Read BIBILLYA Mareiyo Meele a Iruva YOELI 3 Bible Online

YOELI 3 - BIBILLYA Mareiyo Meele a Iruva bible

YOELI 3

¹Nndumi Iruva mmbo aamba, kyeeri ekyo nsheviyaa Yuda na Yerusalemu ngata ilya ya mbee,

²mmbo nshesanyiryaa vandu va masanga woose, vasheutyo uvingo kya efyo fyoose valetannya vandu vakwa, elyi valenyanyata vandu vakwa Israeli efo masangeny engyi. Vakaava na uruka lwawo, llo lwakwa.

³Vakavekapya vandu vakwa kura. Vakakumba vana va Kyuumi na va kyika vawoni wari.

⁴A yeni nkyoki-deny, yeni va Tiro na Sidon, na ngyuruka ta Vafilisti? A ndesa musheshitaa? Neeny mmbo nshemuviryaa!

⁵Mmbo mulekurika fesa takwa na saabu na masaa akwa mukavika efo mukeny tany teerasya.

⁶Na vana va Yuda na va Yerusalemu mukavambya Vagriki.

⁷Lyo ulaalu nshevaviraa vauke-fo. Efyo mulevatanya nshemutanya yeni indo.

⁸Vand vany va kyuumi na va kyika vashekumbywa Yuda, vashekumbywa Vaseba, kwaasha deny. Ni Nndumi Iruva aamba indo.

⁹Na eki vieny vandu va masanga woose. Deesyeny vasero va fira vasalale itorito woose

¹⁰Alasheny makumbi any nave ngyusu. Na makasi a matavi nave mafumu. Na kava mfwafwa nkuti neende fireny.

¹¹Sye kutakureny, yeni vandu va masanga woose, mukusanyirye. Woi Nndumi Iruva, ruma itorito vafo vashekapana.

¹²Vandu va masanga nkuti vakusanyirye uviny yoo imungony lya yaanduywa. Alya nng'u yeny Nndumi Iruva nsheutyaa vandu va masanga uvingo.

¹³Kimmba vakee varavi nnu, vashevewa sha nganu yoo mailullyony, Vavefotwa sha ndunda ta nsabibu tikamwaa tuutwa mfinyo.

¹⁴Mashika nkonu eto wa Nndumi Iruva, ukee kufii; Yoo imungony elyo mmbo kushekumbya-u nsemu nniini deny wa vandu kwa yuutywa uvingo.

¹⁵Nkyeere na mwiiri fikoyaa fyanreta sa yavayo, na nyinyiri ntikivaa-fo.

¹⁶Nawe Nndumi Iruva mmbo asheitiwaa auka Sioni na Yerusalemu. Ngina na uruka fishereremaa. Lyo Nndumi Iruva ashevaa kirishyony kya vandu vakwe na kya vana va Israeli

¹⁷Llyo mushemanyaa, yeni Israeli, sheelyi yeny ni Nndumi Iruva, Iruva waany, shikee ifumbuny lyakwa yeele lya Sioni. Nato Yerusalemu mmuri mweele. Vandu va masanga mmbakaa vauvinge-se-fo.

¹⁸Kyeeri ekyo llyo mafumbu avayo ashesikyoo ni misabibu, na ng'umbe, na ngyusoka toose ta Yuda tisheishwaa mura. Na usoka lusheeka luuka efo mmba ya Nndumi Iruva lushenisa Imungo elyo Shitimu.

¹⁹Misri kushevaa nrapu, na Edomu kuve uruka umunu, kimaruma kya efyo valetannya vana va Yuda, vakapuswa samu ilatiri mbese urukeny lwawo.

²⁰Lyo Yuda ashekaau llung'anu, na Yerusalemu nsalale marika na marika.

²¹Neeny, yeny Nndumi Iruva nshekaa uwe ya ifumbu lya Sioni.