Read BIBILLYA Mareiyo Meele a Iruva DANIELI 2 Bible Online

DANIELI 2 - BIBILLYA Mareiyo Meele a Iruva bible

DANIELI 2

¹Kwikee mwaaka wa kavii wa ushilyi lwa mangyi Nebukadnessa, Nebukadnesa koorya yoorya, lyikansaveesa, keereya nnu, kasaukwa nriminy kutani alemwa ilala elyi kio.

²Naasa mangyi kavaanga vaanga, velafya vasavi na Vakaldayo vakwe naambo vashemmbya, na intammbashuya yoorya lyakwe. Nawo vakasha vakashesalala mbee ya mangyi.

³Mangyi kavavia, “Mmbo shileorya yoorya, na nrima wakwa mmbo ukeesawukwa nnu imanya yoorya elyo.”

⁴Nawo Vakaldayo valya vakavia mangyi ulya, “Wara finya mangyi mmbe! Luvie yoorya lyafo, neese lukuvie urango lwavayo.”

⁵Mangyi kavavia, “Mmbo shimuvia ni dede, mukalemwa, mmbo musherumbuwa malungo any lyimwi lyimwi kutani mmba tany tarewa marama.

⁶Indi mukashirambuya yoorya elyo na urango lwa vayo, mmbo shishemuningaa findo fya pya na nnduma nnini nnu. Kweekyo ulaalu shivieny, mushoore na ishitammbashuya urango lwa-vayo.”

⁷Vakarouwa mangyi lya kavii. “A nkye mangyi navie-se mashinga akwe yoorya elyo, neese lushenrammbuya kya urango lwa vayo.”

⁸Yoo kweni, mangyi kavarouwa, kavavia, “Shiishi-deny sheelyi yeni mmbo muketevesa mwaanya wiire, mashika mwiishi mukamanya kilya shamma yaamba;

⁹nkyo kindo kishetanyikaa kwany kwakooya mwalemwa ishirammbuya, neeshivia urango lwa yoorya yelyo. Eni mmbo mulekulosha, mukaishivya yaamba wongo na ishilemba, mwikusirye sheelyi nkonu umwi findo fishiidimaa yalashika. Kweekyo, shivieny yoorya elyo mmbo lyaamba-ki, naambo shimanyi sheelyi mushiidimaa ishirambuya na urango lwavayo.”

¹⁰Vakaldayo valya vakarouwa mangyi, vakammbya, “Nkundekee-fo nndu kunu ulaniny ashiidimaa itana findo mangyi akunndye-fo, mashika nkwiifo mangyi moose atiri finya na wiidimi, kashevesa vaanga, veelafya na vasavi mbony sha yei-fo.

¹¹Mbony yei mangyi avesa, mbony shuumu nnu, nkwiifo nndu ashiidimaa irambuya mangyi mbony yei-fo, kuuta maruva yoo a mimuyo.”

¹²Kimaruma kya-vayo, mangyi kakunyafwa, karooywa nngo kaniingya ishingo kaamba; vandu vaantu woose vakee kulya urukeny lwa Babilony vawaawa.

¹³Kweekyo mbony yei ikakwaana kundo koose, naakwa ni Danieli na vaoroye nawe mmbo vekeeruuywa naambo vawaawa.

¹⁴Naasa Danieli kalatya Arioko yeto nniini wa itorito lya vasikari veeringa mangyi ekwiisaa na werei uniini nnu, eto enrumwa indewaa vandu vaantu woose kulya Babilony.

¹⁵kavia Arioko, nniini wa itorito lya vasikari yewo veeringa mangyi kammbesa, “Nkyiki elyi ishingo lya mangyi lyava yuumu indo?” Llyony Arioko kavia Danieli ndesa mbony tikai.

¹⁶Llyo Danieli elatya mangyi kantereva ammbonisye mwaanya weeshekwaanannya nawe naambo aidimi inrammbuya yoorya elyo lyakwe na urango lwavayo.

¹⁷Naasa Danieli keenda kandevia: Hanania, Meshaeli na Asaria ndesa mbony tikai.

¹⁸Kavavia vatereve Iruva yeu wa iruveeu, naambo avalyilye kimaruma kya yoorya elyo naambo valanderumatwa, ando amwi na vandu vaantu woose va Babilony.

¹⁹Llyo Danieli esukuywa yoorya llya kio kilya kyeni. Danieli kaarafuma Iruva wa iruveeu kaamba,

²⁰“Iruva yeto eeshi fyoose kava muni finya, Nndumi Iruva narumishwa llung'anu na llung'anu.

²¹Mmbwe muni mikonu na fyeeri, mmbwe asaleesa vamangyi kooka-fo kavaterwa-u. Mmbwe yeto aava urango na umanyo.

²²Mmbo atambashwa findo fisurumi, na fya kirika, ekyo kyikee kisurumi ireeminy mmbo akiishi, nawe karingityo nsa.

²³Mmbo shakurumisha nekwiindya, woi Iruva wa vakuu vakwa. Elyi kwashiniinga urango na finya, kwanshirouwa kiterewo kyakwa, kwaveloora neekyo lundeviaa mangyi.”

²⁴Naasa Danieli keenda kwa Arioko, ulya mangyi alemmbia nandewaa vandu vaantu woose va Babilony. Kantereva kammbia, “Kulawee vandu vaantu va Babeli-fo, shirwaa kyeny kwa mangyi, neeny shindenrambuyaa yoorya lyakwe.”

²⁵Arioko ekiita indo, kaangusya nnu irwaa Danieli kwa mangyi, kammbia, “Shankooya umwi wa mashinga a Kiyuda ekee kifingyony ashidimaa itambashwa yoorya lya mangyi.”

