Read BIBILLYA Mareiyo Meele a Iruva ESEKIELI 32 Bible Online

ESEKIELI 32 - BIBILLYA Mareiyo Meele a Iruva bible

ESEKIELI 32

¹Kwikee mwaaka wa ikumi na kavii, mwiiri wa ikumi na kavii nkonu wa mbee wa mwiiri, irero lya Nndumi Iruva lyikashisheya lyishaamba:

²“Yewe mwana wa nndu, kapya Farao kiiyo, mangyi ya Misri, kummbie; mmbo kwevakaniswa na mwana wa miiso ya masanga, indilyo kwava sha shoka nnang'ani ya yeeve; kwasomuka kwa finya amwi na mira yafo, kwafwalangya mura, na marende afo, kwaallwa ifwaloongyo mira yaawo.

³Nndumi Iruva mmbo aamba indi; mmbo shikusongosiyaa nreyo wa mamwiingi a masanga a vandu vashekutira na nreyo yeto wakwa.

⁴Nshishekuisityo yoo kasa koomu, shishekweera mbateny, kwaa peru, kusheva shoonga ya ndeye ta nginiiu na mafisi a ngoroshony.

⁵Nshikwaanisaa nyama tafo uwe ya mafumbuu, na minying'a indekwaana yefo mamungony.

⁶Shikupuswe samu ikwaani urukeny koose na uwe ya mafumbu, na ngyusoka tiiwalewale samu yafo.

⁷Yelyi shishekumamita, mmbo kusheva ireema nginii-u na nyinyiri toose, nshishesikya mwi na mafishi na mwiiri ulemwa ivaa saa.

⁸Fyeende saa fya iruveeu fyoose, mmbo shishefyaallwa ireema kyimaruma kyafo, Neeny shivike-fo ireema yefo urukeny lwafo, ni Nndumi Iruva aamba.

⁹“Mirima ya vandu veengyi shiyeengye isawukwa elyi shiningyaa kwiipowa mfungwa masangeny kundeanga ngyurukeny kulatiishi.

¹⁰Yekyo shishekutannya mmbo kisherese vandu veengyi va masanga na vamangyi vawo mmbo vashereyaa nnu kyimaruma kyafo, kyeeri shishekuipoyywaa usu velollye, wo kyeeri mmbo varerema, wo nndu kyimaruma kya muu wakwe, nkonu yeto kushevingwaa.

¹¹Mashika mmbo Nndumi Iruva aamba: Mangyi ya Babilony mmbo ashekwiipoyyoo usu yewe,

¹²shishesalallya nkuka wa vandu vafo eewaawa na usu lwa vandu vatiri finya, nnang'ani a vandu va masanga yelo llo lushevaa umanndo lwa mangyi ya Misri kya umbafu lwakwe, na vandu vakwe woose mmbo vashemamitwaa.

¹³Findo fya mmba fyoose mmbo shishefimamitaa kulakaa-fo uvayo lwa nndu ao mbungashu ya ng'umbe ao ifisi ishekaa ifwafwale ao ifwalangya-se.

¹⁴Llyo shishaallwa mira yaany ive myaa peru, nayo yeeke kisha sha mafura. Niindo Nndumi Iruva aamba.

¹⁵“Kyeeri shishaallwa uruka lwa Misri luve ukyiva na kasa koomu, uruka lulakitiri findo filya fyeishwe-fo, kyeeri shishekapaa vandu woose vakee yefo Misri, llyo vashemanyaa sheelyi yeny mmbwe Nndumi Iruva.

¹⁶Yekyo nkyo kyiyyo vasheemba, vefu va masanga vasheemba, veekapaa kyiyyo kimaruma kya Misri na kimaruma kya nsemu moose wa vandu, niindo Nndumi Iruva aamba.”

