Read BIBILLYA Mareiyo Meele a Iruva MIKA 3 Bible Online

MIKA 3 - BIBILLYA Mareiyo Meele a Iruva bible

MIKA 3

¹Arannyiny-te, yeni vasongoru va Israeli, Kimusumannyi-se itana fya nsumanu?

²Mmbo musuuye fya usumanu mukakunda efyo fya uravi. Mmbo mwashisha vandu vakwa neelya nyama yaawo mukarau maffwa aruu.

³Mmbo mwalya vandu vakwa. Mukavaambo shoony neefisha-fisha maffwa awo, mukavavyaa-vyaa sha nyama teekora na nungu.

⁴Lyo fyeeri fiifo fishaa efyo mushefuyaa Nndumi Iruva lyo nnyashemwaaranyaa-fo, mashika elyi mutannyi fya uravi.

⁵Nndumi Iruva mmbo avia vakisuku, Vandu vakwa mmbo valembwaa mmbakisuku valya vaniingwa kindo naambo vavavie mbony shisha, lyo vakisuku ewo veni vakeerese valya kulore vavaniinga kindo.

⁶“Vakisiku, fyeeri fyany fyansia ulaalu, na mwi kwany mmbo wifoo usholokyaa. Kimmba mwareta vandu vakwa mmukionaa-se myoorye ya ukisuku-fo, nta mmukiidimaa-se yaawuya fisuku-fo.

⁷Yewo vashengeraa yaawuya mmbo vashesukaa kimmba ekyo vaawuya kishevaa ruu. Mmbo vashenyiswaa nnu kimmba Iruva alemaa ivaarannya.”

⁸Kyeendi yeny Nndumi Iruva mmbo ashiishura mumuyo wakwe na finya yakwe, kashisimba ngata ya ilanga usumanu na wiidimi lweevia vandu va Israeli kya ulyamari lwawo.

⁹Shaaranyiny-te yeni vashilyi va Israeli, yeni musuuye usumanu, murevetaa usumanu, kisha kyikava nkyo kikasha.

¹⁰Mmbo mukeetana muri wa Nndumi Iruva to Yerusalemu uvasha lwa vayo mukaluvika uwe ya uwai na uravi.

¹¹Vashilyi vany va muri mmbo vashillya vakawarya findo fya vandu vakapwa ng'unde. Vakohani nawo vakakunda itawa ilyi vatambashwa mavavaso. Vakisuku nawo-da vakaawuya fisuku vawonise-fo fesa. Yewo woose vakaamba vai Nndumi Iruva akee nawo. “Nkitiri mwaandu-fo, Nndumi Iruva akee neese,”

¹²Naasany kimaruma kyafo yewe, Sioni mmbo asheremwaa sha sumbai. Yerusalemu ushelyamarwa uve nrapu. Nalyo ifumbu lya mmba ya Iruva lyisheva nsito.