Read BIBILLYA Mareiyo Meele a Iruva AMOSI 2 Bible Online

AMOSI 2 - BIBILLYA Mareiyo Meele a Iruva bible

AMOSI 2

¹Nndumi Iruva kaamba, “Kya Moabu iwuiya ullyamari kyeengyi nkuti shivakabe. Mmbo valemina mafwa a mangyi ya Edomu elyi valeakora.

²Mmbo nsherikaa muro urukeny lwa Moabu, shikore turuve ta Kerioti. Vandu va Moabu mmbo vashewawaa nkyorongye kya fira elyi maranda ashekapwaa na vasikari woongore.

³Nndumi Iruva aamba, ‘Mmbo nshewaa mangyi ya Moabu na vasongoru va uruka.’”

⁴Nndumi Iruva mmbo aamba, “Kya Yuda iwuiya ulyamari keengyi nkuti shivakabe Mmbo valemina ufundo lwakwa nta valaringe mavavaso akwa. Vakaevetwa maruva a wongo alya meni vakuu vawo valeendya. Lwakwa nta valaringe mavavaso akwa. Vakaevetwa mmaruva a wongo alya meni vakuu vawo valeendya.

⁵Naasa nsherikaany muro efo urukeny lwa Yuda shimamite turuve ya Yerusalemu.”

⁶Nndumi Iruva kaamba, “Kya Israeli iwuiya ulyamari keengyi nkuti shivakabe. Mmbo vakeekumba vandu vasaari veende ushingeny kimaruma kya sye, nawo ni vandu vakiva valatiri nta kindo.

⁷Mmbo vakakasha vandu vakiva valatiri ngarami, vakavavivya efo mbai. Mmbo kukoyaa nndu na mwana valalaa na nndu nka umwi ntuusi, vakatefusa irina lyakwa.

⁸Wo ando kwa miindye mmbo kukoyaa-u vandu valaaya soori tilesokwa vakiva kimaruma kya sye. Neefo mmba ya Iruva vakaniiya-fo mfinyo wasokwa valya vatiri sye.

⁹“Na kimaruma kyany mmbo shilemamita Vaamori, shamukapannya yeni vandu vakwa. Nawo mmbo veetiri finya vakaveva vaasha sha miri ya nsitony.

¹⁰Mmbo shilemuuta Misri, shamutetera kasa koomu myaaka makumi aana, shamuniinga uruka lwa Vaamori luve lwany.

¹¹Shasauwa vana vany vave vakisuku, na vandu vakoo vave va kyaasa. Nshiindo-se, yeni vandu va Vaisraeli?” Ni yeny Nndumi, shavesa indo.

¹²Lyo yeni mmbo muleniinga vandu yewo va kyaasa wari, mukeema na vakisuku valarere.

¹³“Ulaalu mmbo shimuvavaryaa efo si, murovyo muve sha ikari lyirovyo nnganu.

¹⁴Naakwa ni yewo veeshi irisha mmbasheturunyaa-fo. Na vandu vatiri finya mmbo vasheelelekaa, nta itorito va fira mmbasheidimaa ikuuta-fo.

¹⁵Veasa na mfe mmbo vashelemwaa, na veerisha vare valateshwa nta urende. Nta vesaama frasi mmbashekyaa-fo.

¹⁶Naakwa vava itorito vatakusu inda nkonu yeto mmbo vashetulaa fisha fyawo yoo si varishe mbereto.” Ni Nndumi Iruva aamba indo.