Read BIBILLYA Mareiyo Meele a Iruva ESEKIELI 45 Bible Online

ESEKIELI 45 - BIBILLYA Mareiyo Meele a Iruva bible

ESEKIELI 45

¹Elyi mufikyaa yaava marema, iniinga wo nndu ekyo kyikwaani nawe, ni kuti muutye-u Nndumi Iruva kyaawu kyakwe kya mashora akwe mukyivike kyeele. Waasha lwa vayo luve kilomita ikumi na ivii na kyenga, na ivari lyavayo kilomita ikumi na ivii. Yoo mmbo kushevaa ando kweele mikonu myoose.

²Efo nnang'ani yavayo kusheka-fo, uvasha lwiinani taari shoose mita mayana avii na makumi araanu kuve kweele. Luringitywa ni uvasha lungyi taari toose lutiri ivari lya mita mayana avii na makumi araanu.

³Efo kyaawuny elyo kusheesa-fo kyiparwe kyingyi kitiri waasha lwa kilomita ikumi na ivii na kyenga na ivari lya kilomita isaanu. Efo mmbo kushevaa ndaleny yakwa ando kweele nnu.

⁴Yekyi ni kyaawu kyeele deny; nakyo mmbo kyishevaa ni kya vakoani yewo vefurukannya Nndumi Iruva, neefo kyaawuny ekyo mfo kundo kushetannywa mmba tawo, efo ndaleny kweele, kwa Nndumi kweekaa.

⁵Kyaawu kyingyi kyitiri waasha lwa kilomita ikumi na ivii na kyenga, na ivari lyavayo kilomita isaanu, ando kwetannya mmba ta Valevi, yewo vefurukannya mmba ya Iruva kyive masaa awo.

⁶Mmusheesaa-u kyaawu kyingi kufii na ekyo kyeele, kitiri waasha lwa kilomita ikumi na ivii na kyenga, na ivari lyavayo kilomita ivii na kyenga. Ekyo mmbo kyishevaa kya yewo woose va mmba ya Israeli.

⁷Mangyi mmbo asheniingwa kyaawu kilya kikee taari ya ngama, lyo taari ya nkwaany mmbo kyiifiitani na kyaawu kilya kyikee kivike kyeele kwa Nndumi Iruva taari ya nkwaany, mmbo kyikwaallye kyikandefika yeeve lya Meditrania, na taari ya ngama kutani kwandefika nnyanuny wa uruka taari ya ngama. Waasha lwa vayo mmbo lushevaa sha llwa luniinngywa vandu woose va Israeli. Llo lushevaa masaa akwe efo Israeli.

⁸Nawe nnyakivaa-se mangyi alamyaa vandu vakwa-fo, indilyo mmbo asalallyaa uruka lwaavywa Vaisraeli, ndesa kyikwaani na masanga a vana va Israeli.

⁹Nndumi Iruva aamba indi: Kyifye, Yeni vamangyi va Israeli, reny ungala na iwonnya vandu, mwantana ulyamari kyikailannya. Tannyeny vandu mesha na usumanu. Reny yuumbuta vandu vakwa urukeny, ni yeny Nndumi Iruva shaamba.

¹⁰“Ni kuti kurunde na misani ya usumanu ya fyeeso fya dede.

¹¹Kwa kyeeso kyiinani, efa kwa nswa na bati kwa mafura mmbo fiinani. Kweekyo homeri imwi iyaani na efa ikumi kiwo ikainana na bati isaanu.

¹²Kwayeesa kilo; gera makumi avii ni shekeli imwi, shekeli makumi arindaru ni mina imwi.

¹³“Fimu fyany fya mareminy mmbo fivaa indi: Kyimwi kya firindaru kya efa nnang'ani ya homeri imwi ya nganu, na kyimwi kya firindaru kya efa nnang'ani ya homeri imwi ya shayiri.

¹⁴Kyeeso kya mafura mmbo kyivaa indi: Kyimwi kya bati imwi ya mafura yuuka koriny imwi (kori imwi kyimwi na homeri imwi, na hori imwi kyimwi na bati ikumi).

¹⁵Mmbo vaniinngya yoonri lyimwi, nnang'ani a moonri mayana avii, uka efo mmbeny ta vana va Israeli. Mmbo vasheendee firaso fya mareminy, firaso fyeemamitwa, na firaso fya urilalyi, naambo vaidimi itannywa usandi. Ni Yeny Nndumi Iruva shaamba.

¹⁶Vandu va uruka woose, mmbo vasheniinngya firaso efyo kwa mangyi ya Israeli.

¹⁷Ni ishora lya mangyi nasalallye na imanya sheelyi, kiraso kyeemamitwa, kiraso kya mareminy, na firaso fyeena fyaniinngywa kyeeri kya sukukuu, ukombe lwa mwiiri. Sabato na sukukuu tingyi toose tikeeshideesye efo Israeli fyanniingywa. Mangyi mmbwe ashedeesyaa firaso fyeyuuta ulyamari, firaso fya mareminy, firaso fyeemamitwa, na firaso fya urilalyi naambo vaidimi itannywa usandi vandu woose Israeli.”

¹⁸Nndumi Iruva aamba indi: “Kwikee mwiiri wa mbee, na nkonu wa mbee wa mwiiri, mmbo kusheninngya ngashe ya shau ilatiri mfere isheva nnduma yoo ando kweele.

¹⁹Nkoani mmbo asheniinngya samu ya kiraso kya yuuta ulyamari, nasheivika efo fyeekony fya mmba ya Nndumi Iruva, na ndumba shoose yiinya ta masapahu, na ngo ta ngiri yoo mwaangony we yaanga efo ulaleny lwa nnang'ani.

²⁰Mmbo ashetanaa indo nkonu wa mfungare wa mwiiri yeto mweni, kyeyuuta nndu aletana ulyamari eiishi ao naleeshi. Niindo mushekooya yiilyisa mmba ya Nndumi Iruva.

²¹“Nkonu wa ikumi na kaana, wa mwiiri wa mbee, mmbo mushevikaa sukukuu ya Pasaka. Ando a mikonu mfungare mwiilyaa mikate ilatiri ntarang'o.

²²Nkonu yeto, mangyi mmbo asheniingyaa, kimaruma kyakwe, na kya vandu woose va uruka, ngashe ya shau ive kiraso kya ulyamari.

²³Mikonu eyo mfungare myoose, mmbo asheutyaa Nndumi Iruva, kiraso kya ngoleta mfungare, na suva mfungare wo nkonu teemamitwa tilatiri mfere. Ni kuti aniinngye ndafu imwi wo nkonu ive ni kiraso kya yuuta ulyamari.

²⁴Numa asheniingya kiraso kya nswa wo shau kilo ikumi, na kilo ikumi ta suva imwi, ashemarisya na lita isaru ta mafura kwa wo kilo ikumi ta nswa.

²⁵“Mikonu ikumi na iraanu ya mwiiri wa mfungare, na ando a mikonu mfungare ya sukukuu mangyi mmbo asheniinngya firaso fya yuuta ulyamari, firaso fyeemamitwa, firaso fya mareminy na fya mafura.”