Read BIBILLYA Mareiyo Meele a Iruva SEKARIA 11 Bible Online

SEKARIA 11 - BIBILLYA Mareiyo Meele a Iruva bible

SEKARIA 11

¹Rrwa myaango yafo yewe Lebanoni, naambo muro wiidimi imamita mieresi yafo!

²Kapeny kyiiyo yeni misonobari, mashika mieresi yanrumatwa, miri eyo ya itumbe yallyamarwa! Kapeny kyiiyo, yeni mialoni ya Bashani, mashika ngorosho shiwongye yammanywa!

³Arannyiny fiiyo fya veeshillya, mashika itumbe lyawo lyallyamarwa, Arannya fiiyo fya miiso, mashika kasa ka mura wa Yordan kallyamarwa!

⁴Nndumi Iruva, Iruva wakwa mmbo aamba, “Kwiipo kwava mwiisi wa moonri yoo akeendeshishwa

⁵Yewo vakeyuura, neevashisha nkwiifo nndu akeerera nawo-fo. Na valya vekee kumba moonri yoo mmbo vakeyaamba, ‘Nndumi narumishwa. Ulaalu lwammba masimba.’ Nta na valya vakee veesi vawo mmbakeelollya-fo.

⁶Nndumi Iruva kaamba nshikivalollyaa-se ukiva vandu va ulana yelu-fo, mmbo shiraa wo nndu maakon a mwiisi wakwe, na wo umwi maakony a mangyi yakwe, nawo vashelyamara uruka na yeny nshisheturunyaa-fo nta umwi uka maakony awo-fo.”

⁷Kweekyo yeny shashevikwa mwiisi wa moonri alya eekekumbwa andeshishwa mmbalya veekaba mbusha, ya yuura na indeshisha, Naasa shandeepo mbiiri ivii wokony imwi shaivaanga, “Ilyillya” na ingyi shaivaanga “Umwi.” Sheesa moonri akwa;

⁸ando a mwiiri umwi shawaa veesi vararu valyang'a. Neeny shasukywa ni mashora awo. Nawo vakashiswa.

⁹Neeny nshikivaa lyingyi mwiisi waany-fo, “Eto ashefwaa, nafwe neeto ashemamika, namamike na valya vasaa-fo, vakulye veni na veni.”

¹⁰Naasa sheepoo mbiiri ilya yakwa sheivaanga Ilyillya shaifisha, kyeyoora sheelyi, kyaasa kilya Iruva emmbika na vandu woose mmbo kyamfishwa.

¹¹Kyaasa kilya kyikafishwa nkonu ulya mweni. Veekaba mbusha valya veyuura na ikumba maanri veekeshilola, vakamanya sheelyi mmbo lyeekee irero lya Nndumi Iruva.

¹²Naasa shavavia, “Kwakooya ni usumanu kwany, shiniingeny ekyo kyikwaani na yeny; kwakooya oode seeny nakyo.” Naasa vakeesa weesi lwakwa shekeli makumi araru ta fesa.

¹³Nawe Nndumi Iruva kashivia, “Endavika efo mbolokony ya mmba ya iterevya. Na weesi yelo shetawa, llo lweesumannyi shitawo. Na yeny sheepo shekelyi tilya makumi araru ta fesa, shandetivika kulya mbolokony ya mmba ya Nndumi Iruva.

¹⁴Naasa shafisha mbiiri ilya yakwa ya kavii ‘Umwi’ nalyo ukulungo nnang'ani ya Isreli lukafika.

¹⁵Naasa Nndumi Iruva kashivia, ‘Kwiipo lyingyi kukwallwe mwiisi wa maanri alakee nsongovisi.’

¹⁶Mashika mmbo shikeyeende kunu urukeny, mwiisi alasarye mbony ta maanri akeerumaka, nta isangirya valya vakeenyanyaka, nta ivavara valya vafikye marende, nta iniinga shoonga valya vatiri muu, indi mmbo ashesauwa, nalye valya vatiri finya, nalye asande na mbungashu ta-vayo

¹⁷‘Woshiny llwa veesi valyang'a, yeto alasaraa kya maanri akwe! Woko lwakwe usha mmbo lumanywo na usu, na iriso lyakwe lya woko usha lyiiluwo-fo! Woko lwakwe luve ufiri, na iriso lyakwe lya woko usha lyiparike.’”