Read BIBILLYA Mareiyo Meele a Iruva ESEKIELI 38 Bible Online

ESEKIELI 38 - BIBILLYA Mareiyo Meele a Iruva bible

ESEKIELI 38

¹Irero lya Nndumi Iruva lyikashisheya lyikaamba;

²“Yewe mwana wa nndu, ipoo miso kulole Gogu wa uruka lwa Magogu, mangyi ya Roshi, Meshaki na Tobali, kwaawuya ukyisuku

³kwaambe, Nndumi Iruva mmbo aamba indi: Lola, yeny mmbo shisuuye kyafo, yewe Gogu, mangyi ya Roshi, na Meshaki, na Tobali,

⁴mmbo shishekwiindutaa, shishekudoshya ndoana yefo yuunduny lyafo, shishekurufwa amwi na itorito lyafo lyoose, frasi na yewo vesaama frasi woose, woose mmbo varee fisha fya wo ngata, itorito iniini nnu, varee ngao na kofya ta minya, woose vatiri ngyusu.

⁵Vaajemi, na Esopia, na Putu, amwi nawo, woose mmbo varee ngao na kofya ta minya.

⁶Gomeri na makamba akwe moose; mmba ya Togorma, na valya va kwaasha taari ya ndoo, amwi na matorito moose, na vandu veengyi mmbo vakee amwi neewe.

⁷Kudeesye, yee kudeesye, yewe na vasikari vafo woose yewo vafiitani neewe; neewe kusheva nsongoru waawo.

⁸“Ando a mikonu miingyi, mmbo kushevaangwa kushekapa uruka lutiri vandu veengyi veenngywa wooka masangeny meengyi, na ulaalu, mmbo vakee valeke kuleefo weresi lwa fira. Mmbo kushekapa mafumbu a Israeli, yoo kyeeri kya mbee ekee kasa koomu na sama ando a kyeeri kyaasha, indi ulaalu vandu woose yefo mmbo vakukaye na urilalyi.

⁹Mmbo kukwiipo kuvivike sha uraato, kusikkye uruka sha ifishi, yewe kumuni na itorito lyafo lyoose amwi na masanga engyi yoo akee kyimwi neewe.

¹⁰“Nndumi Iruva mmbo aamba indi; Nkonu yeto ukamfika mmbo kushaanga makusaro makasha nriminy mbwafo, neewe kushekusara itana mitanyi mikasha, neewe kwaambe:

¹¹Mmbo shisheenda shisaame uwe kundo kukee uruka lutiri fimungo filatir ulale, kundo vandu vakee valeke valatirwa ni usau, vakee kundo kulakee masimamba, nta ngiri tawo tilatiri misirya yeeraya.

¹²Naambo kutire mifungwa, na ireiya mireiyyo, naambo kutire masaa a vandu vakee yefo miriny kundo kwekee kasa koomu yelyo mbee; nawo mmbo vesangirywa wooka masanga meengyi. Nawo ulaalu mmbo vatiri ng'umbe na masaa meengyi vakandekaa yoo nnang'ani a uruka.

¹³Sheba na Dedani na vekapa mbusha va Tarshishi, na vengyi woose mmbo vashekuvesaa: Mmbo kwasha ishelutira mifungwa?” Kwansangirya itorito lyafo, naambo kwiidimi ireeiya mireiyyo? Kwiipo fesa na saabu, kwiipo ng'umbe na masaa meengyi shaasa kushiidimaa?

¹⁴“Naasa, yewe mwana wa nndu, awuya kyisuku kuvie Gogu, Nndumi Iruva mmbo aamba indi: Nkonu yeto vandu vakwa Israeli vashekaa kippwa mmbo kusheepo kyaaro,

¹⁵kushesha kuuka kwafo yefo kwaasha taari ya ndoo; yewe na vandu veengyi varyani na yewe, woose vesaamye frasi, nsemu mwiingyi na itorito iniini:

¹⁶neewe kushesaama uwe ya vandu vakwa Israeli sha ifishi lyisikyaa uruka. Kyeeri kyeefurumya, shishekweende kukapani na uruka lwakwa yewe Gogu, naambo masanga akooye ishimanya yeny, kyeeri shisheworaa paa weele lwakwa kwafo mbee ya usangu lwawo.

¹⁷“Nndumi Iruva aamba indi: A mmbwe yewe shaamba mbony tafo ta kasha, kwa kana kya varundi vakwa, vakisuku va Israeli mikonu ilya ya kasha sheelyi shishekweende kukapani nawo?”

¹⁸Nndumi Iruva aamba, “Nkonu yeto, Gogu asheshaa ikapana na uruka lwa Israeli mmbo vashesaamisaa nyashi yakwa.

¹⁹Mashika ni kya kyififi kyakwa na kya nyashi yakwa ishitiri, shammaamba, ni dede nkonu yeto mmbo kushevaafo kidina-si kiniini kunu urukeny lwa Israeli.

²⁰Naakwa ni makunga a yeeveny, na ndeye ta nginiiu, na mafisi a ngoroshony, na findo fyoose fikurufwa sumbai, na vandu woose vakee uwe ya uruka, mmbo vashereremaa mbee ya usangu lwakwa. Nang'u mafumbu ashewaa sumbai, na mawe ashewaa, na wo isimamba lyishewundukyaa sumbai.

²¹Neeny shishevaanga ngapo ya wo ngata iwoye Gogu, ni Nndumi Iruva aamba, wo nndu na usu lwakwe mmbo ashiipoyyoo mwanamaye.

²²Neeny shishemuutyaa uvingo na ndwari shikasha na kwa samu, sheende mmbwa shiniini ya mifu, na masaawe maniini nnu, na muro uwe ya vayo, itorito lyakwe, na vandu vamasanga meengi akee amwi nawe.

²³Neeny shikwiitikise, na ikwiilyisa, neekoora paa mbee ya miso a masanga meengyi nawo vamanyi sheelyi yeny mmbwe Nndumi Iruva.”