Read BIBILLYA Mareiyo Meele a Iruva SEKARIA 3 Bible Online

SEKARIA 3 - BIBILLYA Mareiyo Meele a Iruva bible

SEKARIA 3

¹Naasa kashoora Yosua, we nkohani nniini, eesalalyi mbee ya nsu wa Nndumi Iruva, na taari ya woko lwakwe usha kweesalalyi-u Satana we nkumbi ivakyana nawe.

²Nawe nsu ulya wa Nndumi Iruva kavia satana, Nndumi Iruva akudenge! Nndumi Iruva yeto alesauwa Yerusalemu akudenge! Nndu yeu nshi-mmbo avakye kimwii kilesomutwa murony?

³Nawe Yosua mmbo eesalalyi alya mbee ya nsu wa Iruva aree soori tirinndye nnu.

⁴Naasa nsu ulya kavia valya vesalalyi kufii nawe, “mwaambweny soori eto ta kirinda eree.” Naasa kavia Yosua, lola, “Shankusanngya ulyamari lweekutiri, na ulaalu mmbo shishekuvika masara a wuuru uniini.”

⁵Naasa shavavia, “Vammbike nrweny kitaambaa kisangye.” Kweekyo vakammbika nrweny kitambaa ekyo kyoosose vakammbika na soori shisha, na nsu ulya wa Nndumi Iruva ng'u ando eesalalyi.

⁶Nawe nsu ulya wa Nndumi Iruva kavavasa Yosua kammbia,

⁷“Nndumi Iruva muni matorito mmbo aamba ule, kwakooya kwalatya shia takwa na yiindya mavavaso yoo akwa mmbo kushevaa mwiisallya mmba yakwa na mwiishilya masaa akwa na vandu yeva woose vasalalyi yaandi.

⁸Ulaalu, arannya yewe Yosua, nkohani nniini, amwi na varundi ewo kukeerunda nawo vakee ando amwi na yewe, mmbo muukee kiringisyo kisha na nshemweengye ndundi wakwa avaangwa Maa.

⁹Kya indi lola, mmbo shivikaa iwe yelyi usanguny lwa Yosua lyitiri miso mfungare. Neeny shishereiya mareiyo uwe ya-vayo; na nkonu umwi-nsi shishefwaaya ulyamari lwa uruka yelu. Yee ni yeny Nndumi Iruva muni matorito shaamba.

¹⁰Nkonu yeto, umwi mmbo ashevaanga amurasa wakwe, vashelya kimwi, kwasi ya nri wa mafura, na nri wa sabibu wakwe, ni Nndumi Iruva muni matorito aamba.”