Read BIBILLYA Mareiyo Meele a Iruva MEEKYENA 10 Bible Online

MEEKYENA 10 - BIBILLYA Mareiyo Meele a Iruva bible

MEEKYENA 10

¹Kyasia Nndumi Iruva karera na Mose kammbia,

²“Songosieny maranda avii a fesa, ni ishora lya mfuuru, tive teevaanga vandu vakwaanannye,

³Na kyeeri vakabaa maranda yoo, ironda lyoose mmbo lyishekuummbyaa, yoo mwaangony wa yeema yeele lya ikwanannya.

⁴Elyi vakabaa iranda lyimwi nsi, vasongoru yewo vakee vaniini va mafiku yoo mmbo vasonngwaa ikusora yewe.

⁵Mukankapa unyanga lweematwa deny llyo maronda akee taari ya ngama vashipoo kyaaro, na lwa kavii lweematwa-da, valya va taari ya sinde vashiipo kyaaro

⁶Vashekapaa ngyunyanga teematwa kimaruma kyawo fyaaro fyaawo,

⁷indi elyi ikwaanu lyikwaanisywa amwi, mukapaa iranda, nshi kwa unyanga-fo.

⁸Vana va Aron wo makohani, mmbo vakapaa maranda yoo nang'u ave nng'u mushelatyaa marika any moose.

⁹Na kyeeri mushendaa fireny urukeny lwanyi ikapa nkiduva yeto akeemusisa, llyo mushekapaa unyanga lweematwa, naambo Nndumi Iruva namukummbwe, we Iruva waany mukooye yaauwa maakony a vakiduva vany.

¹⁰Na elyi nkonu wa ifura na nkonu wa sukukuu tany tikee shivavasye, neelyi lya mwiiri mwiiya, mmbo mushekabyaa firaso fyany fyeemamita maranda, na firaso efyo fya unapwe, five fyeekummbwa mbee ya Iruva waany, yeny mmbwe Nndumi Iruva shikee Iruva waany.”

¹¹Naasa mwaaka wa kavii, mwiiri wa kavii, nkonu makumi avii wa mwiiri, ifishi lyilya lyikauka alya uwe ya ando alya

¹²Vana va Israeli vakeepoo kyaaro, uka alya kasa ka Sinai, lyikandefika alya kasa ka Parani.

¹³Nawo vakateterwa, ni Mose shaasa Nndumi Iruva alevavasya.

¹⁴Bendera ya vana va Yuda ikeera mbee ya matorito awo, na Nashoni mwana wa Aminadabu mmbwe aleva nniini waawo.

¹⁵Na mwitetera itorito lya vana va Isikari kava Netaniel mwana wa Suari.

¹⁶Na mwiitetera vana va Zabuloni ni Eliabu mwana wa Heloni.

¹⁷Na yeema lyikaolotwa, na vana va Gerson na vana va Merari, yewo valekamara yeema, vakaipoo kyaaro.

¹⁸Naasa bendera ya ulale lwa Ruben ikeepoo kyaaro na itorito vawo, na Elisuri mwana wa Shedeuri mmbwe yeto eevasongoye.

¹⁹Na nsongoru wa vana va Simion ni Shalumiel mwana wa Shuri-shadai

²⁰Na vana va Gadi vakasongoywa ni Eliasafu mwana wa Deueli.

²¹Naasa Vakohani vakepoo kyaaro mmbo yewo veepoo fiiya fyeele, neewo vengyi vakasaleesa yeema kulare wo vansha.

²²Naasa bendera ya yeema lya vana va Efraimu ikeepoo kyaaro na matorito awo, veesongoyo ni Elishama mwana wa Amihudi.

²³Na matorito a vana va Manase vakasongoyo ni Gamaliali mwana wa Pedasuri.

²⁴Na matorito a vana va Benyaminy vakasongoyo ni Abidani mwana wa Gidion.

²⁵Naasa bendera ya yeema lya Dani, yewo vekee numa ya vengyi woose, ikeepoo kyaaro na matorito awo, na mwivasongoya ni Ahieseri mwana wa Amishadai.

²⁶Na valya valesongoywa ni vana va Asheri ni Pagieli mwana wa Okrami.

²⁷Na matorito a vana va Naftali ni Ahira mwana wa Enani.

²⁸Niindo fyaaro fya vana va Israeli fileva matorito awo vakeengera yeenda na mbee.

²⁹Naasa Mose kavia Hobabu, we mwana wa Reueli Mmidiani, ndeyanka wa Mose, Yese mmbo lurye kyaaro kya yeenda ando Nndumi Iruva aleluvia indi, mmbo nshemuningaa yoo, kushe ando amwi neese lushekutannya mesha, mashika Nndumi Iruva aluvikye kyaasa yese Vaisraeli kyeewona mesha efo kwakwe.

³⁰Kammbia, yeny nshishendaa-fo, lyo mmbo shiwuyaa urukeny lwakwa, na vandu vakwa.

³¹Nawe kammbia, kulalakane neese-fo, shakutereva, mashika ni yewe kwiishi shaasa lushetanaa efo kasa, neewe mmbo kuvaa iriso lyeru.

³²Naasany, kwakooya kwannde neese, mesha yoo Nndumi Iruva ashelutannyaa neese mmbo lukutannyaa indo.

³³Naasa vakepoo kyaaro uka alya ifumbuny lya Nndumi Iruva kyikee kyaaro kya mikonu iraru, na isanduku lya Nndumi Iruva llya lya mavavaso lyikavasongoya mikonu yeyo iraru naambo vakooye ando a yiimuya.

³⁴Na ifishi llya lya Nndumi Iruva lyikavavikya ifweera elyi nsanyiny, kyeeri vakee kyaarony.

³⁵Kyeeri isanduku lyilya lyileira mbee, llyo Mose kaamba kwiipoo, woi Nndumi Iruva naambo vakiduva vafo vanyanyake ewo vakusuuye vakurishe.

³⁶Kyeeri isanduku elyo lyilesalala kaamba woi Nndumi Iruva, wuiyase fiku ikumi, fiku fya vana va Israeli.