Read BIBILLYA Mareiyo Meele a Iruva MEEKYENA 36 Bible Online

MEEKYENA 36 - BIBILLYA Mareiyo Meele a Iruva bible

MEEKYENA 36

¹Naasa vandu va mirwe va mmba ta vana va Gileadi we mwana wa Makiri akee mwana wa Manase vabarikye kwa Yosefu, vakaserikya kufii na Mose na ironda lya vandu va mirwe va Israeli,

²vakaamba, Nndumi Iruva mmbo alevavasya nndumi weeru (yewe Mose) naavye vana va Israeli uruka eekabaa kura naambo luve lwawo, na Nndumi Iruva kavevavasya nndumi wakwa naniinge vefu va Selofehadi ulya mwanamaye weeru, ding'u ya ndeye waawo

³Naasa kwakooya woorwa ni vandu va ngyufyari tingyi nkyo na ding'u yaawo mmbo ishendaa ngyufyariny yeto, luutwa kweru.

⁴Na kyeeri kya yubile ya vana va Israeli ding'u ya ufyari yelo ishefumbutwaa.

⁵Naasa Mose karera na vana va Israeli shaasa Nndumi Iruva alembavasya, kaamba, Ufyari lwa vana va Yosefu mmbo Lwarera kya usumanu.

⁶Kya vefu va Selofehadi Nndumi Iruva mmbo aamba, vashidimaa yoorwa shaasa vasauwaa wo veni, lyo efo ufyariny lwawo veni.

⁷Naambo ding'u ya ufyari yelu ileende ufyariny lungyi, kimmba mmbo kisumani ding'u ya ufyari lukae efo ufyariny yelo weni,

⁸na wo mfu atiraa ding'u ya ufyari ya Israeli mmbo ashoorwaa efo ufyariny lwa vandeye, naambo na vandu vakwe vashewarya ding'u yeyo

⁹Nkyo ding'u nnyishuukaa ufyariny yelu yeende ufyariny lungyi-fo, wo ufyari mmbo lukaa na ding'u yaawo veni.

¹⁰Naasa na vefu va Selofehadi vakatana shaasa Nndumi Iruva alevavasya Mose;

¹¹naasa Mola, Tirsa, Hogla Milka na Noa, wo vefu va Selofehadi vakoorwa ni vandu va ufyari lwawo.

¹²Mmbo valeorwa ni vasero va Manase we mwana wa Yosefu, naasa na ding'u yaawo ikasaa ufyariny lwawo.

¹³Yaa nng'u mavavasyo Nndumi Iruva alevavasya vana va Israeli na kana kya Mose, alya fyaandeny fya Moabu kwakullya ya Yordan mbai yoo Yeriko.