Read BIBILLYA Mareiyo Meele a Iruva MEEKYENA 2 Bible Online

MEEKYENA 2 - BIBILLYA Mareiyo Meele a Iruva bible

MEEKYENA 2

¹Nndumi Iruva karera na Mose na Aron, kavavia,

²Vana va Israeli vasalale wo nndu yoo bendera yakwe ikai, nafiringisyo fya mmba tawo ta vandeye vawo, fikeekunla nng'u vareiye meema aringitye yeema yeele taari toose.

³Neewo vakaa taari ya ngama, efo mwi ushee nafo, ni ulale va Yuda, na nniini wa vana va Yuda ni Nashoni mwana wa Aminadabu.

⁴Na matorito akwe, valya vakeeveekyeni ni fiku makumi mfungare na fiina na mayana arindaru.

⁵Neewo vashesalalaa nnyanu nawo ni va ufyari lwa Iskari, na nniini waawo ni Netanel mwana wa Suari;

⁶na itorito lyakwe, valya vakeveekyeni, ni fiku makumi araanu na fiina na mayana aana;

⁷na va Sabulon nniini waawo ni Eliabu mwana wa Heloni,

⁸na itorito lyakwe, valeekyenwa ni fiku makumi araanu na mfungare na mayana aana.

⁹Yewo woose valeekyenwa ulaleny lwa Yuda ni fiku iyana lyimwi na makumi nyanya na firindaru na mayana aana. Yewo mbo vasongwaa mbee.

¹⁰Taari ya sinde ni ya bendera ya Ruben na matorito awo, na nniini waawo ni Elisuri mwana wa Shedeuri.

¹¹Na itorito lyakwe, vakeveekyene ni fiku makumi aana na firindaru na mayana araanu.

¹²Neewo vakaa kufii nawo ni ufyari lwa Simion, na nniini waawo ni Shelumieli mwana wa Suri-shadai;

¹³na itorito lyakwe, vakeveekeni ni fiku makumi araanu na kyeenda na mayana araru;

¹⁴na ufyari lwa Gadi, na nniini waawo ni Eliasafu mwana wa Deueli;

¹⁵na itorito lyakwe, valya vakeveekyeni ni fiku makumi aana na firaanu na mayana arindaru na makumi araanu,

¹⁶Woose valeekyenwa va ulale lwa Ruben ni fiku iyana lyimwi makumi araanu na kyimwi mayana aana na makumi araanu, itorito awo. Ewa mmbo va kyaaro kya kavii.

¹⁷Llyo yeema yeele lyishepowaa, ando amwi na ulale lwa Valevi lyikee nnang'ani a ngyulale toose shaasa uramba lukai, mmbasheenda indo, wo nndu na ando akwe, na bendera tawo.

¹⁸Taari ya nkwaany ni bendera ya ulale lwa Efraimu na itorito lwawo, na nniini waawo ni Elishama mwana wa Amihudi,

¹⁹Na itorito lyakwe, na valya vawo valeekyenwa ni fiku makumi aana na mayana araanu.

²⁰Na kufii nawo ni ufyari lwa Manase, na nniini wa vana va Manase ni Gamalieli mwana wa Pedasuri;

²¹na itorito lyakwe valeekyenwa ni fiku makumi araru na fivii na mayana avii;

²²na ufyari lwa Benyaminy na nniini waawo ni Abidani mwana wa Gidion;

²³na itorito lyakwe, valya valeekyenwa ni fiku makumi araru na firaanu na mayana aana.

²⁴Woose valeekyenwa ulaleny lwa Efraimu ni fiku iyana lyimwi na nyanya na iyana lyimwi. Ewa ni va kyaaro kya kararu.

²⁵Taari ya ndoo ni bendera ya ulale lwa Dani na matorito awo; na nniini waawo ni Ahieseri mwana wa Amishadai.

²⁶Itorito lya valya valeekyenwa ni fiku makumi arindaru na fivii na mayana mfungare.

²⁷Neewo vashekaa kufii nawo ni ufyari kwa Aseri na nniini waawo ni Pagieli mwana wa Okran;

²⁸na itorito lya valya vakeveekeyni ni fiku makumi aana na kyimwi na mayana araanu.

²⁹Lusorye ufyari lwa Naftali na nniini waawo ni Ahira mwana wa Enani;

³⁰na itorito lyakwe, na valya valekyenwa ni fiku makumi araanu na firaru na mayana aana.

³¹Woose valeekyenwa va ngyulalen ta Dani ni fiku iyana lyimwi makumi araanu na mfungare na mayana arindaru. Yewo mmbo va kyaaro kya ifurumya valatya vakaa numa na bendera tawo.

³²Yewo mbo valeekyenwa va vana ya Israeli kwi mmba ta vandeye vawo, voose waleekenwa efo ngyulaleny ta matorito awo vekee vandu fiku mayana arindaru na vararu maayana araanu na makumi araanu.

³³Lyo Valevi mmbaleekyenwa-fo, shaasa Nndumi Iruva alevavasya Mose.

³⁴Niindo vana va Israeli valetana, shaasa Nndumi Iruva alevavasya Mose, vakakusanyirya na bendera tawo, vakeenda wo nndu kwi mmba yakwe na kwi mmba ya vandeye vawo na vandu vakwe.