Read BIBILLYA Mareiyo Meele a Iruva ESEKIELI 41 Bible Online

ESEKIELI 41 - BIBILLYA Mareiyo Meele a Iruva bible

ESEKIELI 41

¹Naasa nndu ulya kashirwaa kashifita alya kirieny kya nnang'ani ando kweele. Kandeesa shia ya ifika kulya mmba itiri fyeeko taari na taari waasha lwa vayo yeenda uwe, mita isaru

²Ivari lya mita isaanu, masimamba atiri nkukufa wa mita ivii na kyenga taari toose. Kandeesa kyiria kya mmba, waasha lwa vayo mita makumi avii na ivari lya mita ikumi.

³Nawe kandeanga yefo kyirieny kya nnang'ani keesa fyeeko fya mwaango waasha lwa yeenda uwe mita imwi, na ivari lya mita isaru na kyenga. Ando yaa mmbo kwetiri masimamba taari toose, atiri nkukufa wa mita isaru na kyenga.

⁴Naasa keesa waasha lwa kyiria yekyo mita ikumi taari na taari. Kyiria yekyi mmbo kyekee mbee ya ulale lwa nnang'ani. Naasa kashivia, “Yaandi ng'u ando kweele kwa kweele.”

⁵Nndu ulya keesa isimamba lya mmba ya Iruva lyitiri nkukufa wa mita isaru. Kweifo fyiria fidu, fikee fya mita ivii kulelengetya mmba shoose ya Nndumi Iruva,

⁶nafyo mmbo fyekee mbai ya mmba ta kai isaru imwi uwe ya mmba ingyi masimamba a vayo akeenda eesisya kulelengetya mmba yeyo ya Iruva naambo kive ni kisiiko kya fimmba fya mbai filasherovya isimamba lya mmba ya Iruva.

⁷Firia filya fya mbariny fikeengera ing'ana, kweeringitya mmba, kulesaama na uwe, kupookya kai kyimwi kweende kai kengyi, neefo mbai ya mmba ya Iruva, kweifo fitere fya yeenda uwe kupookya kai ka sumbai kutani kwafika kai ka uwe kulelatya kai ka nnang'ani.

⁸Shandelollya sheelyi mmba ilya mmbo yetiri sakafu ya mawe ikeeshitani ando kwa uwe, ikalengetya taari toose, nsuka wa isimamba yelyo mmbo wekee wa mmba ilya ya kai, ikee usumanu na mmba ilya ya iterevya, na waasha lwa nsuka yeto kulella uwe ni mita isaru.

⁹Nkukufa wa isimamba lya poo, wa firia fya mmba mmbo wekee, mita ivii na kyenga. Kweiyo mwaanya nnang'ani ya firia fya mbai, usumanu na mmba ya iterevya.

¹⁰Firia fya veeringa, fyeetiri ivari lya mita ikumi kuleeringitya mmba shoose ya iterevya.

¹¹Myaango ya firia filya fya mbariny, mmbo ileendukya taari ilya ilesaa-u itiri mwaanya, mwaango umwi uleendukya taari ya ndoo, na mwaango ungyi taari ya sinde na ivari lya uvasha llwa lulesaa-u lwekee mita ikumi taari na taari.

¹²Alya masiyyony deny a uvasha, taari ya ngama kweiyo, mmba itiri waasha lwa mita makumi aana na isaanu, na ivari lya mita makumi araru na isaanu. Masimamba a vayo, etiri nkukufa wa mita ivii na kyenga.

¹³Nawe nndu ulya keesa mmba, itiri waasha lwa mita makumi araanu, kupookya alya numa ya mmba ya Nndumi Iruva, kuleera na alya ando kutiri mwaanya, kundefika masiiyony a vayo taari ya ngama nalo waasha lwekee mita makumi araanu.

¹⁴Waasha lwa ivari lya vayo, kulella taari ya ngama ya mmba ya Nndumi Iruva, mita makumi araanu.

¹⁵Naasa nndu ulya keesa mmba shoose kulella taari ya ngama, kasanda-fo mwaanya wa nnang'ani na ulale lwa mmba mita makumi araanu. Kiria kyeyaanga mmba ya Iruva, alya ando kweele ya kweele.

¹⁶Fyoose mmbo fyekee fishope na mbau, kupookya sakafuny, kutani kwafikya matirisheny. Matirisha yoo akasikkywa

¹⁷Kutani afikya uwe ya fyeeko fya myaango; firieny fya nnang'ani na fya poo, na uwe ya isimamba lya kiria kya nnang'ani yefo ngiriny kweifo fireiyywa fivakyani

¹⁸na myaangashi na mafwanu a fyuumbe fitiri maru. Kwankyillya yaangashi lyimwi, mmbo kwiiyo ifwanu lya kyuumbe kyitiri maru kuleringyitya mmba shoose. Wo kyuumbe mmbo kyitiri fisangu fivii.

¹⁹Kisangu kya nndu kyikaindukya yaangashi lya taari imwi, na kisangu kya miiso kyikaindukya yaangashi lya taari ingyi. Niindo mmba shoose yekee shaambike.

²⁰Kupookya sakafu, kundefikya uwe ya myaango kukashorwa-fo fyuumbe fitiri maru na myaangashi.

²¹Fyeeko fya ando yoo kweele mmbo fyeinani taari toose kitikiti. Yoo mbee ya mwaango ulya weeyaanga alya ando kweele ya kweele, kweiyo kindo kyevakye

²²kitara kya mbau kyeerasya. Kyetiri waasha lwa mita imwi na kyenga. Kuleenda uwe, na ivari lya mita imwi. Ngo ta ndumba yavayo, kirembo kyavayo, na masimamba a vayo mmbo fyekee fya mbau. Kashivia, “Yei nnyo mesa isalelyi mbee ya Nndumi Iruva.”

²³Alya ando kwekaa na alya ando kweele koose mmbo kwevikywa-u myaango ivii

²⁴Myaango yeyo mmbo yetiri fiparwe fivii, firwiika kunu na kunu myaango myoose ivii.

²⁵Alya mwaango weyaanga ngiriny kweiyo fyuumbe fireyywa fitiri maru, na myaangashi alya akee mavike kulya isimambeny. Kweiyo na kifiniko kya ubau, kyeraya mwaango taari ya poo ando alya kweyaanga mmba.

²⁶Mbai ya kiria yekyi, kweiyo matirisha madu na masimamba fyoose fitiri fireiya myywa vyaangashi.