²⁶Naasa mangyi kavia Danieli ulya evangwaa Belteshasa, “A ndesa kushidimaa ishivia yoorya lyakwa na urango lwavayo?”

²⁷Nawe Danieli kammbia, “Mangyi mmbee, nkwiifo nsavi, nta mwiilafya, nta mwaawuya fisuku, nta vaanga ashidimaa ikutambashuya ekyo-fo.

²⁸Lyo kwiifo Iruva wa Iruveeu yeto mwisukkwa fyama fyoose. Mmbwe aleora Mangyi Nebukadnesa findo fikaa fishe. Ulaalu mmbo shikutambashuyaa kindo kilya kuloorya kwiilele.

²⁹“Kyeeri kweelele Mangyi mmbee, mmbo kuleorya kya findo fishaa, ni Iruva wa wende alekoora findo fikaa fishe.

³⁰Yeny Danieli mmbo shilerambuywa yoorya elyo, nshi-mmbo shitiri nnu urango shailannya vandu vengyi-fo, mmbo kileva indo, naambo Nndumi Iruva nakooye ikumanyisya kya findo efyo fishekaa fishe mbee yafo.

³¹“Mangyi mmbe, mmbo kuleorwa ifwanu iniini nnu lyisalelyi mbee yafo, lyimikaa lyikaerese.

³²Nrwe wa-vayo ni saabu shiilyise nnu, maako na mbafu ya-vayo ni fya fesa, na mwiina wa-vayo na kyisi fikava fya arera.

³³Marende akava a minya, ngyayo na mini fikavaka minya isasangyi na uteeri lwa yuumba nungu.

³⁴Naasa elyi kweefo kusongololo ilola, iwe iniini lyikakuruka yeni nyilakunwa ni nndu, lyikashekapa marende a ifwanu llya lya minya na uteeri, lyikafisha-fisha.

³⁵Fya uteeri, arera, fesa na saabu, fyoose fikasewa fikava kiluulyi, fikavaka nswa mmamiri wa uuru. Naasa uraato lukasha llya-yeni lukavivita-u kiluulyi kilya, nta kulamanyaa kweiyo kindo. Lyo iwe llya lyikang'ana sha ifumbu lyikasikya uruka loose.

³⁶“Elyo llyo yoorya lyafo Mangyi; Ulaalu lushekuviany urango lwavayo.

³⁷Yewe Mangyi mmbee, mmbo kwiilanyi vamangyi woose. Iruva wa Iruveeu mmbo alekuvika mangyi kakuniinga finya, wiidimi na itumbe.

³⁸Ulana loose lukava si yafo, kwashillya findo fyoose, mafisi na ndeye. Nrwe ulya wa saabu nnyewe, mangyi mbee.

³⁹Numa yafo yewe mmbo kusheshaa umangyi lungyi, lulatiri finya sha elu lwafo. Numa yavayo lushe lungi-da, llo lwa arera, nalo lushillye ulana loose.

⁴⁰Numa-se lushe umangyi lwa kaana, lutiri finya, lwiidimi ifisha-fisha neepapara wo kindo. Elu mmbo lushe fisha-fishaa sha minya neemamita ngyumangyi toose tilusongoye.

⁴¹Kulelollya-da alya ngyayo na mini tekee ta uteeri usasande na minya. Nkyo elu mmbo lushevaa umangyi lukwaavye. Kumwi lutire finya sha minya, mashika minya yeesangyi na uteeri.

⁴²Mini ya minya isangyi na uteeri, kyaamba sheelyi mmbo lushevaa umangyi taari imwi lutiri finya na kungyi lukee ufwa-fwa.

⁴³Llya kulelollya minya mmbo yeesasangyi na uteeri, nkyo kyaamba veeshillya vavayo mmbo vashekundaa iitikya vandu vawo vasasange kwa ikoora, lyo nkishevangaa-fo, vave sheelyi minya ilavaa isanga na uteeri ive kindo kimwi.

⁴⁴“Kyeeri ekyo kya vamangyi yewo Iruva wa iruveeu mmbo ashevikaa umangyi lulakaa lumande. Nta llukaa luvingwa-fo, mmbo lushemamitaa ngyumangyi yeto tingyi toose, llo lweengere ikaa-u llung'anu.

⁴⁵Ndesa kulelollya iwe llya lyikuruka yeni kulore lyapaanwa nkindo, na shaasa lyilefisha-fisha ifwanu llya lya minya na arera na uteri na fesa na saabu. Iruva Nniini mmbo akuvia Mangyi mmbe, Nndumi Iruva mmbo akuvia kindo kisheshaa numa. Shankuvia fyoose shaasa kuleorya, shavekutambashuya na urango lwavayo loose.”

⁴⁶Nawe mangyi Nebukadresa akiita indo kawa-si kifulu-fulu kamfiirya-ndi. Kavavasya Danieli nautyo fyaanu na firaso.

⁴⁷Mangyi kammbya, “Ni kya dede Iruva wafo mmbwe wa dede kailanya maruva engyi moose. Nndumi Iruva ailanyi vamangyi, kaveva ni mwiidimi isukuya vandu findo fisurumi fya ngyende, fyeeresye. Ekyi mmbo shasukukyo mashika elyi kwaidima itambashwa kyama ekyi kyakwa.”

⁴⁸Nalyo mangyi kang'anisa Danieli, kavensimba findo fya pya fiingyi. Kava nshilyi nniini wa Babilony na nniini va vandu vaantu woose wa Babilony.

⁴⁹Nawe Danieli katereva mangyi Shadraki na Meshaki na Abedneko vavikwa vangari veesalallya uruka elo luringitye Babilony. Danieli we kakaa kulya kweni kwa mangyi.