Read BIBILLYA Mareiyo Meele a Iruva SEKARIA 1 Bible Online

SEKARIA 1 - BIBILLYA Mareiyo Meele a Iruva bible

SEKARIA 1

¹Kwikee mwiiri wa nyanya, mwaaka wa kavii, kyeeri Dario ekee mangyi ya Persia, irero lya Nndumi Iruva lyikasheya Sekaria, mwana wa Berekia nshuku wa Ido lyikaamba,

²Yeny Nndumi Iruva, mmbo shilenyafukwa nnu, kimaruma kya vande vany.

³Kweekyo, enda kundevavia; Nndumi Iruva muni matorito mmbo aamba, Wuyeny kwakwa, na yeny shishemuwuuya, ni yeny Iruva muni matorito shaamba.

⁴Mulasheeva sha vande vany, valya vevavaswa mmbakisuku va-mbee. Sheelyi Nndumi Iruva muni matorito aamba, “Ukeny efo meengyeny na mashoreny any makasha, mukooye iwuuya Iruva, indi-lyo valakunde ishaaran ya nta yaalashika. Ni Nndumi Iruva muni matorito aamba.”

⁵Vande vany nkwi efo vakai? Amwi na vakisuku vawo, mmbo vakaa indo llung'anu?

⁶Vande vany, mmbo valekooya ngapo kimaruma kya ilema mavavaso na wiikimbi shilevarummya varundi na vakisuku vakwa? Kyeeri kilya valekurya na yaalashika, mmbo valeamba Nndumi Iruva, mmbo eekunndye ilukapa kyeendwa ni mitannyi yeeru. Niindo ngata enkudeesya imutannya.?

⁷Kwiike nkonu makumi avii na kaana, mwiiri wa ikumi na lyimwi, wikee nto mwiiri wa Shebat, kyeeri kya mwaaka wa kavii na ushilyi lwa Darius, irero lya Nndumi Iruva, lyikasheya Sekaria mwana wa Berekia nshuku wa Ido, we nkisuku, kaamba.

⁸Kwikee kio, mmbo shilelollya nndu eesaammye frasi idodorye. Nndu eto mmbo eesalalyi imungony nnag'ani ya miri ya mihadasi. Numa yakwe kweifo frasi tingyi tidodorye, na tingyi ta ifu, na tingyi tefwani shaa.

⁹Naasa shaamba, “A nkyoki ekyi Nndumi wakwa?” Nsu ulya alerera na yeny, kashivia, Shikoora yewo mmbaki.

¹⁰Naasa nsu ulya esalalyi alya nnang'ani ya miri ilya ya mihadasi kashivia, frasi eti mmbo tarumwa ni Nndumi Iruva isalallya ulana.

¹¹Nawo vakarouwa nsu ulya wa Iruva esalalyi kulya nnang'ani ya miri, mmbo lusheeye isalallya na ilola ulana, lukakooya ni kya dede, ulana ni usha, mmbo lumalallyi sau.

¹²Nalyo nsu ulya wa Nndumi Iruva, kaamba, “Ale Nndumi Iruva muni matorito mmbo kufikaa-kwi kwisuuye indo kya muri yeu wa Yerusalemu; na miri ya uruka yelu lwa Yuda, yei kusuuye kya-vayo ulaalu ando a myaaka makumi mfungare?”

¹³Nawe Nndumi Iruva, karouwa nsu ulya, kwa marero mesha atiri nsia.

¹⁴Naasa nsu ulya alerera na yeny, kashivia, vaanga na unyanga waasha, kwaambaa ule, “Nndumi Iruva muni matorito, mmbo aamba indi, ‘Nrima wakwa mmbo wiishwe ifura kya muri wa Yerusalemu na ifumbu lya Sioni.

¹⁵Indi mmbo shisuuye kya masanga yoo ekeefura, na ikushela kya Vaisraeli shasua kyaangu, llyo masanga alya akavaengerya ngapo.’

¹⁶Kweekyo yeny Nndumi Iruva mmbo shawiiya muri wa Yerusalemu, mmba yakwa ya iterevya ipooka itanwa na muri wa Yerusalemu upooke itanwa-se kwa wiiya?”

¹⁷Naasa nsu ulya wa Iruva, kashivia-se kapa weele, kwaambe, “Nndumi Iruva muni matorito, mmbo aamba indi, Miri yakwa mmbo ishevikywa mbora lyingyi, yeny Nndumi Iruva, shishefweerisa lyingyi muri wa Sioni, na yeny Shimuni shishekaa yaa Yerusalemu.”

¹⁸Naasa shatarammbwa miso shalollya mbembe yiinya.

¹⁹Naasa shavesa nsu ulya, ekeerera neeny, “A mbembe yeti mmbo taamba-ki?” Nawe kashirouwa, kashivia, yaa ni masanga alya atiri finya enyanyata vandu va Yuda, Israeli na Yerusalemu.”

²⁰Numa, Nndumi Iruva kashoora veekapa minya vaana.

²¹Neeny shammbesa, “Vandu eva mmbo vasha itana-ki? Nawe kashivia, ‘Vandu eva mmbo vasha naambo vashekooya ikora mbembe ta vandu valya venyanyata Vayuda, naambo kulashekwiipo-fo lyingyi nndu ashenyanyata-se Vayuda.”