Read BIBILLYA Mareiyo Meele a Iruva ESEKIELI 48 Bible Online

ESEKIELI 48 - BIBILLYA Mareiyo Meele a Iruva bible

ESEKIELI 48

¹“Yaa nng'u marina a ngyufyari na waavi lwawo. Kupookya nnyanu wa taari ya ndoo, kulelatya shia ya Hetloni kundefika Hamtai na muri wa Hasar-enoni (eto ukee nnyanuny na Damasko na Hamati taari ya ndoo kuleenda kuuka taari ya ngama fika taari ya nkwaany), kyaawu mmbo kishevaa kya ufyari lwa Dani.

²Kyaawu ekyo kyifiitani na kya Dani kupookya taari ya ngama, fika taari ya nkwaany, mmbo kyivaa kya Asheri

³Ufyari lwa Naftali, mmbo lusheniingwaa kyaawu ekyo kyifiitani na ekyo kya Asheri, kupookya taari ya ngama kundefika taari ya nkwaany.

⁴Kuuka kyaawuny kya ufyari lwa Naftali, mmbo kyilatyaa kyaawu kya ufyari lwa Manase, kupookya taari ya ngama kundefika taari ya nkwaany.

⁵Kyaawu ekyo kyifitani na kyaawu kya Manase, kupookya taari ya ngama kundefika taari ya nkwaany, mmbo kyishevaa kya ufyari lwa Efreemu.

⁶Kyaawu ekyo kyifitani na kyaawu kya Efreemu, kupookya taari ya ngama kundefika taari ya nkwaany, mmbo kyishevaa kya ufyari lwa Rubeny.

⁷Kyaawu ekyo kyifitani na kyaawu kya Rubeny, kupookya taari ya ngama, kundefika taari ya nkwaany, mmbo kyishevaa kya ufyari lwa Yuda.”

⁸Kwamma yuuta-u kyaawu kya ufyari lwa Yuda. Mmbo kushootaa-u kyaawu kyitiri waasha lwa kilomita ikumi na ivii na ivari lya vayo fiinani kimwi; kuuka taari ya ndoo kundefika taari ya sinde, waasha ni elo weni, kupookya taari ya ngama kundefika taari ya nkwaany. Mmbo kiinani na kyaawu kya wo ufyari. Yoo nnang'ani a kyaawu ekyo mmbo kushevaa kyeny kwa Iruva.

⁹Kyaawu ekyo kushoota-u kya Nndumi Iruva, mmbo kishevaa na waasha lwa kilomita ikumi na ivii na kyenga, kwa kilomita ikumi.

¹⁰Vakoani mmbo vashevaa na kyaawu kyawo efo kyaawuny ekyo. Kyaawu ekyo mmbo kishevaa na waasha lwa kilomita ikumi na ivii na kyenga, kupookya taari ya ngama kundefika taari ya nkwaany, na kilomita isaanu kupookya taari ya ndoo, kundefika taari ya sinde. Kyeny kwa Iruva mmbo kushevaa yoo nnang'ani a kyaawu ekyo.

¹¹Kyaawu ekyo mmbo kishevaa kya vakoani va mmba ya Sadoki, valya valeshirundya kwa usaari valandefuluke kyeeri kilya Vaisraeli veshifuluka amwi na Valevi.

¹²Ekyo mmbo kishevaa kyaawu kyawo ng'arushu kyuuka efo kyaawuny kyeele kya uruka; kyaawu kyeele nnu, ekyo kishefiitana na kyaawu kya Valevi.

¹³Kyaawu kya Valevi wo mmbo kishevaa, taari ya kwasinde ya kyaawu kya vakoani. Kyaawu ekyo mmbo kishevaa na waasha lya kilomita ikumi na ivii na kyenga, kupookya taari ya ngama kundefika taari ya nkwaany; na ivari lya kilomita isaanu kupookya taari ya ndoo kundefika taari ya sinde.

¹⁴Nkwiifo kyenga kyoose kya kyaawu ekyo kishekumbwaa ao iniingywa nndu wa ngata shoose-fo; mashika kyaawu ekyo, ni kyeele kwa Nndumi Iruva nakyo mmbo kikee kiviiri ngota fingyi fyoose urukeny.

¹⁵Kyaawu kilya kisauwe kisaei-u kya waasha lwa kilomita ikumi na ivii na kyenga na ivari lya kilomita ivii na kyenga, elyo mmbo lyishevaa lya itana findo fyikwaani na findo fyaangu fya efo muriny. Kundo kweekaa neerema shoonga. Yoo nnang'ani ya vayo kushevikwaa-u muri,

¹⁶nato mmbo usheinanaa fyeeso fya vayo taari toose, wo taari mita fiku fivii mayana avii na makumi araanu.

