Read BIBILLYA Mareiyo Meele a Iruva MIKA 2 Bible Online

MIKA 2 - BIBILLYA Mareiyo Meele a Iruva bible

MIKA 2

¹Oshiny lwa yewo valalalaa rony veshokyaa vengyi mitambo. Neelyi kwakya vakavina nnu iinutya kilya valedeesya itana.

²Vakakunda marema vakakooya. Vakakunda mmba, vakatiwonisa. Kulefoo mmba ao masaa alakee a ilama.

³Nkyo Nndumi Iruva kaamba, “Neeny shandeesya imweengye urumato, na mmushekuuta-fo. Mmbo mushewoywaa ni ukiva na ukushobi lwany lusye.”

⁴Elyi kyeeri ekyo kifikaa, vandu vengyi mmbo vashereraa kyany kive kiringisyo kya iwa, nawo vashemwiimba yeni sha kiimbo kyeteenda, vaambe, “Lwammisya deny! Nndumi Iruva allusoka uruka lweru Kaniingya valya valelukamara mifungwa.”

⁵Na elyi kyeeri kifikaa kyeviirya vandu va Nndumi Iruva uruka lwawo, yeni mmusheonisaa-u nta kindo-fo.

⁶Vandu mmbo vakeshirerya vakashivia, Kulalurerye yese-fo. Kulaambe mbony eto-fo. Iruva nnyashelutanyaa nta ukasha-fo.

⁷Mmbo mukusarye vandu va Israeli mmbo vakee vadenge? A Nndumi Iruva mmbo atura usisiryo? Alutannyaa indo dede? A Nndumi Iruva nshi arerya vandu vakwe na ufoo yewo veetana mesha?

⁸Nndumi Iruva karouwa kaamba, Mmbo mwawoya vandu vakwa sha vakiduva. Vengyi mmbo vawuya wooka fireny veekusarye kyeny ni ufoo, kyeendi vakakooya nshi indo kyikai-fo.

⁹Mukafuna vaka va vandu vakwa efo mmbeny tawo na vana vawo mukavasoka mbora tawo.

¹⁰Ukeny yaa, mashika nkukivaa ikaa-fo. Ngyulyamari tany mmbo tammengye ando yaa urumato lwa llung'anu.

¹¹Vandu yeva mmbo valangye vakisuku va wongo vavalembaa veshaambaa, “Mmbo shamuvia mushewonisaa mfinyo na wari mukuniiye?”

¹²Lyo yeni moose va Israeli musaayeu mmbo mmumbyaa ando amwi, sheelyi nndu asanyirya moonri akwe. Muve sha moonri awuya mmba, nalo uruka lwiishwe vandu shapu.

¹³Iruva mmbo ashevaruyaa shia wooke efo vakee varishisye. Mmbo vashefishaa ngiri ta muri wooke efo vakee varaye, valekwa. Llyo Nndumi Iruva yeu akee mangyi yaawo ashevasongoyaa.