Read BIBILLYA Mareiyo Meele a Iruva DANIELI 8 Bible Online

DANIELI 8 - BIBILLYA Mareiyo Meele a Iruva bible

DANIELI 8

¹Kwiike mwaaka wa kararu, ukya Belshasa, ammbe mangyi, lyikashisheya yoorya lyingyi yen Danieli kuuta-fo llya lya mbee.

²Kyeeri shelollya mmbo shekee Susa, muri nniini wa Elam. Shiiselalyi mbai ya mura wa Ulai.

³Kyeeri shepoo miso mmbo shelollya suva yiisalelyi mbai ya mura. Suva itiri mbembe ivii shaasha, lyo elo lumwi, mmbo lwekee waasha ngota elo lungyi; neelo waasha mmbo lumiiye numa ya elo lungyi.

⁴Shalollya suva yeyo iikapanaa ilella na taari ya nkwaany, na ya ndoo na taari ya sinde, kuleefo ifisi lyimwi lyileidima isalala nta ikweesa finya nayo; mmbo yekeetana ngata yakukunndya na ilyang'aa deny.

⁵Elyi shiifo nsoongyaa, shalollya mburu ya woro yuuka na taari ya nkwaany ilapaana sumbai, ngata yekeerisha; nayo mmbo yeetiri wombe lutiri finya yoo nnang'ani a miso a vayo.

⁶Ikalatya suva ilya ya mbembe ivii sheelollya yiiselelyi mbai ya mura. Ikairishya suva ilya kwa finya ta-vayo toose.

⁷Woro ilya ikasha kufii, ikakapa suva ilya kituri kwa finya, na mbembe tilya ivii ta suva tikafika. Suva ilya ikatura finya yekusiika, ikatuulwa-si ikakashywa-u, nta kulakee-fo nndu aidima yeekya.

⁸Nalyo woro ilya ikeengera ilyang'aa neekung'anisa. Ikitima deny wombe llwa lwavayo lukafika. Ando a-vayo tikammya-u mbembe iinya wo lumwi lulollye taari ya-vayo.

⁹Efo wombeny llwa lumwi lukammya-u wombe lungyi udu, lukang'ana nnu finya ya-vayo ikalamya taari ya sinde, na ya ngama na efo Urukeny lwa Kyaasa.

¹⁰Elu mmbo luleng'ana deny lukafikya ando, ikapana na ironda lya iruveeu, na nyinyiri, lyikafwallya maata-si lyikatikakasha.

¹¹Lyikakurosa kutani lyakapana neeto Nniini wa ironda elyo llya iruveeu neemmbinga. Lyikaseleesa firaso fyeekora na muro, lyikatefusa na mwiinndye wa mmba ya Iruva.

¹²Lyikeepwa ironda amwi na firaso fya muro fya wo nkonu iteeryeny. Nalyo yiindya lya dede lyikarewa-fo, wombe elu lukavinga kya wo kindo lulekunda itana.

¹³Naasa sheeta nsu umwi ereraa, na nsu ungyi kammbesa; a nkishiipoo kyeeri kifie inda yoorya elyi: Firaso fya muro iteendwa, iteere, na itefusa ando erasya na ironda ikakashwa na marende?”

¹⁴Nsu ulya ungyi kandouwa kammbia, “Mmbo kivaa indo ando a mikonu fiku fivii na mayana araru ngama na nkwaany. Llyo mmba ya Iruva ishevauwaany.”

¹⁵Kyeeri shekesoongya kya yoorya, naasa llya yeni, kukasalala-u yoo mbee yakwa avakye nndu.

¹⁶naasa sheeta unyanga lwa nndu, luuka kulya nnang'ani ya mura wa Ulai lukaamba, “Gabrieli, nrambuye kya filya alollya.”

¹⁷Nawe kashesalala kufii neeny, shaawukwa nnu, shawa-si kifulu-fulu. Nawe kashivia, “Yewe mwana wa nndu, manyaany mbony yeti. Moorya yaa, mmbo yoora kyeeri kya mafurumyony a ulana.”

¹⁸Kyeeri ekerera neeny, shatirwa nrwe shiroo, shalala-si kifulu-fulu. Indi-we kashitira kashiseleesa.

¹⁹Kashivia, Arannya shikuvie, kumanyi, nyashi eyo ya Nndumi Iruva ishekaa ishe, na ngata ishevaa. Moorya ya ashoora fyeeri fya mafurumyony.

²⁰“Suva ilya kulelollya itiri mbembe ivii ni vamangyi va Umedi na Persia.

²¹Nayo woro ni umangyi lwa Ugiriki. Nalo wombe llwa lwa finya yoo nnang'ani ya miso ni Mangyi wa mbee.

²²Wombe llwa lulefika, na ando a vayo, tikamya-u tingyi iinya, mmbamangyi vaana vashesalalaa, lyo vamangyi valatiri finya sha-we.

²³Kyeeri ngyumangyi yeto tishefikya umando lwa-vayo, lwaisisya na ituuro vandu, llyo asheshaa-fo mangyi ungyi, nkaari, eeshi fyaaso, atiri finya.

²⁴Mmbo ashetiraa finya niini nnu, nndu aeresye, mmbo ashelyamaraa na itana findo fiingyi fikasha. Nndu ashiidimaa irumata, newaa naakwa ni vandu veele va Iruva veni.

²⁵Kimmba akee nndu llyang'a na llembi mmbo ashevesyoo deny, neekung'anisa we muni, we muni nashemamita vandu vengyi kulaore vamanya, ashefikya ando a ikunda ikapana na mangyi yeto nniini ya vamangyi vengyi woose. Lyo we mmbo ashemamitwaa, kuleefo ipaanwa ni woko lwa nndu wa vandu.

²⁶Myoorye ilya ya nkwaany na ngama, ni ya dede, ndesa kulevio, niindo kishevaa. Lyo ulaalu kive mbele kirika kyafo kumuni, kimmba kushiiraa-u fyeeri kwiite nkonu wafika.”

²⁷Kyakwa yeny Danieli, mmbo shilerovywa shalwaa ando a mikonu mive. Numa shakwiipo, shandewuya mashoreny akwa kulya kwa mangyi. Indi moorya yoo mmbo ileshifulukya, shalemwa-deny iimanya.