Read BIBILLYA Mareiyo Meele a Iruva MEEKYENA 27 Bible Online

MEEKYENA 27 - BIBILLYA Mareiyo Meele a Iruva bible

MEEKYENA 27

¹Kyeeri ekyi vefu va Selofehadi wa Heferi wa Gileadi wa Makiri wa Manase akee mwana wa Yosefu, na marina a vefu va Selofehadi nng'u yaa, Mala na Noa na Hogla, na Milka na Tirsa,

²Nawo vakasalala yoo mbee ya Mose na Elieseri we Nkohani na mbee ya vasongoru na mbee ya vandu woose, yoo yeemeny yeele, vakavavia

³Nde weeru mmbo alefiyya kunu kasa, nawe lyo nta nnyekee umwi wa valya valesalala kilashana Nndumi Iruva veeteterwaa n'Kora-fo; lyo we mmbo alefwa kyakwe muni, nalatiri mwana wa kyuumi.

⁴A mmbo kyava inda irina lya ndeeru lyuutwa marineny a ufyari lweru vai tupu elyi naleetiri mwana wa kyuumi. Yese luniingwa ding'u ando amwi na vana va maye va nde weeru.

⁵Naasa Mose kauuya Nndumi Iruva mbony yei.

⁶Nndumi Iruva karera na Mose kammbia,

⁷Vefu yewo va Selofehadi mmbo vaamba kindo kya usumanu; nkuti kuvaniinge ding'u ando amwi na vanavamaye va ndeyaawo nkyo kuvaniinge na ding'u ya ndeyaawo.

⁸Naasa kurere na vana va Israeli kuvavie, “Kwakooya nndu afwa nalatiri vana vakyuumi llyo kuniingyaa mfu wakwe ding'u yakwe.

⁹Na kwakooya nalatiri nta mfu, aningyaa vana vamaye ding'u.

¹⁰Na kwakooya nalatiri vanava maye, vanava maye va ndeye vaniingwa ding'u yeyo.

¹¹Na kwakooya ndeye nalatiri vana va maye, yeto akee wa kufii efo ufyariny, nawonise ding'u yakwe; na elyi mmbo lyivaa usumanu na ivavasyo kwa Israeli, shaasa Nndumi Iruva alevavasya Mose.”

¹²Nndumi Iruva kavia Mose, Saama uwe ya ifumbu elyi lya Abarimu shikoore uruka yelo shileniinga vana va Israeli.

¹³Neewe kwammaa iilola, neewe mmbo kundesangaa na vakuu vafo, indo shaasa kilevekooya mwanamau Aron;

¹⁴nakyo mmashika llya mulemina irero lyakwa alya kasa ka Sini llya vandu valekunung'una, valashitirye wiindi nta alya mureny ulya, mura yeto ni wa meriba ya Kadeshi, kulya kasa ka sini.

¹⁵Mose karera na Nndumi Iruva kammbia,

¹⁶Woi Nndumi Iruva wa muu wa fyoose fitiri muu, vikany nndu nasalallye ironda elyi,

¹⁷nndu avakallyaa veshaanga na isomuka, naambo ironda lya Nndumi Iruva, lyilasheeva sha mburu tilatiri mwiisi.

¹⁸Nndumi Iruva kavia Mose, “Iboo Yosua mwana wa Nuni akee nndu nkaye mmumuyo, kumwekerye woko lwafo,

¹⁹kumweende kwa nkohani Elieseri na mbee ya ironda lyoose, kummbavasye findo fyoose mbee ya vandu woose

²⁰Kumwaavye na kyenga kya wiindi lwafo, naambo ironda lyoose lya vana va Israeli vakooye imwaarannya na wiindi

²¹Nawe mmbo asalalaa mbee ya nkohani Eliasari esoraa uvavaso lwa Urim yoo kwa Nndumi Iruva vandu vatane fyoose vesoraa kindo ashaambaa, we na vana va Israeli woose.”

²²Naasa Mose kavetana shaasa Nndumi Iruva alemmbavasya kaipoo Yosua kammbika mbee ya nkohani Eliasari yoo mbee ya ironda lyoose;

²³Mose kamweekerya maako, kammbia marero elakana nawe, katana indo shaasa Nndumi Iruva alemmbavasya.