Read BIBILLYA Mareiyo Meele a Iruva HOSEA 9 Bible Online

HOSEA 9 - BIBILLYA Mareiyo Meele a Iruva bible

HOSEA 9

¹Yeni Israeli, reny sukukuu ta ifura ta vandu va masanga. Mmbo mureeye Iruva waany mukaindukya mbai. Mmbo mulekurambikya muveni mukavaka vaka va shia va Baali mukalanga nganu yeyo alemuura nayo!

²Lyo mangyiny mmushewonisaa nganu-fo, nta mafura nta mfinyo-fo.

³Vandu va Israeli mmbashengeraa ikaa efo urukeny lwa Nndumi Iruva-fo, mmbo vashewuyaa na Misri vandelya shoonga shitefusu kulya Siria.

⁴Efo ngyurukeny yeto sheni mmbalollyaa mwaanya wa yuutya Nndumi Iruva firaso fya mfinyo-fo ao firaso fingyi-fo. Shoonga yaawo mmbo ishetefusaa wo nndu ailya ive sha shoonga yalyiwa kiiyony. Ive shoonga yefweera shaa-da, lyo nshi kindo kya yuutya Nndumi Iruva-fo.

⁵Elyi kyeeri kisauwe kisheshaa kya yuutya Nndumi Iruva mirumwa na sukukuu, mmbo vashentannya-ki?

⁶Kyeeri urumato lusheshaa lukooye vandu veenyanyakye, Vamisri mmbo vashevaumbyaa nevarika kulya Memfis! Findo fyawo fya fesa mmbo fishelumbwaa ni usaka ando amwi na kyeny kwawo kuve ngorosho ya miinga.

⁷Kyeeri kya urumato llyo kyansha, vawonise weesi lwawo. Kwakooya kyautika indo llyo Israeli ashemanyaa kyammukooya. Mmbo mwaamba “Nkisuku yeu ni nrung'ani, kava nsukwa.” Eni vandu mushisuuye nnu kyeendwa nngyulyamari tany ing'ana nnu.

⁸Iruva mmbo aleshiruma shiikimbe vandu vakwe va Israeli. Lyo wo ando sheenda mmbo ukunndye ishireiya sha ndeye. Naakwa ni efo mmba ya Iruva vandu mmbo vakee vakiduva va nkisuku.

⁹Vakaora uravi deny kya efyo fyoose vakeetana vakava sha llya vekee kulya Gibea. Iruva mmbo ashekumbwaa ngyulyamari tawo navataiye.

¹⁰Naasa Nndumi Iruva kaamba, “Elyo shekooya Israeli mmbo eevakye nsabibu wa kasa. Shilollya vakuu vany mmbo veevakye ndunda shisha ta mbee ta nkuu tivirye. Lyo kyeeri valefika ifumbuny lya Peori vakapooka iindya Baali, llya yeni vakava usutu sha maruva yoo valeendya.

¹¹Itumbe lya Israeli mmbo lyisherumbukaa sha ndeye lyimaye, kulakikaa-fo vana vawonikaa kwawo, nta vaka vakufingye, nta vana-fo.

¹²Naakwa walela vana, nshivaraa na mwi nata umwi-fo. Shanra vandu yeva indo mmbo vashesheywaa mfindo fisheeresee.”

¹³Nndumi Iruva, shallollya shaasa vana vawo vashevingywa neewaawa.

¹⁴A shakutereva-ki kya vandu yeva? Finga misanga ya vaka vawo, valemwa yootisa vana vawo!

¹⁵Nndumi Iruva mmbo aamba. Uravi lwawo nnyalya Gilgali lummyi. Ng'u shepookya ivaswa. Na kimaruma kya uravi lwawo mmbo nshavaumbutaa vauke urukeny lwakwa, nta nshivakundaa-se-fo, kimmba na vasongoru vawo valeshikapa mungo.

¹⁶Vandu va Israeli mmbo vavakye nri wammuuma efo miraariiny ulavikaa nta ndunda. Mmbashetiraa vana-fo. Na naakwa veetira, mmbo sheevawaa na kyikava veevakundaa nnu deny.

¹⁷Iruva yeu shikeendundya mmbo ashelemaa vandu vakwa, mashika a elyi valema imwaaranya. Nawo mmbo vashevaa veeraaraa efo masangeny engyi.