Read BIBILLYA Mareiyo Meele a Iruva ESEKIELI 43 Bible Online

ESEKIELI 43 - BIBILLYA Mareiyo Meele a Iruva bible

ESEKIELI 43

¹Nndu ulya kandeshiipoo kashifita mwaango wa taari ya ngama.

²Itumbe lya Iruva wa Israeli lyikalollywa lyuuka taari ya ngama, na unyanga lwa-vayo lukasha lwishoona sha mura mwiingyi itumbe lyakwe lyikamikya uruka.

³Shoorwa kindo kivakye kilya shelollya, kyeeri Iruva esha ilyamara muri wa Yerusalemu, kyikavaka kilya shelollya kufii na mura wa Keba, shawa-si kifulufulu.

⁴Ndesa itumbe lya Nndumi Iruva lyaanga efo mmba yeeterevya lyuuka na taari ya mwaango wa taari ya ngama,

⁵shaipowa uwe ni Mumuyo ukandeshaata ulale lwa nnang'ani, nafo itumbe lya Nndumi Iruva lyikaishura yefo mmba ya iterevya.

⁶Llya nndu ulya esalalyi kufii na yeny, unyanga lukashisheya luuka kulya mmba ya iterevya, lushaamba,

⁷“Yewe mwana wa nndu, Yaandi, ni ando kwa ushilyi lwakwa, ando kweevika marende akwa, shishekaa nnang'ani, a vandu va Israeli llung'anu. Nta vana va mmba ya Israeli valakaa vatefuse lyingyi irina lyakwa yeele, nta lyawo, nta vamangyi vawo na yiinndya mafwanu, nta irika minying'a ya vamangyi vawo ando yaa.

⁸Vamangyi vakaseleesa fyeeko fya mmba tawo ta kimangyi ikwiinanisa na fyeeko fya mmba yakwa yeeterevya, nta kulaseeu mwaanya, nnang'ani ya mmba yakwa na mmba tawo kuuta isimamba-nsi. Vakatefusa irina lyakwa yeele na mitannyi yaawo mikasha, nkyo kimaruma sharooywa nnyashi shavamamita.

⁹Ulaalu valakani na mafwanu awo, veere kwaasha neeny na minying'a ya vamangyi vawo; llyo shishekaa nnang'ani yaawo llung'anu.

¹⁰“Neewe mwana wa nndu, sununndya vana va Israeli kya mmba ya Iruva, vakuloshe na imanya ndesa ikunndikye itanwa, valollye usutu, kimaruma kya uravi valetana.

¹¹Kwakooya valollya usutu lwa mitannyi yaawo, valoshe ramani ya mmba ya Iruva ngata ikundikye itanwa, myaango yeyaanga, neesomuka, na yuumba lya vayo lyoose, vamanyi, uramba lwa wo kindo, ishingo na mitannyi ya vayo. Yefyo fyoose vereeiye, vamanyi na nshushwa, naambo vaidimi ilatya ishingo na uramba loose.

¹²Elyi llyo ivavaso lya mmba ya Iruva: Uvasha loose yelo luringitye mmba ya Iruva uwe ya ifumbu, ni kuti luve weele deny. Yee, yelyo ni ivavaso lya mmba ya iterevya.”

¹³Fyeeso fya yeesa masapau mmbo fivaa sha filya fileesa mmba ya iterevya. Kuleringitya nsuka wa masapahu, mmbo ushesumwaa yeenda-si ando a kyenga kya mita, na ivari lya kyenga kya mita, kushesumwa nsuka kuleringitya kyirembo kya-vayo ando a sentimita makumi avii na isaanu, elyo llyo waasha lwa yeenda uwe.

¹⁴Kiparwe ekyo kyikee sumbai ya fyoose, kya masapau, ni mita imwi kuleenda uwe, kupookya yoo nsuka umandi. Kiparwe yekyo kyasorya, kyikavikwa numa ando a sentimita makumi araanu kupookya mbai na waasha lwa vayo kuleenda uwe mita ivii. Kiparwe yekyo kyalatya kyikavikwa numa ando a kyenga kya mita kupookya mbai, kuleringitya masapahu shoose, na waasha lwa mita ivii kuleenda uwe.

¹⁵Kiparwe kya uwe yoo ando kweyuutya firaso fyeekora nang'u ni mita ivii kulella uwe. Ando yaa mmbo kushevaa uwe mmwasi yoo ando kwa yeekyerya firaso fyeemamitwa.

¹⁶Fyeeso fya vayo ni mita ivii taari toose.

¹⁷Kyiparwe kya nnang'ani nakyo mmbo kyiinani taari toose mita mfungare kwa mfungare. Ikaringitywa ni nkanda taari toose, lwa sentimita makumi avii na isaanu. Fitere fyesaama masapahuny mmbo fyekee taari ya ngama.

¹⁸Nndumi Iruva kashivia, “Yewe mwana wa nndu, Yeny Nndumi Iruva mmbo shaamba indi: Kyeeri masabahu yei ishesia itanwa, mmbo kusheivikaa sheele, kweyuutya firaso fyeemamitwa, neefwallya-fo samu ya firaso yefyo fyaaniingyo;

¹⁹vakoani vasherunda mashora yoo ni valya va ufyari lwa Levi, yewo va mmba ya Sadoki, mmbo yewo vakwaani isheshuutya nndumwa, ni yeny Nndumi Iruva shaamba. Mmbo kushevaniinngya ngashe ya shau, ya kiraso kya ulyamari.

²⁰Mmbo kushuuta samu kufwallye taari yiinya ta masapau; na taari ta-vayo yiinya, na nkanda yeto uringyitye taari toose, ni indo kushevauwa masapau yei neevika sheele.

²¹Mmbo kusheniinngyaa shau ya irasya, yuuta kiraso kya ulyamari; vasheimamitya ando kukeekusauwe yefo nnang'ani ya mmba ya Nndumi Iruva, indi mbai na ando alya kweele.

²²Na nkonu yeto wasorya, mmbo kusheniinngya mburu ya ndafu, shisha ilatiri mfere, isheva ni kiraso kyayuuta ulyamari; ni indo kushevauwa masapau yei na iivika sheele; ndesa ilevikwa sheele na samu ya shau.

²³Mmbo kusheniinngyaa shau ilatiri mfere na suva yuuka efo findony fyafo fya mmba ilatiri mfere:

²⁴kushefyeende mbee ya Nndumi Iruva, na vakoani vashevafwallya shumbi uwe ya vayo, nayo isheniingywa kiraso kyeekora kwa Nndumi Iruva.

²⁵“Ando a mikonu mfungare mmbo kuniingyaa mburu imwi ive kiraso kya ulyamari, shau na suva filatiri mfere fyuuka yefo findony fyafo fya mmba.

²⁶Ando a mikonu mfungare kushoota kiraso kya usandi na ivawua masapau kwiivike sheele.

²⁷Ikammissya mikonu mfungare enda na mbee, vakoani mmbo vasheniingyaa firaso fyany fyeemamitwa na fya urilalyi. Neeny shishemufwaaya. Ni Yeny Nndumi Iruva shaamba.”