Read BIBILLYA Mareiyo Meele a Iruva SEKARIA 14 Bible Online

SEKARIA 14 - BIBILLYA Mareiyo Meele a Iruva bible

SEKARIA 14

¹Loleny nkonu wa Nndumi Iruva ukeesha. Yeni vandu va Yerusalemu, masaa any akeeshaawa mbee yaany mwiilollye.

²Mashika mmbo nshesangiryaa masanga ashesanga amwi; ikaba Yerusalemu. Miri yaany ishekamarwa mifungwa. Na vaka vany vasheafinywa. Kyenga kya vandu vany vashekamarwa ushingeny. Indi kyenga kya vandu vashesaa kunu muriny mmbasheepowa-fo.

³Naasa Nndumi Iruva mmbo ashekabana na masanga alya ndesa akabana kyeeri kya fira kyikansha.

⁴Nkonu yeto mmbo ashesalala, ifumbuny lya miri ya miseituni taari ya ngama ya muri wa Yerusalemu. Nalyo ifumbu yelyo, mmbo lyishaawa nnang'ani kavii ni imungo lyikwaallye lying'ani nnu, kupookya taari ya ngama kundefika taari ya nkwaany. Na kyenga kyimwi kya imungo elyo kishekaa taari ya ndoo, na kyenga ekyo kyingyi taari ya sinde.

⁵Eni mmbo murishaa mwiira na yaandi imungony elyi, nnang'ani ya mafumbu yaa avii a Nndumi Iruva. Mmbo musherishaa ndesa vande vany verisha kidina-si kyeeri kilya kya Usia mangyi ya Yuda. Naasa llyo Nndumi Iruva muniany ashaa aryani na veele vakwe woose.

⁶Kyeeri ekyo nkushekaa-fo mbeo nta mbeo shinyaasi-fo, mmbo kushevaa saa kuleefo ireema.

⁷Nndumi Iruva mmbwe muni eeshi, nkwiifo nsanyiny nkwiifo kio-fo, mashika kyeeri kwafika nkwaany mmbo saa iifo.

⁸Nkonu yeto mura wa muu mmbo usheeka wuuka Yerusalemu, kyenga kya mura yeto mmbo usheeka na yeeveny lya taari ya ngama, na lya taari ya nkwaany. Mura yeto mmbo ushevaa wiisheeka indo kyeeri kya mwi na kyeeri kya kisie.

⁹Nndumi Iruva mmbwe ashevaa mangyi ya ulana loose; wo umwiamwiindye sha Iruva nkonu yeto mmbo ashevaa umwi na irina lyakwe lyimwi.

¹⁰Uruka loose mmbo lushevaa urambalalyi kupookya Geba kundefika Rimoni, kulella taari ya sinde ya Yerusalemu. Muri wa Yerusalemu mmbo ukaa yoo ukai, kupookya mwaango nniini wa Benyaminy kundefika mwaango ulya wa kwambee, kundefika mwaango wa ilemmyony (alya ilemyony lya ngiri kufiitani na alya kweekee mwaango wa kasha, kuuka alya urorony lwa Hanareli kundefikya alya vakammya kyaanka kya mangyi).

¹¹Nalyo Yerusalemu mmbo ushekaywaa ni mmbandu, mashika kukikaa-fo lyingyi kidengo-fo; vandu mmbo vashekaa-fo na urilalyi.

¹²Vandu yewo vashaa ikabana na Yerusalemu, yei nnyo ngapo Nndumi Iruva asheveengyee, miili yaawo mmbo ishekapwaa, veefo na muu veeshenda, miso awo mmbo ashepwaa eeke efo kishoorony kya-vayo; ngyulumi ntishepwaa tiikee efo kaniny kyawo.

¹³Nkonu yeto vashewoywaa mbweeresi uniini luuka kwa Nndumi Iruva; wo nndu mmbo ashekabaa nndu mwanamaye.

¹⁴Vandu nawo mmbo vashekabaa Yerusalemu. Na umasi lwa masanga yoo moose afiitani na uruka lwa Yuda mmbo lushesangirywa saabu, fesa na masara meengyi nnu.

¹⁵Ngapo iingyi mmbo ishoolokya-se frasi, nshungu, ngamula itiko na mafisi engyi moose yoo ashekooywa efo turuveny eyo.

¹⁶Naasa wo nndu ulya eturunya va masanga yoo moose valya vekaba Yerusalemu, mmbo vasheenda kya sukukuu ya matangilo ya iindya mangyi na Nndumi Iruva muni matorito wo mwaaka.

¹⁷Na kwakooya kwiifo nndu moose wa isanga lyoose ulaniny alasheenda Yerusalemu yiinndya Nndumi Iruva muni matorito, nnyishekabaa-fo mmbwa yefo urukeny lwawo-fo.

¹⁸Na kwakooya yewo va mmba ta Misri valasheenda yiinndya sukukuu ta matangilo, naasa Nndumi Iruva mmbo ashevarikyaa ngapo ilya sheni erikya valya velema yiinndya sukukuu sha eyo.

¹⁹Yei nnyo ishevaa ngapo ya Misri na ngapo ya masanga moose yoo ashelemaa yeenda na yiinndya sukukuu eyo ya matangilo.

²⁰Na nkonu yeto mmbo kushevaa-u na mareiyo yoo fishengeleny fya frasi ashaamba, “Ni fyeele kwa Nndumi Iruva” na fiiya feekorya, kulya mmba ya Nndumi Iruva, mmbo fishevikwaa fyeele sha fideeva filya fya kulya kitareny kyeerasya.

²¹Fiiya fyoose fyeekorya fya Yerusalemu na Yuda, mmbo fishevikwa fyeele, kwa Nndumi Iruva muni matorito. Naasa yeto moose ashaa isheniingya kiraso ashiidimaa yiipo neendekorya-fo nteera wa kiraso. Naasa nkukivaa-fo nndu weekaba mbusha lyingyi yefo mmba ya Nndumi Iruva muni matorito nkonu yeto-fo.