Read BIBILLYA Mareiyo Meele a Iruva ESEKIELI 7 Bible Online

ESEKIELI 7 - BIBILLYA Mareiyo Meele a Iruva bible

ESEKIELI 7

¹Irero lya Nndumi Iruva lyikashisheeya:

²Lyikaamba, “Yewe mwana wa nndu, via vana va Israeli sheelyi yeny Nndumi Iruva shaamba indi: Ulaalu ni ufishony! Ufishyo lwankooya uruka taari toose yiinya!

³Ulaalu ni ufishyo lwammusheya; ulaalu llyo shilekea unyafi lwakwa uwe yaany Mmbo shimuutya uvingo lwiinani na ngaa yaany. Na mmbo mmukapaa kya weesi lyany lyoose.

⁴Nshimulekyeyaa, nta nshimusaryaa-fo ni kuti shimukape kyikwaani na meesi any, na ukaidi lwiifo nnang'ani yaany. Llyo mumanyaa sheelyi yeny mmbwe Nndumi Iruva.

⁵Yekyo shikeyaamba yeny Nndumi, Nndumi Iruva ni yekyi: Ni ngapo uwe ya ngapo!

⁶Lola, umando lwansha! Yee, umando lwammaafukya! Lwammafukya! Umando lwammuwoya!

⁷Yeni veni uruka yelu, urumato lwany lwammaafukya! Yee vana wa uruka, saa yansha, nkonu ukee kufii nkonu wa kituuru nshi nkonu wa ikapa n-ndoro ifumbuu-fo.”

⁸Ulaalu nkufii mwiite finya ya unyafi lwakwa na wiidimi lwa ngoo yakwa uwe yaany. Na imuutya uvingo kikwaani na shia tany. Mmbo mmukapaa ngapo kya ngaa yaany.

⁹Nshimulekyeyaa nta imusarya-fo. Nikuti shimukape ngata kikwaani na mitannyi yaany Na ukaidi lwany lwiifo yefo nnang'ani yaany. Llyo mushemanyaa sheelyi Yeny mmbwe Nndumi Iruva mwimamita!

¹⁰“Kwiiseny, nkonu ulya ukee kufii! Umbiiri lwammbaa, ikung'anisa lyammoora Urumato lwany lwansha.

¹¹Kituuru kyammbaa kyikaaluka umbiri lwa wo uravi. Nkwiifo nndu umwi nnang'ani yavo akeekkya, nta kyindo kyimwi maseeny awo, nta itumbe nnang'ani yaawo-fo.

¹²Kyeeri kyansha, yee, nkonu ulya ukee kufii. Mwiyuura nalashekushela nta mwikumba nalaiye-fo; mashika ngapo yakwa mmbo ishewoyaa vandu woose.

¹³Mwikapa mbusha nnyashiidima-se iwuiya kyindo ankumba-fo na kwakooya eefo na muu. Mashika ngapo yei ni kwa vandu woose nnyishaalashika-fo. Kyeendwa ni mikaaye yaany mikasha, kuleefo nndu ashiidimaa ikira muu wakwe.

¹⁴Wombe lwankapwa, lweeivya vandu vakudeesye. Lyo nkwiifo asheenda fireny-fo, mashika ngapo yakwa ni ya vandu woose.”

¹⁵“Usu mmbo luringitye, ndwari shikasha na shaa ni mmba tikai, yeto akee maremeny nnyawaawa ni usu, na yeto akee muriny ni shaa na ndwari shikasha fimmbwaa.

¹⁶Valya vaturunyaa mmbo varishyaa mafumbuu sha mbeta ta imungony. Wo umwi efiiraa kyuumu kya ulyamari lwakwe.

¹⁷Wo nndu maako akwe mmbo alelekaa, na ndi takwe tive selesele.

¹⁸Mmbo varaa soori ta makunnya, vetirwa mmbwerei na usutu na mirwe yaawo ishuutwa iwoya.

¹⁹Fesa yaawo mmbo vasheera yefo shia, na saabu yaawo mmbo ivaa sha kindo kitefusu. Fesa na saabu yaawo nnyishiidima ivakira-fo Nkonu yeto wa ngapo ya Nndumi Iruva-fo, fesa na saabu ntifweraa shaa nta yiishura ndeu tawo-fo mashika kiparika kya ulyamari yelu ni umasi yelo vatiri.

²⁰Na usha lwa utore valekusongosya lwa itumbe lyilatiri mbusha, Vakasongosya mafwanu a maruva a wongo akasaamisa unyafi lwakwe; amwi na findo fyawo fya usutu; Yefyo fyoose mmbo shifyaallwa five fitefusu kwawo.

²¹Shiniingye umasi lwawo vandu va masanga engyi vandu va masanga vavasoke neetefusa umasi lwawo.

²²Mmbo shivakapaa mungo deny naambo vatefuse mmba yakwa yeeterevya Vaala shia vaange-fo na iitefusa yaaluke sama.

²³Mashika mmbo uruka lwammishwa ngyulyamari ta iwaa na ipuswa samu na muri wiishwe kituuru ukailannya

²⁴Mmbo nsheende masanga makasha mmwasi nawo asheshillya findo fya mmba tawo. Shivamanye furu umbafu lwawo. na ando kwawo kweerasya kutefuswa.

²⁵Elyi vasherovywaa mmavavyo, mmbo varuuya urilalyi lyo llulollywa-fo

²⁶Ngapo nnyishaa uwe ya ngapo; swiiswii ilatye swiiswii Varuuye mwawuya fisuku vanture vakoani varekwa mavavaso, na vamiku vature irero lya ileta.

²⁷Mangyi ashefiira, yeto nsongoru noote-pa vandu vatirwa mmbwerei. Shivatannyi kiinani na mirunndye yaawo; shivaniinge ngapo sha ngapo ya valya vengyi. Llyo vamanyaa sheelyi yeny mmbwe Nndumi Iruva.”