Read BIBILLYA Mareiyo Meele a Iruva MEEKYENA 23 Bible Online

MEEKYENA 23 - BIBILLYA Mareiyo Meele a Iruva bible

MEEKYENA 23

¹Naasa Balaamu kavia Balaki, “Shitannya fitara fyeerasya mfungare yaa, kudeesye shau mfungare na suva mfungare.”

²Balaki kavetana shaasa Balaamu ammbia. Balaki na Balaamu vakauta kiraso, wo kitara kyeerasya shau imwi na suva imwi wo kitara kyerasia,

³Balaamu kavia Balaki, “salala kufii na kiraso kyafo, neeny sheende ilola kulakooye Nndumi Iruva na kyoose asheshoraa, shikuvyaa.” Keenda kafika ando a ifumbuny,

⁴Iruva kakwaanannya nawe, nawe Balaamu kavia Iruva, “mmbo shansongosia fitara mfungare fyeerasya, wo kitara shadeesya-u shau imwi na suva imwi wo kitara.”

⁵Kyasia Nndumi Iruva kavia Balaamu, “Sora Balaki kundemmbia marero yaa.”

⁶Kawuya kankooya eeselelyi alya fitareny fyeerasya, we na vasongoru woose va Moabu.

⁷Kasongosya fyaaso kaamba, Balaki mmbo aleshuuta Aramu, Nawe mangyi ya Moabu kooka fidoorony fya taari ya ngama Kashivia, Osho, sheekia idenga Yakobo, Sheekia isakira Israeli

⁸A shidenge inda yeto nalakee nndenge ni Iruva, Ao niinda shisakiraa yeto nalandesakirwa ni Nndumi Iruva

⁹Mmbo shilellollya shikee fidoorony fya mawe, shikee mafumbuu-shoo, Nawo ni vandu vakee veni, valasasangyi na vandu va masanga engyi,

¹⁰Ni vi ashiidimaa yeekyena va ufyari lwa Yakobo luvakye kiluulyi Ao nta kyenga kya kaana kya Israeli? Ra shikufiiye ufu lwa nndu wa usumanu, shivemanda shawe.

¹¹Naasa Balaki kavia Balaamu, A nkyoki eki kwashitannya? Mmbo shilekweende yaa naambo kusheekye idenga vakiduva vakwa, lyo yewe kweengera ivavikya mbora mmwasi deny.

¹²Nawe kamwaallwa kammbia, A ndesa yeny nkishikooye-se yaamba kilya Nndumi Iruva ashivavasya shikyaambe?

¹³Balaki kammbia, “Kyasian-te, osho na yaa kusalale ando engyi kulole yewo vakee mbai veni, kuvadenge wo nta nshi woose-fo”,

¹⁴Kamfita iremeny lyivaangwa Sofimu, alya ifumbuny lya Pisga, katannya-u fitara mfungare fyeerasya, kautyau lyingyi firaso, shau imwi na suva imwi wo kitara kyerasia,

¹⁵Naasa Balaamu kavia Balaki, “Salala yaa kiraso kyafo kyikai, neeny shirere mbele na Nndumi Iruva alya kwa mbee.”

¹⁶Naasa Nndumi Iruva kakwaanannya na Balaamu karera nawe, kammbia, “Wuiya kurere na Balaki, kummbie indi.”

¹⁷Eekivuya kankooya eeselelyi alya fitareny fyeerasya, na vasongoru va Moabu vekee nawe, Balaki kammbesa, “A Nndumi Iruva mmbo akuvavasya-ki?”

¹⁸Nawe kaamba kyaaso ekyi, “Yewe Balaki kwiipo shaarannya, woi mwana wa Sipori;

¹⁹Iruva nshi nndu naambe wongo sha nndu wa vandu-fo, nta nnyakuryaa sha vandu fo, kwakooya anrera mmbo araa naletana? A karera mmbo araa nalainutya?

²⁰Yeny mmbo shikee nniinge ishora lyeevikya mbora. We Iruva mmbo avikye mbora, neeny nshishaalashaa-fo,

²¹Kwa Yakobo nnyalelollya-fo uravi-fo, nta nnyalelollya-fo nrima muumu-fo, Nndumi Iruva wakwe we Iruva mmbo akee nawe, na unyanga lwa mangyi nnini llo lukee nnang'ani yaawo.

²²Iruva mmbo alevauta Misri, nawe mmbo atiri wiidimi sha mboo,

²³ni dede nkwiifoo ntambo kushiidima itannya Yakobo-fo, na vakava vaanga mbashidimaa Israeli-fo, mbony ta Yakobo na Israeli tisheambawaa mbony yeto Iruva aletitana.

²⁴Kwiishi-ro, vandu yeva mmbo vavakye miiso ya kyika. Na shaasa miiso yanyaasya, kulore ilalaa kutani yalya mireiyo Na ina samu ya yefyo filewaawa.”

²⁵Naasa Balaki kavia Balaamu, kyasia, “Nta kulavadenge-fo, nta kulavavikye mbora deny-fo.”

²⁶Kyeendi we Balaamu karouwa Balaki kammbia, “Kindo Iruva ashivavasyaa mmbo shakuvya-se sheelyi nshiitaa na n kuti shikitane?”

²⁷Naasa Balaki kavia Balaamu; “Naasany, osho ulaalu, shikoore kindo kingyi; Kulakooye ndesa Iruva ashiirikyaa kusheekye idenga vandu yeva efo.”

²⁸Naasa Balaki kaiboo Balaamu kamfita uwe ya ifumbu lya Peori, naambo valollye kulya imungony.

²⁹Balaamu kavia Balaki, “Kyasia shitannya yaa fitara fyeerasya mfungare kuveshideesyau shau mfungare na suva mfungare.”

³⁰Naasa Balaki katana kilya Balaamu ammbia, kautya-u kiraso kya shau na suva wo kitara kyeerasya.