Read BIBILLYA Mareiyo Meele a Iruva DANIELI 12 Bible Online

DANIELI 12 - BIBILLYA Mareiyo Meele a Iruva bible

DANIELI 12

¹“Kyeeri ekyo akwiipoo nsu yeto nniini we Mikaeli yeto aringaa vandu vafo. Kushe kyeeri kya ngatara kilandelollyo uka elyo vandu vammuumbwa. Elyi kyeeri ekyo kifikaa, vandu vafo woose ewo vakee vareiye efo kyitabuny kya Iruva mmbo vashekyirwaa.

²Veengyi va valya valemfwa varuke, vawoni ifura lya llung'anu. Lyo vengyi vawoni sony na ukiva llung'anu.

³Nawo veeshillya valya varango wo mmbo vashemikaa sha sa yeefo nginii-u. Na valya valelosha vandu itana fya usumanu mmbo vashemikaa sha nyinyiri ta nginii-u llung'anu.”

⁴Naasa kashivia, “Danieli, ulaalu ososa kyitabu deny kuvike na kiringisyo fika yoo masiiyony a ulana. Kyeeri ekyo vandu mmbo varewaa vekwaataraa ruu naambo vamanyi findo fitanyikaa.”

⁵Naasa yeny Danieli shooka-fo shalollya vandu vavii vasalelyi yoo mbai ya mura, umwi taari yei na ungyi taari yeyo ingyi.

⁶Naasa shavesa nndu ulya umwi aree soori shimamiri asalalyi yoo uwe ya mura, “A ni fyeeri fifye inda, kutani findo efyo fyeeresye fyeera?”

⁷Nndu ulya esalelyi uwe ya mura, eree soori shimamiri kepoo maako moose avii na uwe iruveeu, kalya mboo kwa yeto wa llung'anu, kaamba ni, “Fyeeri firaru na kyenga fishiraa, kyeeri makiva a vandu veele ashesyaa, na mbony eti shoose, mmbo tikooywa tamminukya.”

⁸Sheeta, lyo shilamanye. Lyo shammbesa, “Ale Nndumi wakwa, mafurumyony a mbony eti mmbo ushevaa inda?”

⁹Kashivia, “Danieli, enda kyafo, mashika mbony eti ntakirika kutani kwafika yoo masiiyony.

¹⁰Vandu veengyi mmbo vashekwiilyisa, yewo varavi mmbo vashengeraa iva varavi tupu nta mmbashemanyaa kindo-fo; Valya vatiri urango niwo veni vamanyaa.

¹¹“Kupookya nkonu ulya firaso fyeekora na muro wo nkonu fishemandiswaa, nkyo kyeeri kilya kya uravi weesi, ni mikonu kyiku kyimwi, mayana avii na makumi kyeenda isheiraa-u.

¹²Ngoma nnya ewo vashekusiryaa-u kutani kwairau mikonu kyiku kyimwi, mayana araru na makumi araru na iraanu.

¹³“Indi yewe, kusirye-u fika mafurumyony. Numa kushefwaa, lyo kusheruka kuwonise isina lya weesi yoo mafurumyony a fyeeri.”