Read BIBILLYA Mareiyo Meele a Iruva ESEKIELI 40 Bible Online

ESEKIELI 40 - BIBILLYA Mareiyo Meele a Iruva bible

ESEKIELI 40

¹Kwikee mwaaka wa makumi avii na karaanu wa isamirwa, mapookyony a mwaaka, nkonu wa ikumi wa mwiiri, kwikee mwaaka wa ikumi na kaana ukya muri wantirwa; nkonu yeto mweni woko lwa Nndumi Iruva lukasha uwe yakwa, lukasheende urukyeny lwa Israeli yooryeny.

²Ngata shelollya, Iruva mmbo esheende kandeshivika uwe ya ifumbu yaasha nnu alya masasa, mbee yakwa kukava-fo mmba taari ya sinde tikavaka muri.

³Eekishifita-u, mbee yakwa shalollya-u nndu amikaa sha arera, na wokony lwakwe etiri-fo uruu lwa kitani, na irere lya yeesa, nawe eselelyi kufii na yoo mwaangony.

⁴Nndu ulya kashivia, “Yewe mwana wa nndu, lola na miso afo, kwaarannye na maarwi afo, kuvike nriminy wafo, yefyo fyoose shishekoora. Mashika mmbo kweendwa yaandi naambo shishekoora yewe; neewe kundeamba mbony yeti toose kwa mmba ya Israeli.”

⁵Ate kweifo isimamba, liringitye mmba kipoo taari toose, nndu ulya kaipoo urungo lwakwe, lwa yeesa, urungo lutiri waasha lwa mita isaru, keesa isimamba llya. Isimamba yelyo enda uwe lyeetiri mita isaru, na ivari lyavayo lyekee mita isaru.

⁶Naasa keenda kafika mwaango ulollye taari ya ngama, kasaama fitere, ekee alya uwe, keesa kyeeko kya mwaango, kitiri mita isaru kuleenda-si.

⁷Kweeiyo na firia fya veeringa, wo taari, na mwaanya ando kweira, wo kyimwi waasha na ivari lya vayo mmbo fiinani, ivari mita isaru na waasha mita isaru. Masimamba eyaava firia yefyo mmbo etiri nkukufa wa mita ivii na kyenga. Yefo kisafu kweiyo ulale waasha lwa vayo mita isaru, na kyiria kiniini kkyisumani na mmba ya Iruva.

⁸Nndu ulya keesa kyiria kilya nakyo kyeetiri mita yiinya kuleenda-si.

⁹Naasa keesa masimamba a vayo, taari ya poo toose mmbo teetiri nkukufa wa mita imwi, taari ya mmba ya mwaango nnyo yekee kufii mmwasi na mmba ya iterevya.

¹⁰Kweiyo na ando kweyaanga, kutiri firia firaru fya varingi wo taari, na fyeeso fya vayo mmbo fiinani, na isimamba yelyo lyifyaavye, nkukufa wa vayo mmbo wiinani.

¹¹Naasa nndu ulya keesa ivari lya mwaango ando kweiira. Ivari lya vayo lyekee mita irindaru na kyenga. Ulale ando kweiira lwekee mita isaanu.

¹²Mbee ya firia fya veeringa, mmbo fyeeinani, mita isaru kwa isaru, kweiyo isimamba ifii lya kyenga kya mita isaama uwe, na ivari lya kyenga kya mita kyikee ni kiirikiso.

¹³Nndu ulya keesa waasha, kupookya isimamba lya numa ya kiria kimwi kya numa, kutani afika isimamba lya kiria taari ya kavii, ando kutiri mwaanya weyiira, kakooya ni mita ikumi na ivii na kyenga.

¹⁴Kiria kya mafurumyony ni kilya kilollye neefo kisafu. Keesa kiria kilya kakooya mmbo kitiri ivari lya mita ikumi.

¹⁵Kuuka mbee ya mwaango nniini weyaanga fika yefo ulaleny nnang'ani ya mwaango mmbo kweiyo mita makumi avii na isaanu.

¹⁶Kweifo matirisha madu, madu yefo isimambeny lya kipoo na a kimmba, neengyi uwe ya fyeeko. Kweifo na fireiyywa fya firishe fya myaangashi uwe ya fyeeko fya kimmba kulya kweyaanga ulaleny.

