Read BIBILLYA Mareiyo Meele a Iruva HOSEA 10 Bible Online

HOSEA 10 - BIBILLYA Mareiyo Meele a Iruva bible

HOSEA 10

¹Israeli ni nsabibu utiri ndunda shiingyi. Shaasa valefumbuka niindo valetana fitara fyeerasya. Shaasa uruka lwawo lulevavasywa niindo-da nawo valeengera ngo ta mawe ta iindya.

²Vandu yeva vatiri mirima milembi nkuti ulaalu vataiywa kya uravi lwawo. Iruva mmbo ashesammbwaa fitara fyawo fyeerasya neewundwa-wundwa ngo eto tawo sheele.

³Nalyo yeni vandu yeva vaambe, “Mmbo lulera lulaindya Nndumi Iruva lukatura mangyi. A mangyi nkyokyi eelutannya lyo?”

⁴Mmbo varera marero a ruu neevika fyaasa fya mweelu. Usumanu lukafuluwa, lukava mooro nkasha wammya ireminy isha.

⁵Vandu yewo vakaa efo muriny wa Samaria mmbo vashereremaa neefwa elyi vasheretaa ngashe yeyo ya saabu ikee Beteli. Wo na nkohani eto wa ngashe yeyo vasheiyaa-u. Mmbo vashekaa kiiyony kimmba vashesokwaa itumbe elyo lya saabu.

⁶Ifwanu elyo mmbo lyishekamarwaa lyirawa Siria, lyive llo usanu kwa mangyi ya Siria. Israeli mmbo ashalyilyiswaa naoni isuka nnu kimaruma kya iindya ifwanu elyo.

⁷Na mangyi yakwe nakurikwa sha ilalo lyiriwa mmura.

⁸Findo filya vekeindya ifumbuny lya Aveni mmbo fishelyamarwaa. Miinga na ngorosho mmbo fishe lumbaa fitara efyo fyeerasya. Vandu vashefwaa vavie mafumbu lusikyeny, na fidooro, Luwoyeny.

⁹Nndumi Iruva aamba indi, “Vandu va Israeli mbalemmanda ishilyamarya uka ulyamari llwa lwawo lwa Gibea-fo. Fira ilya ya Gibea mmbo ishekaa ivasore. “Mmbo nshewoyaa vandu yeva varavi shivakabe.

¹⁰Vandu va masanga engyi vashevevakyanaa, vakabwa kyeendwa ni uravi lwawo.

¹¹“Israeli mmbo eevakye ngashe shiloshe nisha naambo ikape nganu na nsia. Lyo mmbo shilembikya iryo efo singony yakwe shisha naambo ishora lyakwe lyirwaa. Yuda naremi na Israeli nakoninde maboka.

¹²Shavavia, ‘Rema, fisha nsengo, vaaya usumanu kwiilule mbora yavayo yeeshikusirya. Nkyeeri kyafo kyeeshiwuiya ulaalu, yeny Nndumi Iruva wafo, neeny shikupusuye mbora.’

¹³Lyo ando eetana indo mmbo luleronga uravi kwailula fimu fyavayo. Ulaalu kwallya ndunda ta wongo lwafo. ‘Mashika elyi kulevika makari afo a fira nsia na wiingyi lwa itorito lyafo,

¹⁴fira mmbo ishesheyaa vandu vafo, na turuve tafo toose tiwunduwa. Mmbo kishevaa sha llya mangyi Shalmani alyamara muni wa Betherbel, na vaka na vana vakamamitwa.

¹⁵Yeni vandu va Betel niindo kyany kyishevaa, kimaruma kya uravi elu muletana. Elyi fira ipooka indi, na mangyi ya Israeli mmbo afwaa.’”