Read BIBILLYA Mareiyo Meele a Iruva YONA 4 Bible Online

YONA 4 - BIBILLYA Mareiyo Meele a Iruva bible

YONA 4

¹Lyo ekyo nkilekisenya Yona-fo, katirwa ni unyafi.

²Naasa Yona kavia Nndumi Iruva, “A Nndumi Iruva yeny nshilemanya deny kulore shenkupoo kyeny sheelyi ekyo nkyo kushetanaa? Nkyo ekyo kyesheengye shakutakura nnu irishya Tanshishi! Mmbo shiishi shamanya Yewe ni Iruva muni ukundi na wisarya, kwatira usisiryo, kukee mfoo, kwaveva mwaalasha kilya kikasha kyeekapa.

³Kyasia Nndumi Iruva shiwaa nakamwi. Nkyeni shafwa ngota nshengeraa ikaa na muu.”

⁴Nawe Nndumi Iruva kammbia, “Ni usumanu dede Yona kutirwa ni unyafi indo?”

⁵Yona kooka-u keenda kulya taari ya ngama ya muri. Kakusongosya nganga shidu kakaa kirisheny nalole shaasa kivaa kya Ninavi.

⁶Nawe Nndumi Iruva kamiisa swany nri utiri irumbushi naambo uvikye Yona kirishe nalavaviswa mmwi. Yona kafura kawuiyo mmuu deny.

⁷Elyi lya ndesi ngama Iruva karuma ikuru lyikalya nri ulya, nato nalyimwi nsi ukooma.

⁸Mwi usaami nawe Nndumi Iruva karuma uraato luuka taari ya ngaminy, lutiri nrike, Yona katana asya yuuma kimaruma kya nrike wa mwi winkoraa urorony lwa nrwe, Kutani alanga ifwa. Kaamba, “Nkyeni shafwa ngota nsheengeraa ikaa na muu.”

⁹Nawe Iruva kammbia, “Ni usumanu dede Yona isua kimaruma kya elyi nri eto wooma?” Yona karouwa kaamba, “Yee deny, shisue kutani shafwa!”

¹⁰Nawe Nndumi Iruva kammbia, “Nri yeu mmbo ulemmya na lyimwi na yuuma elyi lya ndesi, nshi yewe nta kuleuvika-u nta iurunndya-fo. Kyeendi lyo mmbo kukeswa kimaruma kya vayo.

¹¹A yeny ndesa nkyesumani shitinnyo Ninavi ukee muri nniini nnu? Na mmwasi yeekyo, muri wa Ninavi mmbo utiri vandu mmwasi ya fiku iyana na makumi avii valaishi mbee nta numa, ukavetira na findo fya mmba fyeevikya fiingyi nnu deny.”