Read BIBILLYA Mareiyo Meele a Iruva YOELI 2 Bible Online

YOELI 2 - BIBILLYA Mareiyo Meele a Iruva bible

YOELI 2

¹Yeni va Sioni, kapeny mbembe, Ongoreny yeni mukee ifumbuny yeele vandu va uruka woose vareremye-u Kimmba nkonu wa Nndumi Iruva wansha.

²Nkonu eto ushevaa irrema na ituu nkonu muu na mafishi asherandavaa. Ironda iniini lya nre lyivakye ireema lyishesikyaa mafumbu. Nkulekee-fo kindo sheekyo-fo nta kishekaafo-fo.

³Ilya lyavayo lyishevakaa muro. Efo kulore tamfika n'sha nnda wa Eden, lyo numa n'kasa koomu. Nkwiifo kindo kikesaa-fo-fo.

⁴Mmbo tivakye frasi-ta fira shaasa tirishaa.

⁵Ntiri wavayo ukavaka wa makari a fira ashivaa kundo kwa fidooro, niindo tisherumbukaa, Tivevaka finya ya muro elyi wakora makyenya moomu, ao sha itorito vakaari va fira.

⁶Veelola vasheerevee, fisangu fipaluwa palu mmbweerei.

⁷Nrie yeto mmbotisheshaa na finya nnu, tirwe na uwe sha itorito va fira, wo imwi iishi shia yavayo tilateeree.

⁸Kulaifo nta imwi ikunaa ingi, wo imwi na shia yavayo, wo imwi ishiira mbai kulaifo kibaaya.

⁹Mmbo tarumbukya muri tikasaama na isimamba na yaanga efo mmba tishiraa neefo madirisheny tikavaka msanyinyi.

¹⁰Shaasa tikeesha ulana na ngina mmbo fyarerema. Na nkyeere na mwiiri fikareta sa ando amwi na nyinyiri deny.

¹¹Nndumi Iruva mmbo avavasya ironda lyakwe, valya vamwiirikye vakava veengi neetira finya. Apaa nkonu eto wa Nndumi Iruva shaasa weeresye. Mmbi asheturunyaa?

¹²Naakwa ni ulaalu Nndumi Iruva arera na vandu vakwe kaamba, “Kuryeny kya dede deny mukootoye neekapa kiiyo.

¹³Nshi masara any murandwaa-fo, m'mirima yaany, muwuiye Nndumi Iruva waany.” Shamashika mmbwe atiri ilyillya na isarya, Nta nshi mwaangu wa irosa ngoo-fo, mmbo aingifyo ni ilyillya, nalataiyaa makasha.

¹⁴Kulakooye Nndumi Iruva ashealashikaa naluniinge-se mbora, llyo neeni mushemutyaa firaso fya nswa na mfinyo.

¹⁵Yeni va Sioni, kapeny mbembe Kusanyiryeny veengi nnu mukootoye,

¹⁶Sanyiryeny vandu woose mukootoye, mukwiilyise, woose, vakuu na vana neewo vashongaa. Naakwa ni Nndumi Iruva wa walyi nasomukye, na nafummyi na poo.

¹⁷Vakohani vefurukannya Nndumi Iruva ando kweele na yoo mwangony wa mmba ya mwiindye vaiye netereva, veshaamba, “Voi Nndumi Iruva auwany vandu vafo, nta kulalotore vandu va masanga engyi valwarare na iluteenda, veshaamba, ‘AIruva waany akee kwi?’”

¹⁸Naasa Nndumi Iruva kalyilya vandu vakwe kavaiya mashoya na mafura kutani mwawuura shapu, nta mmushekivaa-se seko efo vanduny va masanga-fo.

¹⁹Nndumi Iruva karouwa, kavia vandu vakwe, “Loleny, shimwengyee kyeelya na kyeena, na mafura muvuure shapu, nta mmushekivaa-se seko efo masangeny-fo.

²⁰Ironda elyo lya nrie lyileuka taari ya ndoo mmbo nshelyumbutaa, kyenga kyikee mbee lyeende efo urukeny wuumu, na kyenga kyikee numa efo yeeveny ya ngaminy, na tingi yeeveny ya nkwaany. Mikying'a yavayo isheraa Neeny nshetaiya efyo fyoose tilemutannya.”

²¹Ewe uruka, nta kulairyae, Fura neekapa nkoru kimmba Nndumi Iruva ankutanya finiini.

²²Neeni mafisi nta malasavae, mashika mooro ushemmyaa kundo kwa kasa, na miri ishevikaa ndunda, misabibu na miri ya mafura.

²³Eni va Sioni fureny-te mu kyesye Nndumi Iruva akee Iruva waany, kimmba we ashemuningaa mmbwa ya kisie na mateeri shaasa akundye uka elyo mbee.

²⁴Neefo muunguny kusheishwaa nganu, neefo raanriny kusheishwa mfinyo na mafura.

²⁵Neeny mmbo nshemuviryaa muu kya myaaka yeyo mulelyiwa ni nrie, na uleri mashanga na ngallya.

²⁶Neeni mulye newuura marumishe irina lya Nndumi Iruva waany, yeto amutanya finiini indo. Nta vandu vakwa mmbashekisavaa-fo.

²⁷llyo mushemanyaa sheelyi mmbo shikee na vandu vakwa va Israeli, nnyeny Nndumi Iruva, Iruva waany, kulaifo ungyi, nta vandu vakwa valashesavaa.

²⁸“Numa yavayo mmbo nshepusuya vandu vakwa woose mumuyo wakwa, vana vany va kyuumi na va kyika vasheawuyaa fisuku. Vamiku nawo woorye moorya, na vana vakoe vashesukuywa myoorye.

²⁹Naakwa ni veemufurukannya mmbo nshevapusuyaa mumuyo wakwa, womi na vaka vapusuyo mumuyo wakwa.

³⁰Mmbo nshevikaa ngyende alya nginii-u na kunu urukeny, ipuswa samu, muro na mafishi na nsu fisherandavaa.

³¹Nkyeere urete sa yavayo na mwiiri ufwani samu. Efyo filollyo kulore nkonu eto nniini wa Nndumi Iruva weeresye wansha.

³²Lyo yewo vashefuyaa Nndumi Iruva vashekirwaa. Kimmba Nndumi Iruva ni indi aambaye, Efo ifumbuny lya Sioni na Yerusalemu veefo vashekirwaa, mmbo ewo Nndumi Iruva ambasauwa.”