¹⁷Mmbo kwekee mwaaka wa ikumi na kavii, mwiiri wa mbee, nkonu ikumi na karaanu, irero lya Nndumi Iruva lyikashisheya lyishaamba;

¹⁸“Yewe mwana wa nndu, fuuya vandu va Misri woose, we na vefu va masanga, vataari ta sumbai ta uruka, veefo na muu neewo vafiiye.

¹⁹Mmbo kukee nsha kwailannya-vi? Fwa kwarikwa, amwi neewo maseka.

²⁰Mmbo vashewaa kyimwi sha valya valewaawa na usu, mmbo aleniingyo naambo awaawa na usu muuteny yaa, neende kwaasha amwi na vandu vakwe woose.

²¹Masiingo a vandu vasherera kyawo uka yefo kwa varumu, sanda na valya veemweekyaa woose mmbo valele sau, sanda na maseka vammaa iwaawa na usu.

²²Mwaashuri mfo kundo akai na kilula kyakwe kya vandu, ekee nringitye ni fifu fya yewo vafiiye taari toose, nawo mmbo valewaawa na usu,

²³marina a fifu fyawo, mmbo akee masummyi sumbai kwaasha deny, nsemu yeto mmbo uringitye kifu kyakwe, na woose mmbo valewaawa na usu, vakawa, valya veeresye urukeny lwa vandu veefo na muu.

²⁴“Elamu mfo kundo akai; na kyilula kyakwe kya vandu, taari toose ta kifu kyakwe valewaawa na usu, maseka valerikwa fifuny si urukeny lwa yewo veefo na muu valya veeresye urukeny, lwa yewo veefo na muu nawo vankurika usutu lwawo, vakasanga na valya vakeyooloka kifuny.

²⁵Vakammbikya kiri, nnang'ani ya valya valewaawa, amwi na kilula kya vandu vakwe; veeringitye kifu kyakwe; na maseka moose vakawaawa na usu, mashika fyeereso fyawo mmbo filetanyikya urukeny lwa vandu veefo na muu, nawo vankurika usutu lwawo vakasanga na valya vakeyooloka kifuny; kandevikwa nnang'ani ya valya valewaawa.

²⁶“Mesheki mmfo kundo vakai, na Tubali na kyilula kya vandu vakwe woose; veeringitye fifu fyakwe. Maseka moose, vakawaawa na usu, mashika mmbo vaereesye urukeny lwa vandu veefo na muu.

²⁷Indi mmbalaa ando amwi na shaamba ta kasha tilya teenda kwa wafu na fisha fyawo fya fira, valya ngyusu tawo taarwa kwaanu ya mirwe yaawo, valya ngawo tawo tearwa uwe ya maffwa awo, mashika mmbo valeeresye urukeny lwa vandu veefo na muu.

²⁸Kweekyo mmbo kushefishwaa na indearwa nnang'ani ya maseka, amwi na valya valewaawa na usu.

²⁹“Edomu nkulya akai, vamangyi vakwe na vaniini woose, ngata veetiri finya na wiidimi uniini mmbo vakee vaare ando amwi na valya valewaawa na usu, mmbo valala ando amwi na maseka, kimwi na valya vasherikwaa irininy.

³⁰Vaniini va taari ya ndoo mfo kundo vakai woose; na Vasidoni woose valerikwa kimwi na valya valewaawa vakeende usutu kimaruma kya weerei na yaanguywa wiidimi, vakandaarwa amwi na maseka alewaawa na usu, vakakurika usutu lwawo kimwi na valya vakeyaarwa irininy.

³¹“Kyeeri Farao ashevalollya mmbo ashekuviria muu kya kilula kya vandu vakwe woose, Farao amwi na itorito lyakwe lyoose mmbo lyilewaawa na usu, ni Nndumi Iruva aamba.

³²Mashika mmbo shilevika weeresi lwakwe nnang'ani a uruka lwa vandu vatiri muu. Nawe mmbo ashaarwaa nnang'ani ya maseka sanda na yewo valewaawa na usu, we Farao, sanda na vandu vakwe woose, ni Nndumi Iruva aamba.”