Read BIBILLYA Mareiyo Meele a Iruva ESEKIELI 33 Bible Online

ESEKIELI 33 - BIBILLYA Mareiyo Meele a Iruva bible

ESEKIELI 33

¹Irero lya Nndumi Iruva lyikashisheya lyikaamba:

²“Yewe mwana wa nndu, rera na vana va vandu vafo, kuvavie; Yelyi shisheende usu uwe ya uruka, vandu va uruka yelo vakasauwa nndu umwi nnang'ani yaawo, vakammbika nave nringyi waawo;

³kwakooya alollya usu lwiisha uwe ya uruka yelo, kakapa wombe lweiikyimba vandu;

⁴naasa nndu moose yeto ashiita unyanga lwa wombe, nta nalaikyimbwi, usu lukasha, na imuutau, samu yakwe mmbo ivaa uwe ya nrwe wakwe muni.

⁵Aleeta unyanga lwa wombe, lyo nnyaleikyimbwa-fo; samu yakwe mmbo ivaa uwe yakwe, indi kukooye aleirikya viikimbi mmbo ekyira muu wakwe.

⁶Lyo mwiringa kalollya usu lwiisha, nta nalakape wombe, nta vandu valaikyimbwa, na usu lukasha lukootau nndu moose nnang'ani yaawo, yeto ammuutwau ekee yefo ulyamariny lwakwe indi samu yakwe mmbo shiivesa yefo maakony a nringyi yeto.

⁷Kweekyo yewe, mwana wa nndu, mmbo shilekuvika kuve nringyi wa mmba ya Israeli, kweekyo arannya irero yelyi kaniny kyakwa, naambo kundevaniinga wikyimbi lwakwa.

⁸Kyeeri shikevia nndu nkasha, ni kya dede kufwaa, neewe kulakerera irero lya yiikyimba nndu yeto, nare shia yakwe, nndu yeto nkasha mmbo ashefiyya yefo ukasheny lwakwe, indi samu yakwe mmbo shiivesaa maakony afo.

⁹Indi kwakooya kweekyimba nndu nkasha, kyimaruma kya shia yakwe, naambo nalakane nayo, nta-we nalakunde ilakana nayo, nndu yeto nkasha mmbo ashefiyya yefo ukasheny lwakwe, indi yewe kwankukyira muu wafo.”

¹⁰“Yewe mwana wa nndu rera na vana va mmba ya Israeli, yeni mmbo mwaamba marekwa eru na ngyulyamari teru, ni uwe yeeru, neese mmbo lukee vafwafwa, yefo ngyulyamariny yeto, nkyishiidimika inda ikaa na muu?

¹¹Vavie, Nndumi Iruva aamba, Yeny shiifo na muu, nshifurie ifwa lya nndu llyamari-fo, indi nndu llyamari naalashike, neera-fo shia yakwe shikasha akee na muu. Alashikeny, alashikeny, mure shia shikasha; nkyikyi yelyi mukundye ifwa, yeni mmba ya Israeli?

¹²“Yewe mwana wa nndu, via vana va vandu vafo, usumanu lwa yeto akee nsumanu llushenkyiraa nkonu ulya asheteere-fo, na kya nkonu wa ulyamari lwa nndu llyamari, nnyashewaa kyimaruma kya ulyamari yelo-fo, nkonu ulya ashaalashika na ira ulyamari lwakwe; nta kwa yeto we akee nndu wa usumanu, nnyashiidimaa ikaa na muu, nkonu ulya ashewaa ulyamariny-fo.

¹³Naakwa shavia nndu nsumanu, ni kya dede kushekaa na muu, nawe kasalala yefo kyikusiryony kyakwe, kawa ulyamariny nkwiifo ishora lyimwi isha lyishekumbuwa-fo, indi kya ulyamari llwa atana mmbo ashefwaa.

¹⁴Naakwa shavia nndu llyamari, ni kya dede kushefwaa, indi kaalashika yefo mitannyiny yakwe mikasha katana fya usha na usumanu,

¹⁵nawe kavika kyaasa, kyeeviira filya alemmaafinya, nepooka mikaaye misha, neetana fya usumanu, ni kya dede, mmbo ashekaa na muu nnyaashefwaa-fo.

