Read BIBILLYA Mareiyo Meele a Iruva MALAKI 2 Bible Online

MALAKI 2 - BIBILLYA Mareiyo Meele a Iruva bible

MALAKI 2

¹Yeni vakohani, wiikimbi elu llwany.

²Lyo mukanra, mulaita neeluvika nriminy mwiindye irina lyakwa mmbo nshemudengaa na mbora tany toose. Neeny shammetidenga, mashika elyi mulashiitaa. Ni Nndumi Iruva aamba indo.

³Mmbo nsheimaa mbeu tany tilammyi, na fisangu fyany shifitefuse, yee, utefusu lwa firaso fyany, musheerwa efo ando amwi nafyo.

⁴llyo mushemanyaa shelyi wiikimbi elu mmbo lwamusheya naambo Valevi vawarani na kyaasa kyakwa. Ni Nndumi Iruva wa matorito aamba indi.

⁵Kyaasa kyakwa na Valevi kyitiri muu na ufoo, shakivika naambo kyeerewa, nawo vakashitirya vio.

⁶Mmbo alerera kya usumanu, nalalasye ntambo. Keenda aryani neeny na ufoo na umamiri, keenduta na vengyi vakalakana na uravi.

⁷Mashika nkuti nkohani narere na urango, llyo na vandu vashensoraa, kimmba akee nrumi wa Nndumi Iruva muni matorito.

⁸Kyeendi yeni mmbo mulereta shia ya dede, mukeeveta na vengyi. Mukareta kyaasa kilya shilevika na Valevi, yeny Nndumi Iruva wa matorito.

⁹Nkyo kimakruma neeny shamura mukaminwa muve vakiva vanduny vengyi woose, kimmba neeni mulakeelatya shia takwa, mukeeveta usumanu.

¹⁰A yese loose llukee va Nde umwi na Iruva umwi aluumbye? A mmbo kyava indaany elyi wo umwi waany atannya ungyi findo filavaa, keemmbwa kyaasa kilya kya vande veru?

¹¹Yuda mmbo atana kindo kilavaa, kikaende urekwa kunu Israeli na Yerusalemu. Yuda mmbo aletefusa weele lwa Nndumi Iruva, karwaa nka wa maruva engyi.

¹²Nndu mwitana indo mmbo asherauwaa nakee kwaasha na vandu vakwe, kiwo neeto ootya Nndumi Iruva wa matorito firaso.

¹³Yeni mmbo muketana indo mukeende misoru yoo meseny ya Nndumi Iruva mulakisaraa kya firaso efyo, elyi mwara mulatana kisumani.

¹⁴Lyo yeni mukaamba. Ni elyi Nndumi Iruva alelollya shaasa yewe kuletannya nka uravi mwikee vakoo, kulaore nta kwanrekyo kyaasa kilya kyany.

¹⁵Nkwii-fo nndu aletana indo naleshi-fo. A ndesa kwiifo nndu akunndye mwana wakwe alave mwiindya Iruva? Kwiiseny nnu kya mirima yaany. Kulave nndu atanya nka wakwe mwiiya kindo kya kiila.

¹⁶Yeny shisuuye nnu elyi nndu na nka valakana, ni yeny Nndumi Iruva, Iruva wa Israeli sharera.

¹⁷Mmbo mwaarisa Nndumi Iruva na marero any. Mukawuya yaamba. A mmbo lwamwaarisa inda? Kimmba mukusarye itana uravi nkitiri mwaandu kwa Nndumi Iruva-fo, vai mmbo afuraa, ao mukaamba, Iruva yeto atiri uvingo nkwi akai?