Read BIBILLYA Mareiyo Meele a Iruva SEKARIA 6 Bible Online

SEKARIA 6 - BIBILLYA Mareiyo Meele a Iruva bible

SEKARIA 6

¹Shalollya lyingyi ukisuku lwa mitika iina ya frasi yooka neefo nnang'ani ya mafumbu avii afwana ya arera shuu.

²Mutika wa mbee mmbo weekeeyomuwa ni frasi tidodorye, wa kavii ukoomuwa ni frasi tifwani shuu.

³Wa kararu ukaomuwa ni frasi tifwani shaa peru, na wa kaana frasi tifwani ifu.

⁴Naasa sharera na nsu ulya alerera neeny shammbesa, “A ekyi nkyoki Nndumi wakwa?”

⁵Nawe nsu ulya kashirouwa kashivia, “Mitika yei ngyuraato tiwukye taari yiinya ta nginii-u, nato mmbo tikee mbee ya Nndumi Iruva muni ulana loose.

⁶mutika ulya wa frasi shuu mmbo weekeyeenda na uruka lwa taari ya ndoo, na ulya wa frasi shaa peru, mmbo weekeyeenda na uruka lwa taari ya nkwaany, na ulya weekeyoomuwa ni frasi ifwani ifu mmbo weekeyeenda na uruka lwa taari ya sinde.”

⁷Kyeeri frasi tilya tidodorye tesha, mmbo tetirwa ni isanga lya indesaiya ulana, nawe kavavia, “Endeny mukandesaiya ulana.” Nawo vakeenda isaiya ulana.

⁸Nawe nsu ulya kashivaanga kashivia, “Llate, frasi tilella na taari ya ndoo, nto ntilefweerisa nnyashi yakwa.”

⁹Naasa irero lya Nndumi Iruva lyikashisheya,

¹⁰Lyishaamba, “Endewarya findo filya fya pya fya vandu yewo Vasami nawo ni yeva Heldai, Topia na Yedaya, kwaangusye nkonu yeto kundefika kulya kyeny kwa Yosia mwana wa Sefania nawo woose mmbo valesha wooka Babilony,

¹¹Kundewarya-fo saabu na fesa, kusongosye ureto, nalo kundeluvika nrweny wa Yosua mwana wa Yehosadoki nkohani nniini.

¹²Naasa kummbie, ‘Nndumi Iruva muni Matorito mmbo aamba ule: Yaa mmbo kuiyo nndu avaangwa Maa, nawe yoo akai mmbo atiri finya nnu, nawe mmbwe atanaa mmba yakwa yeeterevya Yeny Nndumi Iruva.

¹³We mmbwe ashetanaa mmba ya Iterevya ya Nndumi Iruva. Mmbwe asheniingwa wiidimi lwa ushilyi, ashekaya kiri kya umangyi, neefo umangyiny lwakwe, kushevaa-u nkohani amwi nawe mmbo kushevaa-fo urilalyi na wiitanu nnang'ani yaawo.”

¹⁴Na ureto llwa mmbo lushevaa efo mmba ya Nndumi Iruva kive ni kindo kyeevakumbura-wo Helddai, Topia, Yedai, na Yosua mwana wa Sefania.

¹⁵Na valya vakee kwaasha mmbo vashaa vasheakana itana mmba ya Nndumi Iruva muni matorito. Neewe llyo kumanyaa sheelyi Nndumi Iruva muni matorito mmbwe yeto ashiruma kwafo. Neekyi mmbo kishevaa indo kwakooya kushiirikyaa Nndumi Iruva. Iruva wafo.