¹⁶Nkukaa-fo ulyamari lumwi alentana lukaa lukumbuwa kyakwe-fo, mmbo aletana yefyo fikwaani na fya usumanu, kya dede mmbo ashekaa na muu.

¹⁷“Indi vana va vandu vafo mmbo vaamba; Shia ya Nndumi nshi ya usumanu-fo, ate shia yaawo nnyo ilakee ya usumanu.

¹⁸Kyeeri nndu nsumanu ara fya usumanu, katana fya ulyamari, mmbo ashefiyya yefo ulyamariny.

¹⁹Kyeeri nndu llyamari aalashika ooka yefo ulyamariny lwakwe, katana fya usha na usumanu, kwa mitanyi yakwe mmbo ashekaa na muu.

²⁰Indi yeni mmbo mwaamba shia ya Nndumi Iruva nshi ya usumanu-fo. Yeni va mmba ya Israeli, mmbo shishemmutya uvingo, wo nndu na meengye yakwe.”

²¹Kwikee mwaaka wa ikumi na kavii ukkya lunsamirwa, mwiiri wa ikumi, nkonu karaanu, nndu umwi ekusuruma kashisheya ooka Yerusalemu kashivia, Muri wantirwa.

²²Elyi lya nkwaany kulare nndu yeu ansheengye rumi, shenkwiita finya ta Nndumi Iruva mwiiliny mbwakwa, kyeeri nndu ulya aafukya elyi lya ndesi ngama, Nndumi Iruva kashiviirya finya yeerera.

²³Irero lya nndumi Iruva lyikashisheya lyishaamba; yewe mwana wa nndu,

²⁴Vandu valya vakaa kulya kundo kulellyamarika, yefo urukeny lwa Israeli, mmbo vaamba Abrahamu mmbo ekee nndu umwi llyo kaniingwa ding'u ya uruka yelu loose; indi yese mmbo lukee veengyi lukaniingwa uruka yelu luve ding'u yeeru.

²⁵Naasa vavie Nndumi Iruva mmbo aamba indi; Mmbo mukeelya nyama mukasanda na samu yavayo, na yiindya maruva a wongo; neepuswa samu ta vandu, ndesa mushiidima ishillya uruka yelu?

²⁶Mmbo mukewaa vandu na usu nayaafinya vaka va vandu, ndesa musheniingwaa uruka yelu?

²⁷Mmbo kundevavia; Nndumi Iruva aamba indi; Kya dede yeny shiifo na muu, vandu valya vakaa kundo kulyamarikkye, mmbo vashewaawa na usu, na ulya akee mbateny shishemuuta-fo shimweerye mafisi nalyiwa mmafisi a ngoroshony na valya vakusurumyi yefo turuveny na mbangeny vashewaawa nndwari.

²⁸Mmbo shisheallwa uruka yelu luve ukyiva, ukushopi na ukaidi lwakwe lushefikya ufishony, nayo mafumbu a Israeli ashevaa ukyiva kulalollywa nndu ashiraa-fo.

²⁹Llyo kyeeri vashemanyaa sheelyi yeny mmbwe Nndumi Iruva, yelyi shishaallwa uruka luve ukyiva na wende kyimaruma kya mitannyi yaawo mikasha.

³⁰“Kyafo yewe, mwana wa nndu, vandu vafo yewo vakwaanannya na irera kimwi mbony tafo yefo masimambeny na myaangony ya mmba wo umwi eevia mwanamaye, ‘Ashe naarannye ni mbony kyi yeyo ikeyuuka kwa Nndumi Iruva!’

³¹Nawo mmbo vakeesha kwafo sha vandu va usumanu vakaveyaarannya neekyo kwiifo kuvavia vakamanya, indi lyo mmbatanaa-fo. Yefo kaniny kyawo mmbo vakeyoora ikunda iniini, indi mirima yaawo mmbo ikekusara mbony ta mbusha tawo.

³²Ate kwawo, mmbo kwava sha nndu ashiimbaa fiimbo, fiimbo fisha, fya unyanga usha, neefina nisha elyi akeekapa fivale, vakaita yekyo kukeyaamba lyo mmbakeetana-fo.

³³Neelyi mbony yeto tishiinukyaa mashika tikeesha. Llyo vamanyaa sheelyi kweifo nkisuku nnang'ani yaawo.”