweniingwa ni Iruva ekee ni akiki, na yakuti ya makundu, na alumasi, na sabarajadi, na shahamu, na yaspi, na yakuti samawi, na sumaridi, na baharamani, na saabu, mashora a mataari afo na fivale fyafo fyoose mmbo fyekee nnang'ani yafo kupookya nkonu ulya Nndumi Iruva ekuumba.

¹⁴Yewe mmbo kwekee kerubi nringyi mwaambe mafura, shandekuvika uwe ya ifumbuu yeele lya Iruva; kwava mwiiruarua yefo, neefo nnang'ani a mawe a muro.

¹⁵Mmbo kwekee nsaari kupookya nkonu ulya kweumbwa kutani makasha afo ashelollywa nnang'ani yafo.

¹⁶Kwava mwikapa mbusha na vandu valyang'a vakakwishura utefusu nnang'ani yafo neewe kwatana ulyamari, kwa kyimaruma yekyo mmbo shishekuuta yefo ifumbu lya Iruva, ngata ya kindo kitefusu; mmbo shakumamita, ewe kerubi mwiiringa kuuke yefo maweny yoo a muro.

¹⁷Nrima wafo mmbo uleva mbafu kyimaruma kya yuumba lyafo; kwalyamara urango lwafo usha kyimaruma kya ivesywa lyafo. Shankutuula-si, shakwaara yoo mbee ya vamangyi, veedimi ikulola paa.

¹⁸Kyeendwa mmbwiingyi lwa makasha afo, yefo mbusheny tafo sheesi, kwandetefusa ando kwafo kweele; kweekyo shakweengye muro wuuka nnang'ani yafo, nato ukakumamita, neeny shakwallwa kwava ifu urukeny, usanguny lwa vandu woose valya valekulollya.

¹⁹Valya woose vakwiishi, nnang'ani a masanga vandu, mmbo vating'waa kyafo, kwammba kindo kyeeresye, kulakyikaa kulollywa lyingyi fika llung'anu.”

²⁰Irero lya Nndumi Iruva lyikaamba;

²¹“Yewe mwana wa nndu, enda Sidoni kuvarwaaye ukyisuku yelu, kuvavie;

²²Nndumi Iruva mmbo aamba indi; Yeny ni nkiduva wafo, yewe Sidoni, na vandu vasheshirumishaa, nawo vashemanyaa sheelyi yeny mmbwe Nndumi Iruva, kyeeri vashelollya mwaandu yeto sharummbwa nnang'ani yakwe, neekwiilyisa nnang'ani yakwe.

²³Mashika mmbo shinrikyaa ndwari na samu yefo shieny takwe toose, isheshaa ngapo ya fira uwe yakwe, yuuka taari toose.

²⁴Llyo vamanyaa sheelyi yeny mmbwe Nndumi Iruva.

²⁵Nndumi Iruva mmbo aamba indi, “Kyeeri shisheummbyaa vandu va mmba ya Israeli neewoota yefo nnang'ani a vandu va masanga kundo venyanyakye, na ikwiilyisa misony a vandu va masanga, llyo vashekaa yefo urukeny lwawo veni, yelo shiniingye nndundi wakwa Yakobo.

²⁶Nawo mmbo vashekaa-fo kwa urilalyi; yee, vashetana mmba, nevaaya marema a misabibu, na ikaa-fo kippwa, kyeeri kyikooywa shamma irummbwa myaandu ya vandu woose, valya vatana mbony ta kiila. Naasa llyo vamanya sheelyi, yeny mmbwe Nndumi Iruva waawo.”