Read BIBILLYA Mareiyo Meele a Iruva MEEKYENA 15 Bible Online

MEEKYENA 15 - BIBILLYA Mareiyo Meele a Iruva bible

MEEKYENA 15

¹Naasa Nndumi Iruva karera na Mose, kammbia,

²Rera na vana va Israeli, kuvavie, Elyi musheangaa urukeny lwany muveni, elo shimuninga,

³neeni kyeeri mushekundaa iserisya Nndumi Iruva firaso fyaikora na muro, kwakooya n'kiraso kyeemamita na muro, ao kiraso kyeshishwa, kikee kya kyaasa, ao kiraso kya ikunda, ao kya sukukuu tany tikee shivavasye, naambo muvikye Nndumi Iruva nrungo nsha, wa ng'umbe ao suva,

⁴llyo yeto asheningyaa Nndumi Iruva kiraso kya nswa, kyenga kya ikumi kya kibaba ya nswa mmamiri ukee nsasande na mafura;

⁵na mfinyo uve kiraso kya ina, kideesyo ando amwi na kiraso kyeemamitwa ao kiraso kyeeshishwa, kimaruma kya wo ngurana ya suva.

⁶Ao kimaruma kya suva, mmbo kushedeesyaa kiraso kya nswa fyenga fivii fya ikumi ukee nsasande na mafura maangu;

⁷na kya kiraso kyeena mmbo musheendee mfinyo nato uve nrungo nsha kwa Nndumi Iruva.

⁸Na kyeeri kushedesyaa shau ive kiraso kyekora na muro, ao kiraso kyeeshishwa, ao kiraso kya kyaasa, ao kiraso kya unapwe;

⁹llyo kusheninngyaa ando amwi, kiraso kya nswa kibaba kimwi kya nswa mmamiri ukeensasande na mafura kyenga kya shuba.

¹⁰Kusheserisya-u na shuba imwi ya mfinyo nkyo kiraso kya kyeena, na kiraso kyeekora na muro kyanrungo nsha vesenya Nndumi Iruva.

¹¹Niindo kishetanwaa kwa wo ng'umbe, ao suva, ao kwa wo ngurana ya suva, ao ngurana ya ndafu.

¹²Shaasa yeekyena lyikai lya efyo mushedeesyaa, niindo mushetanaa kya fyoose, shaasa yeekyena lyawo lyikai.

¹³Vana vany woose mmbo vashetanaa indo, mwiserisyaa Nndumi Iruva firaso five nrungo nsha kwakwe.

¹⁴Na kwakooya kwiifo muny kwany, ao nndu ungi akee neeni, nawe kakunda iserisya Nndumi Iruva kiraso, shaasa yeni mwatana, nawe natane indo.

¹⁵Yoo irondeny yelyo, ivavaso mmbo lyivaa lyimwi kwany na kwa muny akee kwany, llyo ivavaso lya llung'anu kwa marika any moose, shaasa mukai yeni na muny nakae indo kwa Nndumi Iruva.

¹⁶Mmbo lyivaa ivavaso lyimwi nsi kwany na kwa muny akee kwany.

¹⁷Naasa Nndumi Iruva karera na Mose, kammbia,

¹⁸Rera na vana va Israeli, kuvavie, kyeeri musheangaa uruka elo nkemurwaa,

¹⁹elyi mushelyaa shoonga efo urukeny elo, mmbo musheserisyaa Nndumi Iruva kiraso kya yiiboo.

²⁰Kyeeri musongosyaa nkate, nkate wa mmbee wa fimu fya mbee mmbo mushutaa kiraso yekyo yoo nndeny nkweni.

²¹Nswa wany wa mbee mmbo musheninngyaa Nndumi Iruva ni kiraso kya iipoo, kya marika any moose.

²²Neelyi mushelyamaraa, mufishe mavavaso a Nndumi Iruva yoo alevavasya Mose,

²³yoo moose Nndumi Iruva aleaninngya Mose, kipookya llya Nndumi Iruva alevavasya, na marika any elyi numa,

²⁴kwakooya ni urekwa lwatanwa nndu nalaishi, nta ironda elyo lyilaishi, llyo ironda lyisheutaa ngashe ya shau ive kiraso kyeekora na muro, kive nrungo nsha usenyi Nndumi Iruva, ando amwi na kiraso kya nswa, kiraso kyeena, shaasa ivavasyo lyikai, na ndafu imwi ive kiraso kya ulyamari.

²⁵na nkohani navike usandi kimaruma kya ironda lyoose lya vana va Israeli, nawo vafwaayo, elyi lwekee ulyamari lwawo na vameende firaso fyawo, kiraso kyeeserisya Nndumi Iruva na muro, na kiraso kyawo kya ulyamari vakeenngye Nndumi Iruva kimaruma kya urekwa lwawo;

²⁶na ironda lyoose lya vana va Israeli mmbo lyisaryoo, na muny, mashika, kindo ekyo mmbo kiletanwa valaishi.

²⁷Lyingyi, kwakooya nndu atana ulyamari nalakusarye, llyo asheende mburu ya savana ya mwaaka umwi ive kiraso kya ulyamari.

²⁸Nawe nkohani navike usandi kimaruma kya nndu yeto alelyamara, elyi atana ulyamari nalaishi, naambo navikywa usandi, nawone isarywa.

²⁹Ivavaso mmbo lyivaa lyimwi nsi kwa yeto mwilyamara kulore eeshi, kwa yeto awonikye kwany, na muny.

³⁰Lyo nndu atana kindo eeshi, kava muny kyeny ao muny, yeto mmbo aarara Nndumi Iruva nawe mmbo avikwaa kwaasha na vandu vakwe.

³¹Mashika elyi aimmbwa irero lya Nndumi Iruva, nefisha mavavasyo akwe, nndu yeto navikwa kwaasha, urekwa lwakwe lunkaye.

³²Naasa kyeeri ekyo vana va Israeli vakee kulya kasa, vakalollya nndu ekesana ngwi nkonu wa sabato.

³³Yewo valelollya eesanaa ngwi vakamweende kwa Mose na Aron, na mbee ya vandu woose.

³⁴Nawo vakambika kifingyon, mashika elyi kilanderumbuwa kilya atannywa.

³⁵Nndumi Iruva kavia Mose, Nndu yeto nkuti nawaawa, ironda lyoose lyinkabe na mawe kutani afwa.

³⁶Naasa ironda elyo lyikanrwa kipoo ya ulale, vakankaba na mawe kafwa, shaasa Nndumi Iruva alevavasya Mose.

³⁷Naasa Nndumi Iruva karera na Mose kammbia,

³⁸Rera na vana va Israeli kuvavie vasongosie mise efo makeduny a masara awo marika moose, vavike mise eyo efo masareny awo marika awo moose ta fwana ya samawati,

³⁹mise eyo muilole mukummbwe mavavasyo a Nndumi Iruva neeyatana, na lyingyi mulasheenyanyaka-fo mwilatyaa makusaro any muveni, shaasa mwekee llya mbee mwitanaa uravi lwany lwa utuusi;

⁴⁰naambo mukummbwe neelatya mavavaso akwa, muveva veele kwa Iruva waany.

⁴¹Ni yeny Nndumi Iruva, Iruva waany shilemuuta kulya Misri, naambo shive Iruva waany, Ni yeny Nndumi Iruva shikee Iruva waany.