Read BIBILLYA Mareiyo Meele a Iruva NAHUMU 1 Bible Online

NAHUMU 1 - BIBILLYA Mareiyo Meele a Iruva bible

NAHUMU 1

¹Irero lya Nndumi Iruva kya Ninavi. Kyitabu kya mbony Nahumu wa Elkoshi elollya.

²Nndumi Iruva muni matorito ni Iruva atiri kyififi na mwiitaiyya kiduva, Nndumi Iruva ataiiyaa kiduva eeshwe nyashi; Nndumi Iruva nyataiiyaa kiduva vakiduva vakwe, Nyafumbaa ngoo kyuumu kyimaruma kya vakiduva vakwe.

³Nndumi Iruva anyaashikaa uviny-fo ra na elyi atiri ngala, Nawe nnyareelya varavi-fo. Ando Nndumi Iruva airaa mmbo kishee-u kitita-si na uraato, na mafishi ni kyiluulyi kya marende akwe.

⁴Mmbo akyeemya yeeve nayo ika-umya, We mmbo aumisyaa mira myoose. Mbata ta Bashani na ifummbu lya Karmeli fikaumya, Fivaro fya Lebanoni fikanaa.

⁵Mafumbu nnyareremaa mbee yakwe, Nakwaa ni fidooro nfyeekaa, Uruka lukareka mbee yakwe, Ulana na findo fyoose fyiifo.

⁶A mmbo-vi ashiidimaa ikweesa na ngoo ya Nndumi Iruva? Mmbo-vi ashiidimaa isisirya unyaasi lwa nyashi yakwe? We mmbo apuswaa nyashi yakwe ikaaka sha muro, Mmbo ipaparaa naakwa mmawe a ngyina.

⁷Nndumi Iruva mmbo akee nsaari, We ni turuve kyeeri kya ukyiva. We mmbo eeshi yewo varishyaa uringyi lwakwe.

⁸Indi; na yeeka lya mamwiingyi a mura, mmbo amamitaa na lyimwi vakiishi vakwe; na irishya vakiduva vakwe kutani vaoloka ireeminy.

⁹A nkyama-kyi mwavikkya Nndumi Iruva? We mmbo amumamitaa Nta nkiduva vakwe umwi ashiidimaa isiika kavii-fo.

¹⁰Mmbo vamamitwaa sha usaka lwa miinga Sha mare moomu amamikye

¹¹A kwafo yewe aleukase-fo nndu kavika kyama kya Nndumi Iruva Kavika kyama kya wongo?

¹²Nndumi Iruva aamba ule, “Naakwa vatira finya na iingyifwa, Mmbo vatuulwaa-si na imamitwa. Ra na elyi shemmulyisa ukiva yeni vandu vakwa, Nshikyivalyisaa ukyiva lyingyi-fo.

¹³Ulaalu mmbo shifishaa yookyi yakwe singony-tany, Na mise vamufingye nayo mmbo shisheifisha-fishaa.”

¹⁴Nndumi Iruva ammuuta ivavaso lyikwaani neeni mmbo avia Ninavi ule, “Nkukyiwonisaa vana vesendwa na irina lyafo-fo. Mafwanu afo a ipasha na a yeetwa mmbo shiafisha-fishaa, yefo mmba ya maruva yoo afo.” Yeny mmbo shishekusumyaa kifu kyafo, Mashika nkukee nkasha deny.

¹⁵Lola; uwe ya mafumbu ngyayo ta nndu: akeeyeende mbony shisha, Ni nrumi akapaa weele lwa unapwe Kummbweny mikonu yaany miniini yeni vandu va Yuda, Inuutyeny fyaasa fyany fya pya, naambo vandu vakasha valakyivaidime lyingyi, Vamaa imamitwa woose deny.