¹⁷Nndu ulya kashikurika kandeshifita kulya ulaleny lwa mmba ya iterevya. Kulya mmbo kweifo firia makumi araru feringitye isimamba taari ya poo, na mbee ya firia yefyo mmbo kwekee kwaale sakafu ya mawe.

¹⁸Sakafu yeyo mmbo yekee shaale kweeringitya myaango, kwiilatya waasha lwa myaango yeyo, nsakafu yeyo ya sumbai.

¹⁹Numa, nndu ulya kandeesa waasha lwa shia ilya ishuuka yefo mmba kusomuke poo kakooya ni mita makumi araanu.

²⁰Naasa nndu ulya keesa waasha na ivari lya mwaango wa taari ya ndoo na ulale lwa poo.

²¹Kweifo firia firaru fya veeringa taari toose ta mwaango, masimamba na myaango yavayo, mmbo fyeeso fyavayo fyevakye filya fya mwaango wa taari ya ngama. Waasha lwa shia ilya kwasanda amwi, mmbo lwekee mita makumi avii na isaanu, na ivari lya vayo ni mita ikumi na ivii na kyenga.

²²Kyiria kyeanga na matirisha na malemmyi a vayo amwi na maangashi alya akee mareiyye yefo isimambeny fyoose mmbo fikuvakye na filya fya mwaango wa taari ya ngama. Nayoondo kweifo fitere mfungare fyeesaamya kulya mwaangony, na fimangya fya vayo fyeekee mbee ya vayo.

²³Kuuka alya kwekee shia ya yaanga taari ya ndoo, neenderuuka ulale shuru, kweiyo shia ingyi yeyaanga ishendaa neefo ulaleny lwa mmba, sha kulya lwekee taari ya ngama. Nndu ulya keesa waasha luuka shia fika shia, kakooya ni mita makumi araanu.

²⁴Nndu ulya kashiipo fika taari ya sinde, yefo nafo kweifo mwaango, keesa fyeeko na ngyiri, fyeeso fya vayo fikavaka filya fya fyeeko na ngyiri tingyi.

²⁵Kweifo matirisha taari toose, sha firia filya fingyi, waasha lwa vayo lwekee mita makumi avii na isaanu na ivari lya vayo mita ikumi na ivii na kyenga.

²⁶Kweiyo fitere mfungare fyeesaamya kulya shia ilya yeyaanga na masiiyyo avayo kweiyo ngyiri, usumanu na ulale. Kweiyo na fireiyywa fya myaangashi yefo masimambeny a nnang'ani; akava usumanu na shia yeyo yeyaanga.

²⁷Usumanu na shia yeyo yeyaanga, kweiyo shia ya yeyaanga yefo ulaleny lwa nnang'ani. Nndu ulya keesa waasha nnang'ani a shia yeto ivii, kakooya mita makumi araanu.

²⁸Nndu ulya kashiita ando kwekee shia ya yaanga na taari ya kwasinde, lukafika ulale lwa nnang'ani. Keesa shia ilya ate mmbo yekee shia ivakye tilya tingyi teyaanga masimambeny a kipoo.

²⁹Firia fya veeringa, ngyiri, na masimamba a vayo, mmbo fiinani na filya fingyi. Kweifo matirisha, mbai na mbai ya shia yeyo ishaanga ngiriny. Mmbo yetiri waasha lwa mita makumi avii na isaanu na ivari lya mita ikumi na ivii na kyenga.

³⁰Kweifo firia taari na taari ya shia yeyo yeyaanga, fitiri waasha lwa mita makumi avii na isaanu, na ivari lya mita ikumi na ivii na kyenga.

³¹Ngyiri ilya mmbo yekee usumanu na ulale lwa poo, nafo kweifo fireiyywa fya myaangashi yefo ngony, taari na taari ya shia yeyo yeyaanga alya fitereny. Mmbo kweiyo fitere nyanya fyesaama kulya mwaangony yeu.

³²Nndu ulya kashirwaa taari ya ngama ya ulale lwa nnang'ani. Keesa shia ya yaanga, nayo mmbo yetiri waasha luvakye shia tilya tingyi teyaanga.

³³Firia fya vayo fya veeringa na fyeeko fya nnang'ani amwi na fyeeso fya vayo mmbo fyeng'ani sha filya fingyi. Kweifo matirisha taari toose, naakwa ni kulya marerony na kulya kyirieny kyeyaanga. Waasha lwa vayo mmbo lweeke mita makumi avii na isaanu, na ivari lya vayo mita ikumi na ivii na kyenga.