¹⁷Kuleringitya muri kushevaa-u na uvasha lulatiri kindo, ivari lya-vayo mita iyaana na makumi avii na isaanu.

¹⁸Kyaawu ekyo kishesaa-u, mmba ya Iruva yamma itanwa taari ya kwasinde ya muri, kilomita isaanu kwa kilomita ivii na kyenga taari ya ngama, na kilomita isaanu kwa kilomita ivii na kyenga taari ya nkwaany, mmbo ishevaa kyaawu kyeerema kya vandu eva vakee yoo muriny.

¹⁹Varundi va muriny walakee wa ufyari lwa Israeli mmbwa vatiri muumu wa irema efo kyaawuny ekyo.

²⁰Kweekyo kyaawu kyoose ekyo kushoota-u, kikee kyaawu kyeele, sanda na kyaawu kya muri, mmbo kyivaa kya fyeeso fiinani taari toose, kilomita ikumi na ivii na kyenga wo taari imwi.

²¹Kyaawu kishesaa-u, taari toose ta kyaawu kyeele, na kyaawu kilya kya muri kilya fyeeso fyavayo fiinani taari toose kilomita ikumi na ivii na kyenga wo taari, kupookya taari ya ngama, kundefika taari ya nkwaany, usumanu na fyaawu filya fya ngyufyari, mmbo fishevaa fya mangyi. Kyaawu kilya kyeele kulya kyeny kwa Iruva mmbo ishevaa yoo nnang'ani.

²²Kyaawu kya Valevi kimwi na kyaawu kilya kya muri mmbo kishekaa nnang'ani ya kyaawu kya mangyi. Kyaawu kya mangyi mmbo kishekaa nnyanuny wa kyaawu kya ufyari lwa Yuda na kyaawu kya ufyari lwa Penyamini.

²³Ngyufyari tisaae mmbo tishaavywa fyaawu fyawo indi: Ufyari lwa Penyamini mmbo vasheniingwa kyaawu taari ya ngama kundefika taari ya nkwaany.

²⁴Kyaawu kifiitani na kyaawu kya Penyamini, kupookya taari ya ngama kundefika taari ya nkwaany, mmbo kishevaa kya ufyari lwa Simiony.

²⁵Kyaawu kifiitani na ufyari lwa Simion, kupookya taari ya ngama kundefika taari ya nkwaany, mmbo kishevaa kyaawu kya ufyari lwa Isakari.

²⁶Kyaawu kifiitani na ufyari lwa Isakari, kupookya taari ya ngama kundefika taari ya nkwaany mmbo kishevaa kyaawu kya ufyari lwa Saplony.

²⁷Kyaawu kifiitani na ufyari lwa Saplony, kupookya taari ya ngama kundefika taari ya nkwaany mmbo kishevaa kyaawu kya ufyari lwa Kati.

²⁸Kyaawu kifiitani na ufyari lwa Kati, kulella na taari ya sinde nnyanu mmbo upookya alya muri wa Tamari, kundefika usoka lwa Meriba-kadeshi kundefika taari ya ngama ya Misri kutani kwafika Yeeve ya Mediterania.

²⁹Ekyo nkyo kyaawu kya ufyari lwa Israeli. Efo mfo kundo vasheutywaa fyaawu fyawo. Wo ufyari kyaawu kyawo. Ni Nndumi Iruva, aamba.

³⁰“Muri wa Yerusalemu mmbo ushevaa na isimamba lyishevikwaa myaango yeyaanga neesomuka. Taari ya ndoo waasha lwa isimamba mmbo lushevaa mita fiku fivii mayana avii na makumi araanu. Eyo ni taari ya ndoo.

³¹Mmbo ushevaa na myaango iraru, mwaango wa Rubeny, mwaango wa Yuda, na mwaango wa Levi.

³²Isimamba lya taari ya ngama mmbo lyishevaa na waasha lwa mita fiku fivii, mayana avii na makumi araanu. Taari eyo mmbo ishevaa na myaango iraru: Mwaango wa Yosefu, mwaango wa Penyamini na mwaango wa Dani.

³³Isimamba lya taari ya sinde, mmbo lyishevaa na waasha lwa mita fiku fivii, mayana avii na makumi araanu. Taari eyo mmbo ishevaa na myaango iraru: mwaango wa Simeony, mwaango wa Isakari na mwaango wa Saplon.

³⁴Isimamba lya taari ya nkwaany, mmbo lyishevaa na waasha lwa mita fiku fivii, mayana avii na makumi araanu. Taari eyo mmbo ishevaa na myaango iraru: mwaango wa Kati, mwaango wa Asheri, na mwaango wa Naftali.

³⁵Waasha lwa mita ta masimamba moose aana ando amwi ni mita fiku kyeenda. Irina lya muri kupookya inu na mikonu myoose, ni Nndumi Iruva Aiyo.”