³⁴Kyiria kilya kyeyaanga mmbo kyekee usumanu na uvasha lwa poo. Nefo kweifo fireiyywa fya maangashi yefo masimambeny alya ando kweyaanga. Kukava-u na fitere nyanya fyesaama kuleenda kulya mwaangony.

³⁵Nawe kasheende, kashifita, mwaango weyaanga taari ya ndoo, nawe kaweesa kakooya fyeeso fyavayo ni kyimwi na fyeeso fya ilya ingyi.

³⁶Nayo yetiri matirisha taari na taari, waasha lwa vayo mita makumi avii na isaanu na ivari lyavayo, mita ikumi na ivii na kyenga.

³⁷Mwaango weyaanga mmbo wekee usumanu na ulale lwa poo. Nafo kweifo fireiyywa fya maangashi yefo masimambeny alya ando eyaanga. Kukava-u na fitere nyanya fyeesaama kuleenda kulya mwaangony yeto.

³⁸Kulya ulaleny lwa poo, kweiyo kyiria kya mmwasi kyikee kyilungye na shia ilya yeyaanga yefo mmba taari ya ndoo. Kyiria yekyo mmbo kyikee usumanu na alya mwaango weyaanga ulaleny, ando kweesangya firaso fyekora na muro.

³⁹Kulya ulaleny, kufii na shia, kweifo mesa ivii taari imwi na tingyi ivii taari yeyo ingyi, mesa yeto mmbo tikee ando kweshishya firaso fyemamitwa, kiraso kyeyuuta ulyamari, na kiraso kyefwaaywa.

⁴⁰Poo ya ulale yelo, kweiyo mesa ivii, taari imwi, na ivii taari yeyo ingyi.

⁴¹Kweifo mesa nyanya, yiinya taari ya kimmba, na yiinya taari ya kipoo ya ulale; nato mmbo kwekee ando kweeshishya firaso.

⁴²Teifo mesa tingyi yiinya, ta mawe mapashe, ando kwedeesya firaso fyekora na muro. Teetiri kyenga kya mita enda na uwe, na waasha lwiinani na ivari lya vayo sentimita makumi mfungare na isaanu. Fiiyya fyoose fyeeshisha firaso yefyo mmbo fyesheekyerywa uwe ya mesa yeto.

⁴³Yefo ulaleny yelo mmbo kweifo marerwa evanikwa nyama yeto ta firaso uwe ya mesa.

⁴⁴Naasa kandesheende fika kirieny kya nnang'ani kulya ulaleny, ando kutiri myaango ya firia fivii, taari ya mwaango wa ndoo ulollye taari ya sinde na mwaango ungyi wa taari ya sinde ulollye taari ya ndoo.

⁴⁵Naasa kashivia, kiria yekyi kilollye taari ya sinde ni kya vakoani yewo veniingya nndumwa kunu mmba ya iterevya.

⁴⁶Na kiria yekyo kilollye taari ya ndoo, ni kya vakoani yewo velola alya kitareny kyeerasya, nawo ni vana va Sadoki veni nnang'ani a vana va Levi, mmbo vashiidima iserikya kufii na usangu lwa Nndumi Iruva, na imfurukannya.

⁴⁷Nndu ulya keesa ulale lwa nnang'ani, nalo mmbo lweinani taari toose, wo taari ikava mmbo itiri mita makumi araanu. Kitara kyeerasya kyikava mmbo kyekee mbee ya usangu lwa mmba ya Nndumi Iruva.

⁴⁸Numa ya vayo kashirwaa ando kutiri ngyiri yeyaanga neefo mmba ya Nndumi Iruva. Kyeesa fyeeko fya mwaango wa vayo kulella uwe, mita ivii na kyenga, na ivari lya vayo mita mfungare. Nkukufa wa isimamba wekee mita imwi na kyenga taari toose.

⁴⁹Kweiyo fitere fyeyaanga kirieny kya uwe yefo ulaleny, mwaango wa vayo wetiri ivari lya mita ikumi, na waasha lwa yeenda uwe mita irindaru, fyeeko fivii fya mwaango taari yei kimwi na taari yeyo ingyi kimwi.